AtuartigukArfininngornerup sapaatillu unnuaani Nuummi innaallagissap qamittoornera
Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Arfininngormat unnukkut nal. 22.30 missaani Nuummi innaallagiaq qamittoorpoq, illoqarfik tamakkerlugu pisumik. Qamittoornermut pissutaavoq Utoqqarmiut Kangerluarsunnguanni anorersuarnerani innaallagissap aqqutaasa marluk imminnut qanippallaalerneranni pilersuinermut aqqutip ajoqusernera. Innaallagissap aqqutaa sivikitsuinnarmik aaqqikkaluarpoq ataatsilli missaani qameqqimmat Nukissiorfiit aalajangerput Nuummi innaallagissiorfik ajutoornermi sillimmataasartoq innaallagissamik pilersuisinneqalissasoq, anorersuup qaangiunnissaata tungaanut.
Ataatsip qaangilaarnerani Nukissiorfiit illoqarfimmik innaallagissiorfik sillimmataasoq atorlugu innaallagissamik pilersuilerput. Ikiterineq kigaatsumik ingerlanneqarpoq motoorit artorsartinnaveersaarneqarmata. Unnuap ingerlanerani Nukissiorfiit illoqarfimmik pilersuineq pillugu nalunaaruteqartarput ullaassarlu nal. 4.35 Nukissiorfinnit nalunaarutigineqarsinnaanngorpoq illoqarfik tamakkerlugu innaallagissamik, imermik kiassarnermillu pilersorneqaqqilersoq.
Pilersuinermut aqqutip ajoqutaa paasineqajaarmat innuttaasunullu paasissutissiineq piaartumik pimmat oqartussaasut toqqarpaat Kalaallit Nunaanni Upalungaarsimasoqatigiit imaluunniit Kalaallit Nunaanni Upalungaarsimanissamut Ataatsimiisitaliaq matumani sulisinneqassanngitsut.
” Ippassaq qamittoornerput qanoq upalungaarsimatiginitsinnut misiligutaavorlusooq takutitsivorlu oqartussaasut pisoqartillugu pilertortumik sulisinnaasut eqaatsumillu ataqatigiissaarisinnaallutik. Nalitsinni sukkasuumik eqqortumillu paasissutissiinissaq immikkut pingaaruteqarpoq isornartorsiuinerillu ataasiakkaat akuersaarpagut, pisumik naliliinissatsinni siunissami pitsaanerusumik iliuuseqarnissamut iluaqutaassammata. Qamittoorneq innuttaasut akornanni toqqissisimannginnermik pilersitsisimasinnaavoq tamannalu paasinarpoq. Ataatsimut isigalugu pisup toqqissinartoraa paasillugu oqartussaasut upalungaarsimasussat pilertortumik iliuuseqarsinnaaneri, taama oqaaseqarpoq Aalisarnermut, Nunalerinermut, Imminut Pilersornermut Avatangiisinullu Naalakkersuisoq Peter Borg.
”Nukissiorfiit suligasuarmata sulilluarmatalu nersorusuppakka. Innuttaasut sapaatit akunnerini arlaqartuni amerikkarmiunit qunusaarneqarnertik pissutigalugu toqqissiviillioreersimapput. Taamaattumillu pingaartuuvoq erseqqissassallugu ippassaq ajutoornermut pissutaammat anorersuaq. Nukissiorfiit ataavartumik innuttaasunik Facebookikkut paasissutissiisarput unnuallu qeqqata missaanniit namminneq nittartagartik aqqutigalugu. Erseqqippoq siunissami pisoqartillugu paasissutissiinerit inooqatigiinnut tusagassiorfiit kisiisa aqqutigalugit nalunaarutigineqartassanngimmata aammali oqartussaasut namminneq nittartagaasigut pisassallutik. Nukissiorfinni sulisut qutsavigaagut unnuarsiornerminnilu misilittagaat upalunaarsimalluarnissamut iluaqutiginiarneqarumaarput”, Inuussutissarsiornermut, Aatsitassanut, Nukissiutinut, Inatsisit Atuutsitsinneqarnerannut Naligiissitaanermullu Naalakkersuisoq Naaja H. Nathanielsen oqarpoq.
Innaallagissamik, imermik kiassarnermillu pilersorneqarneq suli iluarsisimanngippat Nukissiorfiit attavigineqarsinnaapput 54 15 22-mut sianerluni.
Piffissami sivitsortumi Nukissiorfiit upalungaarsimanermut tunngasut pillugit suliniuteqarluarput. 2025-mi ukiakkut Nukissiorfinni sulisunik sungiusartitsisoqarpoq kiisalu suleqatit avataaneersut peqatigalugit arfininngornerup unnuaanisut pisinnaasut qanoq suleriarfigineqarinnaanerat sungiusarneqarsimalluni.
”Nalunngilarput pilersuinerup aaqqissuussaanerani mianernartoqartartoq pinngortitap pissusaata pilersuineq akornusersortarsinnaammagu. Tamanna uagut Nukissiorfiillu piareersimaffigaarput ataavartumillu upalungaarsimanissami periusissanik pitsanngorsaaneq ingerlapparput taamatullu teknikkikkut atortutigut sillimmateqarniarnissaq, unnuami pisup assinganik pisoqarnerani eqaatsumik suleriarsinnaajumalluta”, taama oqarpoq Inuussutissarsiornermut, Aatsitassanut, Nukissiutinut, Inatsisit Atortinneqarnerannut Naligiissitaanermullu Naalakkersuisoq Naaja H. Nathanielsen.
Paasissutissat sukumiinerusut pillugit Inuussutissarsiornermut, Aatsitassanut, Inatsisit Atuutsinneqarnerannut Naligiissitaanermut naalakkersuisoqarfik attavigiuk. E-mail: isiin@nanoq.gl, telefon +299 34 50 00.