Soraarnerussutisiaqarnermik aaqqissuusseqqinnermut immikkut ilisimasallit

Naalakkersuisut eqimattanik immikkut ilisimasalinnik soraarnerussutisiaqarnermik aaqqissuusseqqinnermut kaammattuuteqartussanik pilersitsipput. Immikkut ilisimasallit soraarnerussutisiaqarnermut aaqqissuussat pillugit annertuumik ilisimasaqartunik inuttaligaapput, soraarnerussutisiaqarneq tamaat akimorlugu ataatsimoortumik aaqqissuusseqqinnissamut ilusiliinissamik peqquneqartut. Kaammattuutit 2026-mi decembarip qaammataani saqqummiunneqassapput.

Naalakkersuisut aalajangerput eqimattanik immikkut ilisimasalinnik inuttaqartumik arlaannaanulluunniit attuumassuteqanngitsumik pilersitsisoqassasoq, soraarnerussutisiaqarnermik aaqqissuusseqqinnissamut kaammattuutinik suliaqarnissaat siunertaalluni. Immikkut ilisimasallit soraarnerussutisiaqarnermik aaqqissuusseqqinnissamut kaammattuutinik suliaqarnissaat siunertaavoq. Immikkut ilisimasallit soraarnerussutisiaqarnermik aaqqissuusseqqinnermut ilusiliinissamut tigussaasumik siunnersuusiussapput, aningaasaqarnikkut kingunerisassaanik naatsorsuinernik imaqartussaq, kiisalu innuttaasut ataasiakkaat isiginninnerannik ilanngussisussaq. Kaammaattuuteqarnerit tunngavigalugit Naalakkersuisut tamatuma kingorna naalakkersuinikkut siammasissumik siunissamut ungasinnerusumut sammisumik isumaqatigiissusiorsinnaalissapput.

”Naalakkersuisut eqimattat immikkut ilisimasallit soraarnerussutisiaqarnermik aaqqissuusseqqinnissamut kaammattuuteqartussanik saqqummiussisinnaanertik nuannaarutigaat. Soraarnerussutisiaqarnermik aaqqissuusseqqinneq inuiaqatigiinni allannguinerussaaq annertuumik malunnaateqartussaq. Taamaattumik aaqqissuusseqqinnerup eqimattat immikkut ilisimasallit arlaannaanulluunniit attuumassuteqanngitsut kaammattuutaannik aallaaveqarnissaa pingaaruteqarpoq. Eqimattat immikkut ilisimasallit aningaasaqarnermut inuiaqatigiinnilu pissutsinut paasisimasalinnik inuttaligaavoq.” Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisoq, Aqqaluaq B. Egede, oqaaseqarpoq.

Múte B. Egede, Aningaasaqarnermut Akileraartarnermullu Naalakkersuisoq itisiliivoq: ”Naalakkersuisut siunertaqarput, aningaasaqarnikkut politikkimik akisussaassuseqarlutik ingerlatsiniarlutik, nunatsinnut siunissami aningaasaqarnikkut toqqammaviliinissamik qulakkeerisussaq. Soraarnerussutisiaqarneq tamaat aallaavigalugu soraarnerussutisiaqarnermik aaqqissuusseqqinnermik suliaqarnissarput pingaaruteqarpoq – utoqqalinersiat kisiisa pinnagit. Pingaaruteqarpoq aaqqissuussaq ataatsimoortoq isigineqarnissaa. Utoqqaat amerliartortussaapput, soraarnerussutisiaqarnermut suliassaqarfimmut aningaasartuutit assinganik qaffattussaallutik. Taamaattumik soraarnerussutisiaqarnermik aaqqissuusseqqinnerup siunissami aamma aningaasaqarnerput patajaatsuunissaa qulakkeerpagu pingaaruteqarpoq, taamaalilluta atugarissaarnermut suliassaqarfimmi allani sipaaruteqarnissarput pisariaarullugu utoqqaallu ataqqinartumik utoqqalisinnaallutik.”

”Naalakkersuisut upperivaat, maannakkumut siunissamilu aningaasaqarnikkut inuiaqatigiillu inissisimanerat aallaavigalugu, immikkut ilisimasallit atorsinnaasunik arlalinnik kaammattuuteqassasut. Kaammattuutit piareerpata Naalakkersuisut soraarnerussutisiaqarnermik aaqqissuusseqqinneq ataatsimoortoq pillugu naalakkersuinikkut siammasissumik isumaqatigiissusiussapput.” Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisoq, Aqqaluaq B. Egede, naggasiivoq.

