AtuartigukKalaallit Nunaata kitaani raajarniarluni aalisarneq pillugu aqutsinissamutpilersaarut nutartigaq akuersissutigineqarpoq
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Assi: Royal Greenland
Kalaallit Nunaata kitaani raajarniarluni aalisarneq pillugu aqutsinissamut pilersaarut ulloq 3. oktober 2025-mi Naalakkersuisut akuersissutigaat. Taanna 1. januar 2026-miit atuutilissaaq.
Kalaallit Nunaata kitaani raajarniarluni aalisarneq pillugu aqutsinissamut pilersaarut 2025-p naanerani atorunnaassaaq, taamaattumillu nutarterneqarluni. Aqutsinissamik pilersaarut nutaaq, nutaanngitsumut sanilliullugu allannguutinik arlalinnik imaqarpoq. Ilisimatuussutsikkut siunnersuineq pillugu immikkoortumut ilanngussisoqarnikuuvoq, immikkoortut sanilliussiffiusut nassuiarneqarsimallutik. Tamatuma saniatigut pisarineqarsinnaasut tamarmiusut aalajangersarneqartarnerat pillugu immikkoortumi allannguinerit pisimapput, taakkunani pisarineqarsinnaasunut tamarmiusunut sunniuteqarsinnaasut pissutsit suunersut nassuiaateqarfigineqarlutik. Matumani aamma aalisagaqatigiit amerlassutsimikkut killiffik aalajangersimasoq ataappassuk, Kalaallit Nunaata Canada isumasiortassagaa ilanngunneqarpoq. Aalisagaqatigiit Kalaallit Nunaata Canadallu akornanni avinneqartarput, tassa aalisagaqatigiit ilamininngui Canada-p imartaaniimmata. Taamatuttaaq aalisarnermi raajat mikisut pisarineqartartut ikinnerpaatinnissaat pillugu aqutsinermi suliniut pillugu immikkoortoq ilanngunneqarnikuuvoq.
Kalaallit Nunaata kitaani raajarniarluni aalisarneq, piujuartitsinermut uppernarsaammik Marine Stewardship Council-imit (MSC) tunineqarnikuuvoq, aalisarnermullu aqutsinissamut pilersaarut uppernarsaatip pigiinnarnissaanut tapersiisarpoq.
Aqutsinissamut pilersaarut Aalisarnermut siunnersuisoqatigiinnit ilaasortaqartumit suleqatigiissitamit suliarineqarnikuuvoq, matumunnga ilaapput, Sulisitsisut, KNAPK, QAK, NUSUKA, Sustainable Fisheries Greenland, Royal Greenland A/S, Polar Seafood Greenland A/S, Oceans North Kalaallit Nunaat, Aningaasaqarnermut Akileraartarnermullu Naalakkersuisoqarfik, Pinngortitamut Avatangiisinullu Naalakkersuisoqarfik, KANUAPNA aamma Pinngortitaleriffik. Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik immikkoortortaavoq ataqatigiissaarisuunikuusoq.
Aqutsinissamut pilersaarut takuneqarsinnaavoq uani Aqutsinissamut pilersaarutit (naalakkersuisut.gl)
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl