Umiarsualivimmi pissutsit nalinginnaasut pillugit Disko Line-p oqaaseqaataanut naqqiissut

Tusagassiorfitsigut ersippoq, Disko Line tusagassiorfinnut nalunaarummik nassiussisimasoq, aammalu Maliina Ittuk Kalaallit Nunaata kujataani ingerlatsinermiit peerneqarsimasoq nalunaarutigisimagaa. Tamatumunnga atatillugu Disko Line oqaaseqarpoq, “umiarsualivinni atugassarititaasut qulakkeerneqarsinnaanngitsut”. Tamanna ilumuunngilluinnarmat Naalakkersuisunut erseqqissassallugu pingaaruteqarpoq.

Disko Line umiarsuarmik hybrid-imik immikkut ittumik pisinissamut aningaasaliiniarluni aalajangersimavoq, paasineqarporlu piffissami sivisuumi utaqqineqareerluni, ilusilersuinerullu nalaani kukkunerpassuit aqqusaareerlugit Kalaallit Nunaanni umiarsualivinni pissutsinut naleqqussarneqarsimanngitsoq.

Disko Line ukiorpassuarni Kalaallit Nunaanni sullissereerpoq, taamaattumillu Naalakkersuisut paasiuminaatsippaat, ingerlatseqatigiiffiup qanoq ililluni umiarsualivinni pissutsit ilisimasimannginnerai. Kiffartuussinissamut isumaqatigiissummi imm. 7.1-imi ersarissumik allassimavoq, umiarsualiviit pioreersut Disko Line-mut atugassanngortinneqarsimasut. Kiffartuussinissamut isumaqatigiissutit kanat.gl aqqutigalugu tamanit takuneqarsinnaapput.

Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisoq oqarpoq:

"Umiarsualivimmi pissutsit taamaannerat tupaallaatigineqarsinnaanngilaq. Umiarsualiviit ajornartorsiutitaqanngitsumik Disko Line-mit suliffeqarfinnillu allanit atorneqartut ullut tamaasa takusarparput. Namminersorlutik Oqartussaniit suliffeqarfik sarfamik taliffissamillu atuinissamut immikkut ittumik pisinnaatitaaffilersinnaanngilaat, innuttaasut suliffeqarfiillu allat akigalugit.

Kalaallit Nunaanni umiarsualivinni tamanit atorneqartuni tamanut assigiinnik atugassaqartitsisoqassasoq Naalakkersuisut aalajangiusimavaat."

Naalakkersuisup Naalakkersuisoqarfiup umiarsuaatileqatigiiffimmut toqqaannartumik attaveqarnera aqqutigalugu, aammalu tusagassiorfiit aqqutiginagit oqaloqatigiinnerup ingerlaqqinnissaa qilanaaraa, siunissamilu isumaqatigiissummi isumaqatigiissutigineqartutut suliassanik naammaginartumik naammassinnittoqartassasoq naatsorsuutigalugu.


Annertunerusumik paasisaqarusunnermi Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigineqassaaq, uunga box909@nanoq.gl