Avatangiisinut ministeri Maria Reumert Gjerding-ip aamma Avatangiisinut, Pinngortitamut, Nukissiutinut, Ilisimatusarnermullu Naalakkersuisup Jørgen Rosbach-ip ataatsimoorlutik tusagassiorfinnut nalunaarutaat: Suleqatigiilluarnerput ingerlaqqissaaq

Ullumi Avatangiisinut, Pinngortitamut, Nukissiutinut Ilisimatusarnermullu Naalakkersuisoq Jørgen Rosbach aamma avatangiisinut ministeri Maria Reumert Gjerding siullermeerlutik ataatsimeeqatigiipput. Ilasseqatigiinnerup saniatigut Kunngeqarfiup Issittumi Siunnersuisooqatigiinni siulittaasuutitaqarnerata, aammalu Amerikamiut sakkutuuisa najugarisimasaanni saliinermi suleqatigiinnissaq oqaloqatigiinnissarlu siunertaavoq. Ministerit marluullutik Danmarkip aamma Kalaallit Nunaata politikkikkut isumaqatigiissutaat 2018-imeersoq iluarisimaarlugu oqarput. Pissutsit unammillernartut atorlugit sulinissaq pisariusimavoq, sulialli pingaaruteqartut annertuullu suli siumut ingerlasut ministerit isumaqatigiissutigaat. 

Avatangiisinut, Pinngortitamut, Nukissiutinut Ilisimatusarnermullu Naalakkersuisoq Jørgen Rosbach oqarpoq:  

”Aqutsisoqatigiit paaseqatigiiffiusumik pilersitsiviusumillu suleqatigiipput. Aqutsisoqatigiit suliamik peqqissaartumik torersumillu tunniussipput, saliinerullu ingerlaneri suliassap pisariungaatsiarnera peqqutigalugu naatsorsuutigisamit sivisunerusumik ingerlavoq. Sumiiffinni amerlasuut avinngarusimasumiipput, aammalu ukiuunera sivisusarmat piffissaq suliffiusoq sivikittarpoq, tamatumalu peqatigisaanik piffissami saliiffiusumi aamma kommunimut, kulturip oqaluttuarisaaneranut piginnittuunermullu tunngasut, peqqissaartumik ataqatigiissaarinissamik pisariaqartitsiffiusut ilanngullugit eqqarsaatigineqartussaapput. Saliineq isumannaatsumik ingerlanneqartussaavoq, tamannalu aallaqqaammut naatsorsuutigisami sivisunerusumik atuiffiusariaqarsimavoq. Taamaattumik saliineq ukiuni tulliuttuni ingerlaqqissammat nuannaarutigaara. Taamaalilluta ataatsimoorluta sumiiffinni saliineq avatangiisinut peqqissutsimullu isumannaatsumik ingerlanneqarnissaa qulakkiissavarput.” 

Avatangiisinut ministeri Maria Reumert Gjerding oqarpoq: 

”Nuannaarpunga ullumikkut suleqatiga kalaaleq, Kalaallit Nunaanni Avatangiisinut, Pinngortitamut, Nukissiutinut Ilisimatusarnermullu Naalakkersuisoq Jørgen Rosbach, suleqatitut pingaarutilik pulaartorisinnaagakku. Kunngeqarfiup Issittumi Siunnersuisoqatigiinni siulittaasuutitaqarnera, Arctic Biodiversity Summit, aammalu Amerikamiut sakkutuuisa Kalaallit Nunaanni najugarisimasaanni saliinissamut isumaqatigiissutip suleqatigiissutigineqarnissaa pillugu oqaloqatigiinnissamut periarfissarsivugut. Saliinerup isumannaatsumik ingerlanneqarnissaa pingaaruteqartoq, aammalu ukiuni tulliuttuni suliamik ingerlatitseqqinniarluta Jørgen Rosbach uangalu isumaqatigiilluinnarpugut.”

Annertunerusumik paasisaqarusunnermi pan@nanoq.gl inussiarnersumik attaveqarfigeqquneqarpoq.