Suila-tapit: Utertitsilluni akiliinissamut piumasaqaat Naalakkersuisut atorunnaarsippaat

Innuttaasut 2025-mut Suila-tapinik utertitsillutik akiliissanngillat.

Innuttaasut amerlasuut Suila-tapinut atatillugu pakatsineq nalorninerlu misigisaat Naalakkersuisut paasilluarpaat. Taamaammat Naalakkersuisut Aningaasaqarnermut Akileraartarnermullu Ataatsimiititaliamut aningaasat akiligassanngortinneqartut nalikillilerneqarlutik isumakkeerneqarnissaannut akuersissuteqarnissaat ippassaq qinnuteqaatigaat. 

• Paasissutissat pisortanit pissarsiarineqartut innuttaasutut tatigineqarsinnaasussaapput. Tamanna matumani pisimanngilaq, tamannalu utoqqatsissutigaarput. Innuttaasut ilaat kukkussuteqarnatik amerlavallaartunik aningaasanik tunineqarsimapput, tassungalu akisussaaffik innuttaasuni ataasiakkaaniinngilaq, Aningaasaqarnermut Naalakkersuisoq Aqqaluaq B. Egede oqarpoq.

Taamaammat akiligassatut piumasaqaataasut isumakkeerutigineqarnissaat Naalakkersuisut Aningaasaqarnermut Akileraartarnermullu Ataatsimiititaliamut qinnuteqaatigaat, kukkunerimmi annertuutigut Namminersorlutik Oqartussat IT-mik atortorissaarutaannik patsiseqarmata aammalu innuttaasut nammineq iliuusaannik patsiseqanngimmata.  Innuttaasut Suila-tapinik amerlavallaartunik tunineqarsimasut utertitillutik akileereersut, akiliutaat utertinneqassapput.  

• Naalakkersuisut suliaq ilungersunartutut isigaat. Kukkunerit ilinniarfigissavagut. Piffissaq utertissinnaanngilarput, akisussaaffimmilli tigusilluta aaqqissuussami kukkunernik innuttaasut akiliisissanngilagut. Tamannalu maanna iliuuseraarput,  Aqqaluaq B. Egede oqarpoq.

Isumakkeerinninnerup qanoq ingerlanneqarnissaa, innuttaasullu arlaannik iliuuseqassanerat pillugu Akileraartarnermut Aqutsisoqarfik ilisimatitsissaaq.

Paasissutissat erseqqinnerusut pillugit naalakkersuisup allattaa 54 59 21 aqqutigalugu attavigiuk.