AtuartigukDanmarkimi naalakkersuisut aamma nunatsinni Naalakkersuisut peqqissutsimut sanaartugassanullu tunngatillugu suliniutit pillugit isumaqatigiissuteqarput
Nassiussisuuvoq: Aningaasaqarnermut Akileraartarnermullu Naalakkersuisoqarfik
Aningaasaqarnermut ministeri Nicolai Wammen aamma Aningaasaqarnermut Akileraartarnermullu Naalakkersuisoq Múte B. Egede Kalaallit Nunaanni peqqinnissaqarfimmut aamma sanaartugassanut tunngatillugu suliniutit pillugit ullumikkut isumaqatigiissuteqarlutik atsiorput.
2026-mi kalaallit peqqissarsartut Danmarkimi napparsimmavissuarni katsorsarneqarnissaannut 185 mio.kr.-t atugassanngortinneqarnissaat isumaqatigiissutip ilaani isumaqatigiissutigineqarpoq. Maannakkut siunertamut aningaasat immikkoortinneqareersimasut peqqissutsimut aningaasaliissutaasut qaffannerisigut atugassanngortitsisoqassaaq, taamaalillutik 2026-mi atugassanngortinneqartut ilaneqassapput. Taamatuttaaq danskit peqqinnissaqarfimmi sulisut, assersuutigalugu nakorsat peqqissaasullu Kalaallit Nunaanni sulisut amerlinissaat siunertaralugu
Danmarkimi nunat immikkoortui aamma Kalaallit Nunaanni Peqqinnissaqarfiup akornanni eqaatsumik aaqqissuussinissaq siuarsarniarlugu aningaasaliisoqarnissaa isumaqatigiissummi ilaavoq.
Ittoqqortoormiinittaaq nutaamik nunap immikkoortuani mittarfiliornissaq aamma Qaqortup eqqaani umiarsuarnut nutaamik talittarfiliornissaq pillugu sapinngisamik piaartumik misissuinermik aallartitsisoqarnissaa Kalaallit Nunaata Danmarkillu isumaqatigiissutigaat.
Aningaasaqarnermut ministeri Nicolai Wammen oqarpoq:
”Tunngaviusumik isumaqatigiissumi suliniutit arlallit piviusunngortinnissaat anguniarlugu isumaqatigiissutip ilaanik matuminnga pingaarutilimmik alloriaateqarnerput nuannaarutigaara. Kalaallit Nunaanni Peqqinnissaqarfiup nukittorsarnissaanik attaveqaasersuutinullu Kalaallit Nunaannik pitsaanerusumik ataqatigiilersitsisussanut aningaasaliinissaq pillugu ataatsimut kissaateqarnerput isumaqatigiissutip ilaani takuneqarsinnaavoq. Tamatuma peqatigisaanik isumaqatigiissummi assigiinngitsut atuutilersinnissaat pillugit Naalakkersuisunik qanimut kinguneqarluartussamillu suleqateqarnissara qilanaarivara.”
Aningaasaqarnermut Akileraartarnermullu Naalakkersuisoq, Múte B. Egede oqarpoq:
”Tunngaviusumik isumaqatigiissut eqqarsaatigalugu isumaqatigiissutip ilaanik atugassanngortitsinermi pingaarutilimmik alloriaateqarpugut tamatumalu peqatigisaanik kalaallinut peqqissartunut peqqissutsikkut neqeroorutit aamma Kalaallit Nunaanni attaveqaasersuutinut aningaasaliissutissanut tunngaviit nukittorsarneqarput. Qilanaarutigisatsinnik atugassanngortitsinerup nanginnissaanut danskinik naalakkersuisunik kinguneqarluartussamik suleqateqarnerput isumaqatigiissummi takuneqarsinnaavoq.”
Kalaallit Nunaata imminut napatinnissaa pillugu tunngaviusumik isumaqatigiissutip ilaa 16. september 2025-imeersoq isumaqatigiissutip ilaanit atulersinneqarpoq. Danmarkimi naalakkersuisut aamma Naalakkersuisut tunngaviusumik isumaqatigiissummiittunik allanik atulersitsinissaq anguniarlugu suliap ingerlarnganik ataqatigiissaaripput.
