Naartunaveersaasersuisimanermut suliassap inuit pisinnaatitaaffiinut tunngasortaannik immikkut ilisimasallit misissuinerat Naalakkersuisut tiguaat

Naartunaveersaasersuisimanermut suliassap 1960-ikkunniit ullumimut pisimasup, inuit pisinnaatitaaffiinut tunngasortaannik immikkut ilisimasallit misissuinerat piffissaq eqqorlugu tiguneqartoq, matumuuna Naalakkersuisut nalunaarutigisinnaavaat.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq:

”Naartunaveersaasersuisimanermut suliassap inuit pisinnaatitaaffiinut tunngasortaannik immikkut ilisimasallit nalilersuinerat maannakkut tigugatsigu ulloq pingaaruteqartorujussuuvoq. Ilisimavarput amerlasuut nalunaarusiap inerniliussallu atuarsinnaalernissaat utaqqigaat. Naalakkersuisut aamma utaqqivaat, taamaalillutillu misissuinerup inernerisa misissornissaat isummerfiginissaallu qilanaaralugu.”

Immikkut ilisimasallit misissuinerat, tamanut saqqummiunneqannginnerani, maannakkut suliffiup iluani ingerlanneqassaaq, taamatullu taanna kalaallisuunngorlugu nutserneqassalluni, tassami taanna taamaallaat tuluttut pigineqarmat. Suliaqarneq taanna pingaartinneqassaaq, kisianni sapaatit akunnerisa 6-it missaannik sivisussuseqassasoq naatsorsuutigineqarluni.

Pissusiviusut

• Naartunaveersaasersuisimanermut suliassap aammalu 1960-ikkunniit ullumimut allatut naartunaveersaasersuinermut suleriaaseqarsimanerup inuit pisinnaatitaaffiinut tunngasortaannik immikkut ilisimasallit Naalakkersuisut aallartitippaat.
• Nunarsuarmi inuit pisinnaatitaaffiinik aammalu nunap inoqqaavisa pisinnaatitaaffiinik innarliisoqarsimanersoq, immikkut ilisimasallit misissuineranni qulaajarneqartussaavoq. Tamatuma saniatigut innarliinerit inuiannik toqoraanermut nassuiaassummut naapertuunnersoq nalilersorneqartussaavoq.
• Immikkut ilisimasallit 2025-mi maajimi, piffissap qiteqqunnerani nalunaarusiamik tunniussipput. Tamatuma peqatigisaanik nalunaarusiap inaarutaasup tunniunneqarnissaata kinguartinneqarnissaa 31. januar 2026-mut akuerineqarpoq.
• Immikkut ilisimasallit ilisimatuunut, 1991-1960-imi danskit-kalaallit arlaannaannulluunniit attuumassuteqanngitsumik spiralilersuisimanermut suliassap qulaajaavigineranik suliaqartunut, attuumassuteqanngitsumik sulipput.

Naartunaveersaasersuisimanermut suliassamut takussutissiaq uani www.naalakkersuisut.gl nassaarineqarsinnaavoq.

Suliassaq pillugu paasissutissanik annertunerusunik piniarnermi saaffigineqarsinnaavoq: asn@nanoq.gl