2026-mi qilalugartassat

Naalakkersuisut ulloq decembarip 18-iat 2025 ataatsimiinnerminni 2026-mut qilalugartassat aalajangerpaat. 

Piniartut atuisullu ilisimasaat, Piniarneq pillugu Siunnersuisoqatigiit ilaasortaanit kommuninillu tusarniaaneq kiisalu Qilalukkanut Ataatsimoorussanut Ataatsimiititaliami (JCNB) 2019-imi aamma NAMMCO-mi 2019-2022-mi inassuteqaatit tunuliaqutigalugit Naalakkersuisut 2026-mi qaqortartassat qernertartassallu aalajangerpaat.

2026-mi pisassiissutit pillugit tamanut ammasumik tusarniaaneq 22. oktober – 19. november 2025-mi ingerlanneqartoq innersuutigineqarpoq.

Qilalukkat qaqortat
Kalaallit Nunaata Kitaani 2026-mut qaqortanik qilalugartassat katillugit 289-iussasut aalajangerneqarpoq. Kiisalu Tunumi teknikkikkut pisassiissutit  ukiuni 2022-2027 tamakkerlugit 30-it ingerlaqqiinnassasoq, 2022-2025-imi pisarineqareersut ilanngaatigalugit.

Kalaallit Nunaata Kitaanut pisassiissutit, nunap ilaani immikkoortortanut 3-miit 5-imut (Qimusseriarsuarmiit Qeqertarsuup Tunuanut) tunngasut, sunngiffimmi inuussutissarsiutigalugulu piniartunut atuuttunik piniarnermut allagartalinnut akuersissutilinnullu ammaanneqarput. Tamanna isumaqarpoq Naalakkersuisut Namminersorlutik Oqartussat qaqortat qernertallu illersorneqarnissaat piniarneqarnissaallu pillugu nalunaarummi nr. 3, 27. januar 2017-imeersumi § 9, imm. 3-miit qaqortat akuersissutilinnut paggatassiissutigineqarneranut atatillugu immikkut akuersissuteqartut.
Taamatuttaaq “Kitaani qaqortaqatigiit”-nut tunngatillugu sunngiffimmi allagartalinnut pisassiissutit 10%-iata tungaanut immikkoortitsisinnaaneq pillugu malittarisassaq Naalakkersuisut immikkut akueralugu atorunnaarsippaat.

Kalaallit Nunaata Kitaanut pisassiissutinik ammaaneq aqutsiveqarfimmut Qaanaamut atuutsinneqanngilaq, tassa ilisimatuussutsikkut inassuteqarneq kiisalu Qaanaamut pisassiissutinut aalajangiineq ukiumut 37-ummata immikkoorlutillu. Ukioq mannali sippuisoqarsimanera pissutaalluni qaqortanik sippuinerit 21-t ukiunut 2026-2030-mut pisassiissutit agguataarlugit ilanngaatigineqarput, pisassallu 24-mut inissipput. Pisassat agguaanneqarnerat tabel 1a-mi takuuk.

Takussutissiaq 1a: Kitaani qilalukkanik qaqortanik 2026-mut pisassiissutissat 

* Sinniisimanermut tunngasut nalimmassaqqinneqassapput, 2025-mi piniarneq suli ingerlammat.

Takussutissiaq 1b: Qaanaamut eqqaanilu nunaqarfinnut 2026-mut qilalukkanut qaqortanut pisassiissutit

Tunu
Tunumi ukiuni 2022-2027 qilalukkanut qaqortanut teknikkikkut pisassiissutit katillugit 30-it allanngortinnagu attatiinnarneqassasut, taamaallaat 2022-2025-mi 23-t pisarineqareersut ilanngaatigalugit, tassa 7-t 2026-2027-mut sinnerupput.

Takussutissiaq 1c: Tunumi 2023-2027-mut qilalukkanut qaqortanut pisassiissutit– pisat ilanngullugit nalimmassarneqarsimasut

Qilalukkat qernertat
Kalaallit Nunaata Kitaani 2026-mut qernertanik qilalugartassat katillugit 450-iussasut aalajangerneqarpoq. Kiisalu Tunumi neqissaqarniarneq immikkut eqqarsaatigalugu pisassiissutit 2026-mi 41-ssasut aalajangiunneqarluni.

Aammaarluni aqutsiveqarfinni qilalukkanik qernertanik 50-init ikinnerusunik pisassiissuteqarfiusuni qernertartassat paggatassiissutigalugit piniarnerup atorunnaarsinneqarnissaa aalajangerneqarpoq, tassami amerlasuunik pisassiissutillit pisassalinnut ikinnerusunut sanilliullugit pitsaanerusumik sivisunermillu nakkutigineqarsinnaasarmata, ikinnerusunimmi pisassaqartoqarnerani piniarnermi ataatsimi pisaqarpallaarneq nalaanneqarsinnaammat.
Tamanna aamma aqutsiveqarfimmut Upernavik-mut atuuppoq, tassanimi pisassiinerit sumiiffimmi inoqarfinnut tamanut agguaanneqassammata. Tassa imaappoq; qilalukkanik qernertanik pisassiinerit paggatassiissutigalugit piniarneq taamaallaat Qaanaami Uummannamilu ingerlanneqarsinnaapput (taamaattorli piniarnermut allagartaq aamma akuersissut atuuttoq suli piumasaqaataavoq).

Takussutissiaq 2a: Kitaani qilalukkanik qernertanik 2026-mut pisassiissutissat. Etah-mut carry over ilanngutereerpoq.

* = Aqutsiveqarfik Upernavimmut eqqaanilu nunaqarfinnut pisassiissutit agguataarneri, takuuk takussutissiaq 2b-mi.
** = Aqutsiveqarfik Qaanaamut eqqaanilu nunaqarfinnut pisassiissutit agguataarneri, takuuk takussutissiaq 2c-mi.
*** = Qaannamik pisassat.
****= Carry over suli naatsorsorneqanngilaq, 2025-mi piniarneq suli ingerlammat.

Takussutissiaq 2b: Upernavimmut nunaqarfiinullu 2026-mut pisassiissutit agguataarnerat aalajangigaq.

Tabel 2c: Qaanaami nunaqarfiinilu qilalukkanik qernertanik pisassiissutit agguataarnerat

Tunu
Ittoqqortoormiinut qernertanik pisassat 17-inut inissinneqarput, Kangerlussuarmut qernertat 16-it, kiisalu Tasiilap eqqaani qernertat 8-t, taamaalillutillu Tunu tamakkerlugu 2026-mut pisassat ataatsimut amerlassusiat 41-pput. Tunumi neqissaqarniarneq eqqarsaatigalugu pisassiissutit aalajangerneqarput.

Takussutissiaq 3: Tunumut qilalukkat qernertat pillugit 2026-mut pisassiissutissat

Pisarinngitsuukkanik nuussineq
Ukiumi qaangiuttumi pisassiissutiniit sippuisimanerit (2025) aqutsiveqarfinni pineqartuni 2026-mut pisassiissutit agguaanneqartinnagit ilanngaatigineqassapput. 

2017-imi qaqortanut qernertanullu nalunaarut naapertorlugu pisassiissutit atorneqarsimanngitsut nuunneqarsinnaapput (periuseq amerliartuutaanngitsoq malinneqassaaq), aammalu sinniilluni pisaasimasut ukiup tulliani ilanngaatigineqarlutik.

Sukumiinerusumik paasisaqarusukkaanni immiikkoortortami pisortaq Amalie A. Jessen, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: amalie@nanoq.gl