Immikkut ilisimasallit imatut inuttalerneqassapput:

Svend Erik Hougaard, soraarnerussutisiaqarnermik professori ilisimatoorlu
Jon Kvist, soraarnerussutisiaqarnermik professori ilisimatoorlu kiisalu aaqqissuusseqqinnernik allanik misilittagalik
Maliina Abelsen, siusinn. Naalakkersuisoq siulersuisunilu ilaasortaq
Peter Munch Eriksen, Qeqqata Kommuniani aningaasaqarnermut pisortaq
Ulla Lynge, CSR Grønland-imi pisortaq.

Immikkut ilisimasallit saniatigut soqutigisaqaqatigiit peqataanissaannut qaaqquneqarput. Immikkut ilisimasallit aaqqissuusseqqinnissamut sammisat attuumassuteqartut pillugit siunersioqatigiinnissaq siunertaralugu soqutigisaqaqatigiit atorsinnaavaat. Soqutigisaqaqatigiit peqataatinnissaat piumasaqaataanngilaq, kaammattuutigineqassaarli soqutigisaqaqatigiit tusarniarneqassasut isiginninnermillu isumaat aamma inaarutaasumik kaammattuuteqarnerni ilaatinneqarlutik. Soqutigisaqaqatigiit siunnersuisinnaapput aalajangiisinnaanatilli.

SISA
Sulisitsisut
KNAPK
Utoqqaat pillugit Oqaaseqartartoq
SIK – Sulinermik Inuussutissarsiuteqartut Kattuffiat
IMAK – Ilinniartitsisut kattuffiat
Peqqissaasut Kattuffiat (PK)
Kalaallit Nunaanni Ilinniagartuut Kattuffiat (ASG)
Atorfillit Kattuffiat (AK) imaluunniit assigisaanit tjenestemandinut soraarnerussutisianik aallartitaq
Kommuneqarfik Sermersooq
Kommune Kujalleq
Qeqqata Kommunia
Avannaata Kommunia
Kommune Qeqertalik
Kalaallit Pensionisteqartut Kattuffiat
Utoqqaat Siunnersuisoqatigiit / utoqqaat peqatigiiffiiniit aallartitat
GrønlandsBANKEN
Naatsorsueqqissaartarfik, allattoqarfimmit suleqataasussaq
Aningaasaqarnermut Akileraartarnermullu Naalakkersuisoqarfik
Isumaginninnermut, Suliffeqarnermut Nunamullu Namminermut Naalakkersuisoqarfik
Akileraartarnermut Aqutsisoqarfik
Aningaasaqarnermut Siunnersuisoqatigiit (suliamut tunngatillugu siunersioqataasussaq)

Suliaqarnermut tunngaviit sinaakkutillu
Naalakkersuisut aalajangerput, immikkut ilisimasallit soraarnerussutisiaqarnermik aaqqissuusseqqinnissamut tunngaviit pingaarnertullu siunnerfiit tulliuttut aallaavigissagaat. Tunngaviit naalakkersuisoqatigiinnermik isumaqatigiissummi, Attassiinnarnissamut Ineriartortitsinissamullu pilersaarut II-mi aamma 2026-mut aningaasanut inatsimmut isumaqatigiissummi anguniakkat pingaaruteqartut pillugit tapersersuipput. Ilanngullugu immikkut ilisimasallit Naalakkersuisut matumunnga allannguutissatut siunnersuutaat, Inatsisartut ukiakkut ataatsimiinneranni naammasseqqammersumi siullermeerneqartoq, nangillugu soraarnerussutisiaqarnermik ileqqaagaqarnissamut peqataasussaatitaaneq pillugu inatsimmik iluarsaassinissamut naatsorsuutigineqartumut malitseqartitsinissaat piumasaqaataavoq. Tunngaviit immikkut ilisimasallit sulinerannut sinaakkusiissapput. Taamaalilluni immikkut ilisimasallit tunngavinnut akerliusumik kaammattuutinik suliaqannginnissaat naatsorsuutaavoq.

