Tasersiami Tasartuullu Tasersuani erngup nukinganit nukissiorfiliornissamut atatillugu Naalakkersuisut aalajangiuppaat periaatsip “Government take-modelip” malinnissaa

Naalakkersuisut aalajangerput Tasersiami Tarsartuullu Tasersuani erngup nukinganit nukissiorfiliassanut suliariumannittussarsiuussinissamut sinaakkutissatut periaatsip government take-model-ip atorneqarnissaa. Naalakkersuisunit ilisimaneqarpoq government take modelip aningaasaliisussanut taarsigassarsisussanullu qanoq pingaaruteqartiginera. Tamanna pissutigalugu Naalakkersuisut periaasissamik suliaqarput, taamaaliornikkut suliassap aningaasarsiutaasussap piujuartitsinissamik tunngaveqartup ikorfartorneqarnissaa siunniunneqarluni ilutigisaanillu Kalaallit Nunaanni erngup nukinganit nukissiorfiit annersaannik atorluaanerup inuiaqatigiinnut iluaqutaanissaa qulakkeerniarlugu.

Government take-modeli taamaallaat erngup nukinganit nukissiorfissanut atuutissaaq pisiortornermik ingerlatsisunut atuuttussaanngitsoq. Government take-modeli akileraartitsisarnerup atuuttup saniatigut allanik marlunnik ilaqartussaavoq:

• Nukissap nioqqutissiarineqartup ataatsip nukissamik atuinermit iluanaaruteqartitsinera
• Aningaasaliissuteqanngikkaluarni aktiamik iluanaaruteqarfissariteriikkamik piginnittuuneq

Taakku suliariumannittussarsiuussinermi unammilleqatigiinninnermi uuttuutitut atorneqassapput.

Atuinermut akiliut
Atuinermut akiliut aaqqissuunneqassaaq nukissap kWh-ip ataatsip nioqqutissiarineqartup Namminersorlutik Oqartussanut akilerneqartarneratigut. Taamatut aaqqissuussineq aningaasaliisussanut naatsorsoruminartuusussaavoq, government take toqqaannartumik nukissamut nioqqutissiarineqartumut attuumassuteqarmat, aningaasanut kaaviaartinneqartunuunngitsoq imaluunniit isertinneqartunuunngitsoq. Atuinermut akiliutip qaffasissusissaa unammilleqatigiinnermi uuttuutitut suliariumannittussarsiuussinissami atorneqartussaavoq. Taamaaliornikkut suliassamut aningaasartuutissat killissinnaasat sinnerlugit aningaasartuutigineqassanngillat.

Ingerlatsinerup aallartinnissaata nalaa akiitsunik aningaasartuuteqarfiungaatsiartussaavoq, siusissukkut akilersuilernissaq suliassamut ikorfartuutaassaaq, selskabit atuinermut akiliuteqartinneqartalissammata piffissap ingerlanerani qaffakkiartuaartussamik, aallaqqaamulli akiitsunik akilersuinerup aallartinnerata nalaani akiliut appasitsinneqassalluni.
Atuinermut akiliutip annertussusissaa ilusissaalu suliariumannittussarsiuussinermi unammilleqatigiinnermi uuttuutinut atorniarneqarpoq.

Aktiat iluanaaruteqarfissariteriikkat atorlugit piginneqataaneq

Kalaallit Nunaanni Namminersorlutik Oqartussat aammaattaaq ikinnerussuteqartutut peqataaffiginiarpaat aktiat iluanaaruteqarfissariteriikkat atorlugit piginneqataanissartik, aningaasaliissuteqanngikkaluarlutik. Taamatut periaaseqarnissaq aaqqissuunneqassaaq ilaatigut aningaasatigut pisinnaatitaaffilerneqarnikkut, procentimik aalajangersimasumik aningaasaliissuteqarnissamik piumasaqaateqarfiunngitsumik. Periaaseq ilusilersorneqassaaq suliassap akilersinnaassusia illersorlugu, aningaasaliisut aktiap iluanaaruteqarfissariteriikkap qaffasissusissaanik aalajangiinerisigut kiisalu iluanaarutinik akileeqqaarnissap piumasarineqarneratigut. Periaaseq aaqqissuunneqarsinnaavoq qaffakkiartuaartitsinikkut, Namminersorlutik Oqartussat piginneqataassutaata nalinga piffissap ingerlanerani qaffakkiartuaartillugu, suliassamut akiitsunit akilersukkat ikiliartuaarnerat ilutigalugu pisussamik. Kalaallit Nunaanni Namminersorlutik Oqartussat suliassaq annaasaqaateqarfiussappat aningaasatigut akisussaasuussanngillat, aningaasaliissuteqannginnamik taamaammallu aamma taasisinnaatitaanissaq naatsorsuutigineqassanngilaq. Tamatuma qulakkiissavaa suliassamut nakkutilliisuunissap aningaasaliissuteqartuniiginnarnissaa taamatullu aalajangiisarnerit aningaasarsiornermut tunngasuunissaat piuminarnerusumillu ingerlasarnissaat siunnerfiullutik.

Aktiap iluanaaruteqarfissariteriikkap piginneqataassutaanerata annertussusia, taassumalu aningaasanngorlugu annertussusissaa iluanaarutissatullu piumasaatissat suliariumannittussarsiuunnermi unammilleqatigiissutaanissaat siunniunneqarput.

Government take-modelimik atuinissap aalajangiunnerani Naalakkersuisut anguniarpaat aningaasaleerusuttunik neqerooruteqartoqarnissaa, nalornissutaasinnaasut pillugit erseqqissunik avitseqatigiinnissaq pisortallu akiliutissaasa qanoq ittuunissaannik siumut takutitsereernissaq kiisalu aningaasaqarnerup eqaatsumik aaqqiissuussaaneranik takutitsinissaq, ilutigisaanillu ungasinnerusoq isigalugu nunami erngup nukinganit nukissiornermi periarfissat ilisimaneqartut annerpaat inuiaqatigiinnut iluanaarutaalernissaasa qulakkeerneqarnissaat.

Periaatsip siunertaraa ineriartortitsisinnaasunik misilittagaqareersunik kiisalu ungasinnerusoq isigalugu erngup nukinganit nukissiorfiliornissamut aningaasaliisinnaassuseqartunik pilerisutsitsilernissaq ingerlatsisinnaalernissarlu.

Paasissutissanik sukumiinerusunik pisariaqartitsiguit naalakkersuisumut allatsi Jeanette L. Petersen attavigisinnaavat, jalp@nanoq.gl -mut allaffigalugu, sianerfigaluguluunniit.: 34 52 06-imut.