Inuit Arnat Ataatsimeersuarnerinit Nalunaarut atsiugaq, Nunarsuaq tamakkerlugu arnat ulluanni Naalakkersuisut tigussavaat

Inuit Circumpolar Council-ip aaqqissugaanit Inuit Arnat Ataatsimeersuarnerinit Nalunaarut atsiugaq siulleq, Naalakkersuisut sinnerlugit Naligiissitaanermut Naalakkersuisup tigussavaa.

Inuit Arnat siorna siullermeertumik Sisimiuni Ataatsimeersuarnerinut atatillugu nalunaarut suliarineqarpoq. Nalunaarut Inuit Circumpolar Council-ip nittartagaani atuarneqarsinnaavoq.

Alaskamit, Canadamit, Chukotkamit aamma Kalaallit Nunannit inuit arnartaannit nalunaarut ersarissunik oqariartuutitaqarpoq. Niviarsiaqqat, arnallu kiffaanngissuteqarlutik, namminnerlu piumasatik malillugit inuusinnaallutik, aaqqissuussaanikkut naligiinngitsoqarani, atornerluisoqarani, nakuusertoqarneq ajorluni, killissamillu qaangiisoqarneq ajorluni inuiaqatigiit toqqissisimasut arnat kissaatigaat. Angerlarsimaffimmi, inuiaqatigiinnilu kulturi aallaavigalugu sulinerminni pingaaruteqassusaa, nunallu killeqarfii akimorlugit ataqatigiinnerup pingaaruteqassusia arnat ersarissarpaat.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen imak oqaaseqarpoq:

"Nunasiaataanermi aaqqissuussisimanerit sutigut tamatigut inuunitsinnut qanoq akuliussimanerinut annertusiartuinnartumik paasinninnernut ukiuni makkunani isiginnittuuvugut, inummut imminermut tunngasorujussuarnit pisortat suliffeqarfiutaannut, atugarissaarnitsinnut, pissaaneqarnermilu pissutsini inuiaqatigiinnitsinnut sunniuteqartuni. Paasinninnerit taakkua tamanut ataatsikkut takkunnavianngillat – kingunerisaasalu inunnit ataasiakkaanit, inuiaqatigiinnilu suliarinissaannut piffissaq annertooq atorneqassalluni.

Nunasiaataanermi nanertuutit annersaat inuit arnartaasa nammannikuuaat, tamannalu timikkut aamma tarnikkut eqquisimalluni. Eqqugaasimasut nanertuutaannit ikiorlugit, akisussaaffiup inissiffissaanut inississallugu uagut suliassaraarput – tassalu arnat namminneq toqqaanissaminnut kiffaanngissuteqarnerinik, toqqissisimanerinillu piffissap ingerlanerani, assigiinngitsutigullu arsaarinnissimasuni.

Ataqatigiikkutta, immitsinnullu tapersersorutta suliassarput oqinnerujussuanngussaaq. Nalunaarut piumassuseqarnermut, inissiinermullu assersuutissaavoq.

Isumassuinermik suliaqarneq, kulturikkullu pikkorissutsit arnat inuiaqatigiinnitsinnut ingerlateqqitaat aamma eqqaarusuppakka. Tamanna artornartutut eqqartukkajuttarparput. Suliassartaili immini ajornartorsiutaanngillat. Suliassartaajukua pingaartinneqannginnerat, naligiimmillu agguataarneqarsimannginnerat ajornartorsiutaasoq. Isumassuineq ajornartorsiutaanngilaq. Qitornanut isumassuillunilu tapersersuilluni anaanaaneq ajornartorsiutaanngilaq. Nammineq ilaqutarisani imaluunniit inuiaqatigiinni inuuffigisami atugarissaarnissaq pillugu sulineq ajornartorsiutaanngilaq. Kisianni akisussaaffiup pingaartumik arnanit kivinneqarnera ajornartorsiutaavoq. Inuiaqatigiit isumassuisut inuiaqatigiiulluartuupput, inuiaqatigiiullutillu toqqissisimasut. Angorusutaq tamanna angussallugu tamatsinnut annerpaajullunilu kusanarnerpaassagaluarpoq.

Arnat inuiaqatigiinnitsinnut pingaaruteqassusiat nersorniarlugu, arnat ulluanni ileqquusumik ilisarnaat nutaanngorlugu Ikimalik Pikilak-mit ilusilersorneqartoq – pingaartitanut arnat ingerlateqqissimasaannut qujamasunnermut, nersorinninnermullu ilisarnaataasumik – Naalakkersuisut ulloq malunnartippaat.”

Naalakkersuisoq ualimut oqalugiassaaq, aqalugiaataalu tamakkiisoq ualimut aamma tamanut saqqummiunneqassalluni. Oqalugiaat, oqalugiareernerup kingorna Naalakkersuisut nittartagaannut ikkunneqassaaq.

Paasissutissat

• Piffissaq tunniussivissaq, oqalugiarfissarlu: ICC-p Nuummi Katuami aaqqissuussinera, 8. marts 2026 nal. 13.00-15.00.
• Nalunaarut Inuit Circumpolar Council-ip nittartagaaniippoq.
• Arnat, niviarsiaqqallu tamarmik naligiimmik pisinnaatitaaffeqarnissaasa, naligiimmillu periarfissaqarnissaasa pingaaruteqassusia erseqqissassallugu, ukkatarissallugulu Nunarsuaq tamakkerlugu arnat ulluata siunertaraa. 2026-mi ullormut qulequtsiussaq tassaavoq “ARNANUT, NIVIARSIAQQANULLU TAMANUT Pisinnaatitaaffiit. Naapertuilluarneq. Iliuuseqarneq”.
• Arnat ulluanni ilisarnaat Naalakkersuisut nittartagaanniittoq, aamma nittartakkatigut inuit naapittarfiiniittoq, arnat ulluannut ileqquusumik ilisarnaat, arnat pisinnaatitaaffiinut aamma naligiimmik periarfissaqarnissaminnut pisinnaatitaaffiinut tapersersuinermik takutitsinertut nunat assigiinngitsut akornanni atorneqartartoq isumassarsorfigalugu ilusilersugaavoq, tassanilu ilisarnaat allaanerusumik eqqarsarfigalugu inuit kulturiannik, ileqquinik, naleqartitaannillu assersuussissalluni tunniit ilanngunneqarluni.
• Ullormut titartagaq eqqumiitsuliortumit, Ikimalik Pikilak-mit, titartagaavoq.
  
  

Inuit Arnat Ataatsimeersuarnerinit Nalunaarummik tigusinermi Naalakkersuisup oqalugiaataa tamaat uani atuaruk


Paasissutissanik annertunerusunik pissarsiniarnermi attavissaq: Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik. E-mail: asn@nanoq.gl. Oqarasuaat +299 34 50 00.