Utoqqalinersiat annertuumik ajorseriarnissaat pinngitsoortinneqassaaq
Soraarnerussutisiaqarnermik aaqqissuusseqqinneq utoqqalinersiat annertussusaannik attassiinnarnissamut taamaalillunilu aningaasarsiakitsunut imaluunniit innuttaasunut atugarliortunut aningaasat namminneq atorsinnaasaannut tapertaassaaq, naak utoqqaat amerleriartussaagaluartut.
Utoqqalinersiat aningaasarsiakinnerpaanut pingaarnertut sammitinneqassapput
Utoqqalinersiat innuttaasunut pisortanit utoqqalinersianik pisariaqartitsivittunut suli pilersuinermut pingaarnertut tunngaviussapput. Aningaasarsiaqatigiiaanut allanut pisortanit utoqqalinersianik aningaasaliiffigineqartunik utoqqalinersianut aningaasaqarnikkut tunngaviussapput, peqatigalugu sapinngisamik assigiinngitsutigut ileqqaagaqarnikkut nammineq soraarnerussutisianik tunniussinerit allat ilassutigalugit.
Soraarnerussutisianik annertunerusumik nammineq ileqqaagaqarneq siunnerfiussaaq
Utoqqalinersiat tassaassapput soraarninngornerup kingorna pingaarnertut innuttaasunut aningaasarsiakinnerpaanut tunngaviusumik aningaasaqarnikkut isumannaarinermik qulakkeerisut. Aningaasarsiakinnerpaanut utoqqalinersianik isumaginninnikkut annertunerusumik siunnerfeqarnerup piumasaqaatigaa, qaffasinnerusumik aningaasarsiallit namminneq soraarnerussutisianik ileqqaagaqarnertik ataatsimoortumik aaqqiissutit aqqutigalugit annertusissagaat.
Sulinissaq suli pilerinartuussaaq
Utoqqaat soraarninngorneq angullugu ukioqalersut suliffeqarnermi nangitsinissamut nukissallit tamanna pillugu pillarneqassanngillat. Kajumissaarineq pitsaanerusariaqarpoq, innuttaasut utoqqalinersiaqalernissamut ukiorititat nalaanni ukioqartut (imaluunniit qaangerlugit) suliffeqarnermut suli ilaanissamut kissaateqarsinnaaqqullugit. Tassunga innuttaasut namminneq piumassutsiminnik piginnaasaminnillu inuunermi utoqqalillutik sulerusuttut tunngavigineqassaaq, kisianni aamma inatsisilerinermi aningaasaqarnikkut kajumissaarutit ilaatinnerisigut aamma soorlu suliffeqarfiit isumaqatigiissutillu qanoq annertutigisumik tamatumunnga pilerisaarinersut ilaatinneqassallutik.
Innuttaasunut pisariitsoq paasiuminartorlu pisortanullu aqukkuminartoq
Ilusiliinerup nutaap utoqqalinersiallit namminneq aningaasaqarnerminnut annertunerusumik ataatsimut isiginnilersittariaqarpai aamma paasiuminartumik aqukkuminartumillu aaqqissuussamik pilersitsinerusariaqarluni. Ilusiliinermik innuttaasunut soraarnerussutisiat, ikiorsiissutit assigisaaluunniit pillugit annerusumik ilisimasaqanngikkaluartunut paasiuminartumik pilersitsisoqassaaq.
Soraarnerussutisiaqarnermik aaqqissuussaq patajaatsoq
Tamatuma saniatigut utoqqalinersianut iluseq nutaaq inuiaqatigiinni aningaasaqarnikkut unammilligassanut siumullu naatsorsuinernut atatillugu patajaatsuussaaq. Soraarnerussutisiaqarnermik aaqqissuussap piffissap ingerlanerani aningaasaqarnikkut, innuttaasut agguataarnerannut naalakkersuinikkullu ingerlatsinermi unammilligassanut assigiinngitsunut akiuussinnaasariaqarpoq naleqqussarlunilu. Soraarnerussutisiaqarnermik aaqqissuussaq patajaatsoq ima ilusiligaassaaq innuttaasut soraarninngornerup kingorna naleqquttumik, inuiaqatigiinni aningaasaqarnikkulluunniit allannguisoqaraluarpat, inuuniarnerisa attanneqarsinnaanissaat qulakkeerlugu.

Attaveqarfissaq
Paasissutissat erseqqinnerusut pillugit naalakkersuisup allattaa Lars-Salik Henningsen email LSHK@nanoq.gl oqarasuaatilluunniit normua +299 34 54 45 atorlugu attaveqarfigisinnaavat.