Atuartiguk2025-mi suliniutinut aningaasaliissutit 2 millioner kr.-it sinnerlugit agguaanneqarsimapput
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
2025-p ingerlanerani Tunumi aalisartunut 37-nut Kujataanilu aalisartunut marlunnut 2.192.000 kr.-t sinnerlugit suliniutinut aalisarnermilu atortunut atugassat Aalisarnermut, Piniarnermut, Nunalerinermut Imminullu Pilersornermut Naalakkersuisup agguaappai. Tunup ineriartortinnissaanut pilersaarut 2024-2030 naapertorlugu suliniutinut konto 50.01.20-mut, 2025-imi Tunup ineriartortinnissaanut Inatsisartut 2 mio. kr.-inik aningaasaliinikuupput. Taakku saniatigut Kalaallit Nunaata sinnerani suliniutinut 194.000 kr.-iusimapput. Aningaasanut inatsit naapertorlugu kontomit atorneqarsinnaasut iluinit, suliniutinut aningaasanik Naalakkersuisoq agguaassisinnaavoq.
Apriilip qaammataani Tasiilami aalisarneq pillugu isumasioqatigiinnerup ingerlannissaanut, motorilerinermut pikkorissarnermut, paasititsiniaanermut kiisalu aalisarnermi atortunut, soorlu aalisaatit isumamineersumik amoortartunut, ningittakkanut, ningittakkanik amuffatinut, aalisakkanut kar-inut, pullatinut atortunullu assingusunut, 2025-mi Naalakkersuisoq aningaasanik agguaassivoq.
Tunumi aalisarnerup inerisarnissaanut konto 50.01.20 aqqutigalugu 2 mio. kr.-inik, Kalaallit Nunaatalu sinneranut 144.000 kr.-inik 2026-mi aningaasanut inatsimmi Inatsisartut aammaarlutik aningaasaliissuteqarput. Taamaammat Tunumi aalisarnerup ineriartortinnissaanut aningaasanik qinnuteqartoqarnissaanut kaammattuisoqarpoq, assersuutigalugu aalisarnermut atortunut, pikkorissarnernut, suliaqaatigaluni pikkorissaanernut, misileraalluni aalisarnernut imaluunniit aalisarnerup ineriartortinnissaanut tapersiissuteqarsinnaasunut pisarialinnut allanut kiisalu Ineriartortitsinermi pilersaarummi suliniutinut.
Siunissaq ungasinnerusoq isigalugu Tunumi sinerissap qanittuani aalisarnermik ineriartortitsisoqarnissaa Naalakkersuisut anguniarpaat. Aalisarnermik ineriartortitsineq siuarsarneqassaaq, Tunumi aalisartut imminnut pilersorsinnaanerulersikkumallugit minnerunngitsumillu Tunumi suliffissaqartitsinerulerumalluni.
Qinnuteqarnermi suleriusissaq imaluunniit aningaasat sumut atorneqartussatut qinnutigineqarsinnaanerat pillugit apeqqutissaqaraanni Aalisarnermut, Piniarnermut, Nunalerinermut Imminullu pilersornermut Naalakkersuisoqarfik attaveqarfigineqarsinnaavoq uunga apn@nanoq.gl. Tunumi nunaqarfiit allaffiini tamarmiusuni qinnuteqarnissamut immersuiffik pissarsiarineqarsinnaavoq. Qinnuteqarnermut immersuiffik aamma uani takusinnaavat una toorlugu.
Ineriartortitsinissamut pilersaarut soqutiginnittunit uani atuarneqarsinnaavoq: Tunumi aalisarnerup ineriartortinneqarnissaanut pilersaarut 2024-2030 (naalakkersuisut.gl).
Paasissutissanik annertunerusunik pisariaqartitsiguit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik attavigiuk apn@nanoq.gl.