Vivian Motzfeldtip Troels Lund Poulsenillu Nuummi sakkutuut pulaarpaat

Assiliisoq: Forsvarsministeriet.

Illersornissamut ministeri Troels Lund Poulsen arfininngorpat Nuummut tikeraassaaq. Nunanut Allanut Ilisimatusarnermullu Naalakkersuisoq Vivian Motzfeldt peqatigalugu ilaatigut Utoqqarmiut Kangerluarsunnguanni danskit paarseqataatitaat ilassissavaat. Tamatuma saniatigut ministerit Illersornissaqarfiup annertusisamik Kalaallit Nunaanniinnera pillugu innuttaasunut ataatsimiigiaqqusipput. 

Arfininngorpat illersornissamut ministeri Troels Lund Poulsen Nunanullu Allanut Ilisimatusarnermullu Naalakkersuisoq Vivian Motzfeldt danskit Utoqqarmiut Kangerluarsunnguanni innaallagissiorfimmi, Nuup avataaniittumi paarseqataatitaannut pulaassapput. Tassani sakkutuut ilassissavaat, sungiusarnerullu Kalaallit Nunaata isumannaatsuuneranik upalungaarsimaneranillu nukittorsaanermi qanoq ilapittuinera tusassallugu. 

”Danskit kalaallillu Naalakkersuisui Kalaallit Nunaanni eqqaanilu isumannaallisaanermik nukittorsaanermut qanimut suleqatigiipput. Maanna Arctic Endurancep ataani sakkortusisamik najunneq tassunga assersuutissaalluarpoq. Sakkutuut paarseqataasut naapinnissaannut qilanaaraara. Taamattaaq Nuummi Kangerlussuarmilu innuttaasut sakkutuut aqqusinermi takussaanerulerlutik najuunnerunerannik ilassinnilluarnerannik qujassuteqarfigerusuppakka”, illersornissamut ministeri Troels Lund Poulsen oqarpoq. 

Nunanut Allanut Ilisimatusarnermullu Naalakkersuisoq Vivian Motzfeldt ima oqarpoq: ”Issittoq allanngoriartorpoq, ingammillu Kalaallit Nunaanni piffissaq ilungersunartorsiorfiusoq maanna atuuppoq. Illersornissaqarfiup maaniinnera piffissap ingerlanerani mianernartarsimavoq, taamaammallu Illersornissaqarfiup annertusisamik Kalaallit Nunaanniinnera pillugu Naalakkersuisut danskillu naalakkersuisuisa akornanni pitsaasumik suleqatigiinnerat erseqqissaatigissallugu pingaaruteqarpoq. Sakkutuut kalaallit innuttaasut isumannaatsuunerannut toqqissisimanerannullu suliniutaannik qujassuteqarfigerusuppakka”.    

Illersornissaqarfiup pisortaa Michael Wiggers Hyldgaard Issittumilu Sakkutooqarfiup pisortaa Søren Andersen Utoqqarmiut Kangerluarsunnguanni innaallagissiorfimmut pulaarnermi aamma peqataassapput.

”Arctic Endurancemi Illersornissaqarfik iligisani peqatigalugit Kalaallit Nunaanni Issittumilu silaannarmi immikkuullarissumi ingerlatsisinnaanermi sakkutooqarnikkut iliuutsinik piginnaasanillu sungiusarput. Illersornissaqarfiup aarlerinartorsiortitsinerit suulluunniit tamaasa iliuuseqarfigisinnaasussaavai. Taamaammat ilaatigut Utoqqarmiut Kangerluarsunnguanni innaallagissiorfimmi sukumiisumik attaveqaatinik pingaarutilinnik paarsineq illersuinerlu sungiusarpagut”, illersornissamut pisortaq, general Michael Hyldgaard oqarpoq.

Nuummi innuttaasunik ataatsimiititsineq
Sapaatit akunnerini kingullerni danskit iligisallu sakkutuuisa annertunerusumik Nuummi Kangerlussuarmilu aqqusinerni takussaanerat annertuumik sammineqarpoq. 

Tamanna tunuliaqutaralugu ministerit marluk arfininngorpat ualikkut Nuummi innuttaasunik ataatsimiinnissamut aggersaapput. Tassanilu Illersornissaqarfiup maanna piffissamilu aggersumi najuunnerunera qulequtarineqassaaq.


Illersornissamut ministereqarfiup Naalakkersuisullu ingerlatassat piffissamut piffinnullu siaruarsimanissaasa piffinnilu pissutsinik ataqqinninnissaasa qulakkeernissaat pingaartippaat. Sungiusarnerit Kalaallit Nunaanni oqartussat attuumassuteqartut qanimut ingerlaavartumillu akuutillugit ingerlanneqassapput.

Tusagassiorfiit Utoqqarmiut Kangerluarsunnguanni innaallagissiorfimmut pulaarnermut peqataarusuttut sioqqutsisumik uunga nalunaassapput: presse@fmn.dk