Aalisarnermi immikkoortortami arnat pillugit nalunaarusiaq nutaaq

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup aalisarnermi immikkoortortami arnat peqataanerat pillugu nalunaarusiaq nutaaq tamanut saqqummiuppaa.

Nalunaarusiaq aqqutigalugu Naalakkersuisoqarfiup kissaatigaa, immikkoortortami arnat siaruariartornerisa killiffiat saqqummiutissallugu, taamaaliornikkullu aalisarnermi naligiissitaaneq pillugu oqallinnissamut tunngavissiilluni.

Suiaassutsit akornanni naligiinnissaq inuit tunngaviusumik piginnaatitaaffigaat inuiaqatigiinnilu naapertuulluartumik aammalu allatigut ingerlalluartumik ingerlatsinissami tunngaviulluinnarluni. Peqatigisaanillu misissueqqissaartarnerit takutippaat nunat suliffeqarfiillu aningaasaqarneq eqqarsaatigalugu arnanik angutinillu tamakkiisumik akuutitsisinnaasut tunisassiornermi, nutaaliornermi aamma ineriartornermi angusaqarluarnerusartut.

Nalunaarusiami uppernarsarneqarpoq, ullumikkut arnat immikkoortortami suliaqareersut - ilaatigut umiatsiaararsorluni aalisartutut, tunisassiorfinni sulisutit, aalisarnermi piniarnermilu nakkutilliisutut kiisalu allaffissornermi suliaqartutut. Taamaattorli arnat inuussutissarsiornermik suliaqarnermi suli ikinnerussuteqarput.

Aalisarneq pillugu inatsimmi 23. maj 2024-meersuni allassimavoq kalaallit nunaanni aalisakkanik pisuussutit inuiaqatigiit ataatsimut isumalluutigigaat. Qitiusumik pinngortitami pisuussutigut annertunerusumik atorluaraanni suiaassutsimi ataasiinnaq ataatsimut naleqartitatsinnik atuisinnaaneq pillugu apeqqut takkuttarpoq.

Nalunaarusiap tamanut saqqummiunneratigut Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup taamaattumik aalisarnermut immikkoortortami pingaarutilittut inissisimasutut tikkuarpai, - inuussutissarsiut oqaluttuarisaanermi angutinik pingaarnerutitsiuarsimasoq.

Nalunaarusiaq uani atuarneqarsinnaavoq

Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl