Imarisassat tusarnaarlugit atuarlugitMingutsitsinngitsumik nukissiuutinut aaqqiissutissat aammalu pilersuinerup isumannaatsuunerata pitsaanerunissaanut EU aningaasalersueqataavoq
Nunatsinni inoqarfinni minnerusuni arlalinni seqerngup qinngornerinit nukissiuutinik batteribank-inillu akuleriinnik nukissiuutinut aaqqiissutissanut 8 mio. euro-nik, 60 mio. koruunit missaannik naleqartunik, EU tapersiivoq. Tapersiissutit Kalaallit Nunaata aamma EU-p akornanni suleqatigiinnermik nukittorsaanermut ilaavoq aammalu inoqarfinni minnerusuni pilersuinerup isumannaannerulernissaanut mingutsitsinnginnerusunillu nukissiornermut iluaqutaassalluni.
Nassiussisuuvoq: Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik
Nukissiorfiit nammineerluni 98,7 mio. koruuninik aningaasaliineranut ilanngullugu aningaasaliineq katillugu 158,7 mio. koruuninik annertussuseqarpoq. EU-p tapersiinera pingaaruteqarluinnarpoq, Nukissiorfiit pilersuinermut attaveqaasersuutinik pioreersunik iluarsaassinissamut aserfallatsaaliuinissamullu annertuumik pisariaqartitsimmat.
Taamaattumik EU-p tapersiinerani inoqarfinni minnerusuni aaqqiissutissanik akuleriinnik annertunerusumik siammarterinissamut pingaarnersiuisoqarsinnaalerpoq. Aaqqiissutissami seqerngup qinngornerinit nukissiuutit aamma batteribank-it ataqatigiissinneqarput, taakkua ataatsimoorlutik pilersuinerup isumannaatsuuneranut nukittorsaassallutik, batteribank generatorit dieselitortut tamaviaarnerannut nalimmassaassaaq, seqinermit nukissiuutit tamatumunnga seqinermit nukissiorsinnaalernermi sarfamik mingutsitsinngitsumik tapersiissallutik. Isumaqatigiissutip ilaatut aaqqiissutigineqarpoq Europami suliffeqarfinneersuussasut.
Avatangiisinut, Pinngortitamut, Nukissiuuteqarnermut Ilisimatusarnermullu Naalakkersuisoq, Jørgen Rosbach oqarpoq:
”Patajaannerusumik ataavarnerusumillu nukissiamik pilersuinissamik suliaqarnitsinnut EU-p tapersiinera nuannaajallannarpoq. EU-p tapersiinerani aningaasaliinissaq Nukissiorfiit kisimiilluni kivikkuminaatsitaa piviusunngorsinnaanngorpoq.Tamanna pilersuinermik isumannaatsuutitsinissatsinnut nukittorsaavoq aammalu uuliamik avataaniit eqqunneqartartumik pinngitsuuisitsiniarnitsinnut iluaqutaassalluni.”
Pilersuinerup isumannaatsuunissaa Naalakkersuisuni pingaartilluinnarpaa. Inoqarfinni minnerusorpassuarni nukissiamik pilersuinermi ullumikkut dieseli, eqqussorneqartussaq aammalu isorartoorujussuakkoorluni assartorneqartartoq, pinngitsoorneqarsinnaanngilaq.
Pilersuinerup pioreersup seqerngup qinngornerinit nukissiuutinut aamma batteribank-inut ataqatigiissinneratigut nukissiap ilaa annertunerusoq najukkani tunisassiarineqarsinnaalissaaq. Tamatuma ikummatissamik eqqussuinissamik pinngitsuuisinnaannginnerulersissavaatigut aammalu nukissiamik pilersuineq nunarsuarmi akit nikerarnerannit, pilersuinerup akornuserneqarnerinit nunamilu sumiiffinnut politikkikkut ineriartornermit sunnertiannginnerulersissallugu.
Aningaasaliinerup peqatigisaanik ikummatissanik nunap iluaneereersunik atuisoqassaaq, taamaalillunilu CO₂-mik aniatitsinitsinnik, annikillisitseqataassalluni. Nunami issittumiittutut nunarsuarmi silap pissusaata allanngoriartornerata sunniutai qanimut misigaagut aammalu nunarsuup kissatsikkiartornerata killilersimaarnissaanut nunani tamalaani suliniuteqarnermut Kalaallit Nunaat aamma akisussaaffimmik tiguserusuppoq suleqataarusullunilu.
”Mingutsitsinngitsumut alloriarneruneq, silap pissusianut aammalu patajaannerusunik nukissiuuteqalernissamut tunngassuteqarpoq. Najukkani ataavarnerusumik nukissiorsinnaalerutta, CO₂-mik aniatitsinerput annikillisissagatsigu. Peqatigisaanillu imminut pilersorsinnaanerulissalluta kiisalu Kalaallit Nunaata avataani nunarsuarmi niuerfinnit sunnertiannginnerulissalluta.” taamak oqarpoq Naalakkersuisoq Jørgen Rosbach.
Paasissutissanik annertunerusunik piniarnermi attaveqarfigineqassaaq Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik uunga pan@nanoq.gl