Rita Lyberth Jensen Akileraartarnermut Aqutsisoqarfimmi pisortanngorpoq

Rita Lyberth Jensen Akileraartarnermut Aqutsisoqarfimmi aqutsisoqarfimmi pisortatut atorfinippoq.

Rita Lyberth Jensen Qitiusumik Natsorsuuserivimmi siunnersortaanertut atorfimminngaanneerpoq 2013-millu 2023-mut Akileraartarnermut Aqutsisoqarfimmi immikkoortumi pisortaavoq.

»Rita Lyberth Jensenip Akileraartarnermut Aqutsisoqarfimmi qullersanngornissaa nuannaarutigaara. Akileraartarnermut immikkoortumut annertuumik ilisimasaqarpoq, ukiorpassuarnilu pisortani aqutsinermik, aningaasaqarnermik aqutsinermik digitaliinngorsaanermillu suliaqartarnerminit misilittagaqarpoq. Tamanna aqutsisoqarfiup ineriartorteqqinnissaanut pitsaasumik tunngavissiivoq. Suleqatigiinnissamut qilanaarpunga,« Aningaasaqarnermut Naalakkersuisoq, Aqqaluaq B. Egede oqarpoq.

Rita Lyberth Jensen 1996-milli pisortat allaffissornerata iluani sulivoq. Akileraartarnermut Aqutsisoqarfimmi immikkoortumi pisortaanermini ilaatigut aningaasaqarnermut, naatsorsuutinut, akileraarutinut akitsuutinullu tunngasunik akisussaaffeqarpoq. Tamatumalu saniatigut siusinnerusukkut Qitiusumik Naatsorsuuserivimmi allaffimmi pisortaasimavoq.
Taamattaaq digitalinngorsaanermi annertuumik misilittagaqarpoq. Ilaatigut sulisitsisunik nalunaarsuiffimmik nutaamik ineriartortitsinermik sulisitsisullu nalunaaruteqartarnerannut digitalikkut aaqqiissutinik suliniummi pisortaasimavoq.

Isumannaatsumik ingerlatsineq ineriartortuarnerlu

Pisortatut sulinermini sinaakkutit ersarissut, akisussaassuseq oqaloqatigiinnerlillu erseqqissunik sinnaakkuteqartinnissaat Rita Lyberth Jensenip pingaartippaa. Sulisut piginnaasaat suliaminnilu ineriartornerat pisortatut atuunnerani qitiulluinnartuupput.

»Innuttaasut suliffeqarfiillu Akileraartarnermut Aqutsisoqarfimmi eqqortumik pitsaasumillu sullinneqarneq tatigisinnaasussaavaat. Tamanna ulluinnarni isumannaatsumik aqutsinermik aqutsisoqarfiullu sulinerata ineriartortuarneranik pisariaqartitsiffiuvoq. Tamatuma sulisunik qanimut suleqateqarnikkut pisarnissaa pingaartippara. Taakku suliaminnik ingerlatsinerat misilittagaqarnerallu suliatta pitsaasumik naammassinissaannut pingaaruteqarpoq,« Aqqaluaq B. Egede oqarpoq.

Piaartumik atorfimmini aallartissaaq.

Paasissutissat erseqqinnerusut: Naalakkersuisoqarfiup pisortaa Nikolai Sten Christensen, nsch@nanoq.gl aamma oqarasuaat 34 66 75.