Nunanut allanut Ilisimatusarnermullu Naalakkersuisup Illersornissaqarfiup annertusisamik Kalaallit Nunaanniinnera oqaloqatigiissutiginiarlugu qujassutiginiarlugulu Issittumi Sakkutooqarfimmi pisortaq pulaarpaa

Naalakkersuisut Illersornissamullu ministereqarfiup ukiup aallartinnerani Illersornissaqarfiup Kalaallit Nunaanni, Kalaallillu Nunaata eqqaani annertusisamik sungiusartarneri nanginniarlugit aalajangerpaat. Sungiusarnerit 2026-p ingerlanerani NATO-mi iligisanik arlalinnik peqataaffigineqarlutik ingerlanneqassapput. Annertusisamik najuunneq Illersornissaqarfiup sulisuisa ulapaarnerannik kinguneqarpoq, ilaatigut Issittumi Sakkutooqarfimmi, ataqatigiissaarinerup ilaanut annertuumut sungiusarnernillu ingerlatsinernut akisussaasumi.

Naalakkersuisup Vivian Motzfeldtip ullumi Illersornissaqarfiup suliniutai oqaluuseriniarlugit qujassuteqarfiginiarlugillu, Issittumi Sakkutooqarfiup pisortaa, generalmajor Søren Andersen pulaarpaa.

”Kalaallit Nunaat manna piffissami nalorninartumi ilungersunartumilu inissisimavoq, uannullu Issittumi Sakkutooqarfiup, tassanilu sulisut Kalaallit Nunaannut annertuumik suliniuteqarnerannik qujassuteqarfigissallugit pingaaruteqarpoq. Illersornissaqarfiup Kalaallit Nunatsinniinnera piffissap ingerlanerani mianernartuuvoq, taamaammallu Naalakkersuisut Illersornissaqarfiullu akornanni pitsaasumik ataqqeqatigiittumillu suleqatigiinnerup, ukiuni kingullerni nukittunerulersup erseqqissarnissaa pingaaruteqarpoq. Issittumi Sakkutooqarfimmi aqutsisut qanoq isumannaatsuunerup Kalaallillu Nunaanni innuttaasut toqqissisimanerisa nukittorsarnissaa pillugu oqaloqatigiittarnerpassuarnut qutsavigiumavakka. Mannami pisap qiterpiaraa”, Naalakkersuisoq Vivian Motzfeldt oqarpoq.

Issittumi Sakkutooqarfik arfininngornermi ulloq 24. januar 2026 Unnuk Kulturisiorfimmi umiarsuarmik ammatitsissaaq, tassanilu Illersornissaqarfiup sulisui naapillugit taakku suliaannik annertunerusumik paasisaqarnissamut periarfissaqassaaq. Aaqqissuineq pillugu uani annertunerusumik paasisaqartoqarsinnaavoq.