Imarisassat tusarnaarlugit atuarlugit80 Mile PLC-ip campi Nerlerit Inaannut nuuppaa.
Nassiussisuuvoq: Inuussutissarsiornermut Aatsitassanullu Naalakkersuisoqarfik
White Flame Energy A/S-ip, Nunap Qeqqani (Jameson Land) pisinnaatitsissummik pigisaqartup campimi atortut uninngasuutini Tasiilamiit Nerlerit Inaannut (Konstabel Pynt) nuussimagai sisamanngornermi ulloq 30. juuli Inuussutissarsiornermut Aatsitassanullu Naalakkersuisoqarfiup paasivaa. Atortut Dundasimiit (Kalaallit Nunaata Avannaa) siullermik 2025-imi septembarimi Tasiilamut assartorneqarsimapput.
Nunap Qeqqani (Jameson Land) pilersaarutaasumik uuliasiorniarluni qillerinermut atatillugu atortut nunamut assartorneqarnissaat siunertaasimavoq. Campi qillerinermi pisariaqartinneqartumi annikitsuuvoq. Piffissami Dundasimiit Tasiilamut assartuiffiusumi pisinnaatitsissummik pigisaqartoq Nunap Qeqqani (Jameson Land) atortunik nunamukaassinissamut akuersissutaateqarsimavoq. Piffissami utaqqiffiusumi akuersissutip atuunnera qaangiuppoq, tamannalu nutarterneqarsimanngilaq, suliarineqaleruttorlunili.
Atortut Nerlerit Inaanni (Konstabel Pynt) toqqorsimasuutiginissaannut tunngatillugu pisinnaatitsissummik pigisaqartoq Greenland Airportimik isumaqatigiissuteqarsimalluni ilisimatitsivoq. Pisariaqartumik akuersissuteqartoqarsimatinnagu atortunik assartuisoqassanngilaq.
Siuliani eqqaaneqareersunut atatillugu pisinnaatitsissummik pigisaqartoq nunaliaassinnginnermini aatsitassanut oqartussaqarfimmit akuersissutit pisariaqartut suli inississimanngitsut, tassa akuersissutinik pisariaqartunik peqarsimanngitsoq Inuussutissarsiornermut Aatsitassanullu Naalakkersuisoqarfimmit paasineqarpoq. Pisumut atatillugu killilersuisoqarsinnaanera pillugu Naalakkersuisoqarfik naliliivoq. Atortut Nerlerit Inaanni (Konstabel Pynt) eqqortumik inissinneqarsimarpasimmata atortut Tasiilamut assartorneqarnissaannik piumasaqarnissaq naleqqunnavianngilaq. Siunissami assartuinnginnermi assartuinissat tamarmik nalunaarutigineqartarnissaannut aatsitassanullu oqartussaqarfimmit akuerineqartarnissaannut tunngatillugu pisinnaatitsissummik pigisaqartoq sukannersumik mianersoqquneqarumaarpoq.
Attavissaq
Tusagassiorfinnit saaffiginnissutit: Jørgen T. Hammeken-Holm, tlf. 346800 imaluunniit asn@nanoq.gl
Saaffiginnissutit allat: Akuersissutinut immikkoortortaqarfik, tlf. 346800 imaluunniit mlsa@nanoq.gl kiisalu Aatsitassanut Suliassaqarfimmi Avatangiisinut Aqutsisoqarfimmi eamra@nanoq.gl.