Naalakkersuisut siunissami aalisarnermut ilinniarfiit ineriartortinneqarnissaat pillugu suliaq ingerlateqqippaat

Naalakkersuisut Kalaallit Nunaanni siunissami aalisarnermut ilinniarfiit nukittorsarneqarnissaat ineriartortinneqarnissaallu pillugit suliaq ulapputigaat. Ilinniarfimmik pilersitsinissaq anguniarneqarpoq, siunissami aalisartut pisariaqartitaannik piginnaasanik aallaaveqartumik, aammalu aalisarnermik inuussutissarsiutip isumannaatsumik, ilinniarnertalimmik, piujuartitsinissamullu suliniutilimmik, ineriartortinneqarnissaanut suliaq suliarileruttorpaat.

Suliaq Naalakkersuisunit ukioq manna siusinnerusukkut aallartinneqartumut nangitsineruvoq, tassani siunissami aalisarnermik ilinniartitaanerit pillugit inuussutissarsiortunik peqataaffigineqartumik workshoppertitsisoqarpoq Ilulissani siullermeertumik. Tassani sammineqarput: piginnaasassat, ilinniarfiup siunissami imarisinnaasaai taavalu aalisarnerup silarsuaani suliffeqarfiit allallu attuumassutillit ingerlaqatigiittumik, ataqatigiissumillu ilinniarfik ilusilersorsinnaanissaanut eqqartuisoqarluni.

Suliap ingerlateqqinneranut tunngasumik 2. oktober 2026 Nuummi nutaamik workshoppertitsisoqarpoq, aalisarnermik inuussutissarsiuteqartunit, kattuffinnit, ilinniartitaanerullu iluani suliaqartunik kiisalu allanit aalisarnermut attuumassuteqartunit 30-t missaani peqataasoqarpoq.

Workshoppimi sammisat ilaat makkuupput: Piginnaasat siunissami ilinniartumut tunniunneqarsinnaasut suussappat aammalu qanoq ilinniarfissaq ilusilersorneqarsinnaava aammalu ilinniarlutillu naammassinikut ilinniarnertik qaffassaqqikkusullugu atuarnermik ingerlateqqissinnaanissaanut periarfissaat misissorneqarlutik.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olsen oqarpoq:

“Naalakkersuisuni pingaartipparput ilinniartoq sulitilluni misilittakkaminik katersisinnaassasoq, aammalu ilinniarfik, aalisarnermullu suliffeqarfiusut ataqatigiissumik suleqatigiittumillu ingerlaqatigiinnissat siunertarineqassasoq.
Pingaartitarput aamma alla tassaavoq ilinniarfiup iluani, qanoq piginnaasaqarfigiligassat agguataarnissaat, ilinnialernerup aallartinneraniik kiisalu aalisarnermut ilinniarfiup iluani ingerlariaqqinnermi, taasumallu ataani sinerissap qanittuani ilinniarfimmi pikkorissarfigisinnaasassaasa isiginiarneqarluarnissaa.”

Sulissutigisat aamma ilagaat, kikkut ilinniarfimmut pineqartumut ilinnialersinnaassanersut, taakkulu eqqartorneqartullu makku ilagaat, meeqqat atuarfiini naammassisut, innuttaasut ilinniareersimasut minnerunngitsumillu aalisartut misilittagaqareersut, atuarfimmut aallartissinnaanerat pingaartinneqarpoq.

Piginnaasat aallaaviussapput

Suliamut tunngatillugu ilinniartitaanerup qanoq sivisussuseqarnissaa, ilinniarfiullu qanoq ilusilersorneqarnissaa suli aaliangiunneqanngilaq.
Naalakkersuisoq Nivi Olsen nangilluni oqarpoq:

“Ilinniartitaanerup ilusilersornissaa aammalu sivisussuserisassaa aaliangiunneqartinnagu, misissorneqaqqaartussat pingaartippagut: Ilinniartup suut piginnaasaqarfigissagai, ilinniartullu naammassiguni suut pikkoriffigissanerai.”

Naalakkersuisuni pilersinneqartoq aalisarnermik suleqatigiissitap ilinniarfik pillugit suliaq ukialernerani, ukiuuneranilu 2026 nangeqqissavaat.

Paasissutissat annertunerusut pillugit paasisaqarusukkuit: Immikkoortortaqarfimmi pisortaq: Trine Egede, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik, Oqarasuaat: +299 34 50 00, E-mail: treg@nanoq.gl