Nuummi illumik sungiusartarfittaassamik ataatsimoorussamik inerisaaneq Aningaasaateqarfiup A.P. Møller Fondip aningaasaliiffigaa

Assi: Peqqissaanermik Illinniarfik

Illu sungiusartarfittaassaq ataatsimoorussaq nutaaliaq, peqqinnissaq pillugu ilinniartitaanerni ukiorpassuarni annertuumik kissaataasimavoq Peqqinnissarlu pillugu ataatsimiititaliarsuarmit innersuussutaalluni. Aningaasaateqarfimmit A.P. Møller Fondimit 60 mio. koruuninik aningaasaliiffigineqarnikkut, Nuummi illu sungiusartarfittaassamik pilersitsiniarneq piviusunngortinneqarsinnaanngorpoq.

Illu sungiusartarfittaassaq peqqinnissamut tunngatillugu ilinniartitaanermut, ilinniaqqinnermut piginnaasatigullu inerisaanermut toqqammavissanik nukittorsaassaaq taamaalillunilu peqqinnissaq pillugu ilinnialersinnaasunik ilinniakkaminnillu naammassinnissinnaasunik amerlanerulersitseqataassalluni.

”Peqqinnissakkut sullissisunik pisarialinnik ilinniartitsineq sulisussarsiniarnerlu, Peqqinnissaqarfimmut ingerlalluartumut pingaaruteqarluinnarput. Ullumikkut immikkoortortat sulinermik sungiusarfissat amerlassusaat qassinik ilinniartoqarsinnaanermut killiliisuuvoq. Aningaasaateqarfiup A.P. Møller Fondip illumik sungiusartarfiliornissamut aningaasaliineragut - Peqqinnissaqarfimmi kommuninilu amerlanerusunik ilinniartitsinissamut, taamaalillutalu peqqinnissakkut sullissisuni fagini arlalinni siunissami sulisussaqarnissamik qulakkeerinissamut pitsaanerujussuarnik periarfissinneqassaagut,” taama oqarpoq Peqqissutsimut Inunnullu Innarluutilinnut Naalakkersuisoq Anna Wangenheim.

”Illu sungiusartarfittaassaq ilinniartitaanermut piginnaasatigullu inerisaanermut periarfissanik ullutsinnut naapertuuttunik ataqatigiissunillu inerisaanissamut pingaaruteqarpoq. Suliniutip aningaasaateqarfimmit namminersortumit aningaasaliiffigineqarnera, aningaasaateqarfiup inuiaqatigiinni pingaarutilinnik tapersersuisinnaaneranut ilinniartitaanermilu Peqqinnissaqarfimmilu pitsaassutsimik kivitseqataasinnaaneranut assersuutissaqqissuuvoq,” taama oqarpoq isumaginninnermut, Suliffeqarnermut, Ineqarnermut, Attaveqaasersuutinut, Isorliunerusunullu Naalakkersuisoq Aqqaluaq B. Egede.

Illu sungiusartarfittaassaq peqqinnissaq pillugu ilinniartitaanerni ilinniartunut peqqinnissaqarfimmi kommuninilu sulisunut ilinniartitsiviussaaq nutaaliaasoq, kvadratmeterit 1000-t missaannik angissusilik. Atortorissaarutit/periarfissat, ilaatigut piviusuusaartitamik ilinniartitsineq, peqataasut suliassanik sungiusarnikkut tamatumalu kingorna isumaliutiginerisigut, avatangiisini toqqissinartuni, atuagarsornikkut ilisimasanik suliassartaanillu atassusiinissamut ikorfartuissapput.

Ilaatigut atortut aningaasaateqarfimmit A.P. Møller Fondimit 2024-imi aningaasaliiffigineqartut, peqqinnissaq pillugu ilinniartitaanerni ullumikkut atorneqareersut atorlugit piviusuusaartitamik ilinniartitsineq, suleqatigiinnermik, attaveqatigiinnermik ilinniagaqassutsikkullu piginnaasanik nukittorsaasutut ilisimaneqarpoq. Illumi sungiusartarfittaassami init peqqissaavittut nakorsaavittullu piviusutut aaqqissuunneqassapput, tassani ilinniartut ilaatigut pinasuagassat ass. annertuumik ajoqusersimasunik passussivimmi uummamminnik unittoortunik uummarsaaneq sungiusarsinnaassavaat tamatumalu kingorna ilinniartitsisoq peqatigalugu qanoq ingerlasimanera naliliivigalugu.

Illup sungiusartarfittaassap Nuummi Dronning Ingridip Napparsimmavissuanut – nakorsiartarfimmut kiisalu pilattaavimmut ajoqusersimasunullu nakorsiartitsivimmut, aningaasaateqarfiup siornatigut aningaasaliiffigisimasaanut, qanittumi inissisimaffeqarnissaa siunertaavoq. Illup sungiusartarfittaassap inissisimaffissaa immikkut ittunik pisoqartillugu – ass. ajutoornerni annertuuni imal. upalungaarsimanissamut atatillugu – Peqqinnissaqarfiup ataatsimut periarfissaanut ilanngunneqarsinnaanissaanuttaaq periarfissiissaaq.

Illup sungiusartarfittaassap sanaartornissaanut najoqqutassaq Nuummi illussanik titartaasarfimmit tnt-mit - nunatsinni Peqqinnissaqarfimmit, Peqqissaanermik Ilinniarfimmit kiisalu Peqqissaanermut Pinngortitamullu Ilisimatusarfimmit aallartitat qanimut suleqatigalugit- suliarineqarpoq.

Ineqarnermut, Attaveqaasersuutinut, Isorliunerusunullu Naalakkersuisoqarfik aningaasaateqarfimmut A.P. Møller Fondimut qinnuteqartuuvoq, sanaartortitsisuussallunilu - tassalu illumi sungiusartarfissap sanaartornissaanut pilersaarusiorneq, neqerooruteqartitsineq piviusunngortitsinerlu. Illup sungiusartarfittaassap 2026-2027-mi sanaartorneqarnissaa naatsorsuutigineqarpoq. Neqerooruteqartitsinermut atatillugu neqeroorummik pissarsisoqareerpat, sanaartugassap akissaa tamakkiisoq aalajangersarneqassaaq.

Paasissutissat sukumiinerusut peqqissaasutut pisortaq Ella Skifte ella@peqqik.gl-imut attavigalugu pissarsiarineqarsinnaapput.