AtuartigukNaalagaaffiit Peqatigiit Innarluutilinnut ulluat 3. decembari
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Naalagaaffiit Peqatigiit nunat tamalaat akornanni inuit innarluutillit ulluat 1992-imi pilersippaat, tassani innarluutillit pillugit apeqqutit, paasinninnermik siuarsaanissaq aamma nunarsuaq tamakkerlugu inunnut piginnaasakittunut pisinnaatitaaffiinik pitsaanerusunik atugaqarnissaannik suliniuteqarnissaq siunertarineqarpoq.
Nunarsuarmi inuit 16%-t missaanniittut innarluuteqartuusut Naalagaaffiit Peqatigiit paasissutissiipput. Paasissutissat ilai assigiinngisitaartoqartoq takutippaat: Inuit innarluutillit innarluuteqanngitsumut naleqqiullugit ukiut 20-t tikillugit siusinnerusumik toqusarput. Inuit innarluutillit marloriaammik amerlanersumik nanertisimanermik, astmaqarnermik, sukkortuunermik, qaratsakkut aanaartoornermik, pualavallaarnermik imaluunniit qarngikkut peqqiitsuunermik aarlerinaateqarsinnaapput. Peqqinnermut tunngatillugu naligiinngittoqarnera inuit innarluutillit pillugit pissutsit eqqortuunngitsut pissutigalugit pivoq, taasunga ilanngullugit pissusilersorneq, immikkoortitsineq, piitsuuneq, ilinniagaqannginnermit suliffeqarnermillu ilanngunneqannginneq kiisalu peqqinnissaqarfimmi naapittarnermi akornutit
Kalaallit innuttaasut 16%-i tassaapput inuit innarluutillit 8.800 missaat. Innuttaasut amerlasuut pisinnaatitaaffitik ataqqineqarnissaat aammalu inuiaqatigiinni naligiimmik atugassallu pitsaanerusunik pisariaqartitsipput.
”Naalakkersuisoqatigiinnissamut isumaqatigiissummi innarluutilinnut suliassaqarfimmi paasinartumik qitiusumik takorluugaqarpugut:
Inuiaqatigiittut inuit innarluutillit aporfissaat isigiinnarnagu qanoq tunniussaqarsinnaanersut, qiviassagipput pingaaruteqarpoq. Inuit tamarmik, pisinnaasakinnerulersimaneq apeqqutaatinnagu, naleqassutsimik isumalluarnartumillu inuuneqarnissaminnut pisinnaatitaaffeqarput. Taamaattumik Naalakkersuisooqatigiit aaqqissuusseqqinnermik suliat suliarilluassavaat, tassani iluarsiinerit ataasiakkaanut tulluarsakkat tunngaviupput. Ilaatigut Tilioq, borgmesterit suliassaqarfinnilu sinniisut aamma innarluutillit peqatigiiffii qanimut oqaloqatigalugit nutarterinermik suliap piviusunngortinnissaa pitsanngorsarnissaalu kissaatigaarput. Pitsaanerusumik atugaqarnissaq, innarluutilinnut inissat pitsaanerusut, aamma sulinissamut periarfissaviusut aaqqissuussat pitsaasut aqqutigalugit qulaajartussaavavut - tassami ilaatinneqarnissamut iliuuseqartoqarnissaa pisariaqarpoq. Paaqqinnittarfiit nukittorsarniarpavut aamma sulisut pisariaqartumik ilisimasassat aamma immikkut ilisimasassat pitsaasumik ilinniarsimasunit neqerooruteqarnissaq nukittorsarneqassapput.
Innarluutillit pillugit isumaqatigiissummi naleqartitat: tusaaneqarnissamut, paasisaqarnissamik, attaveqarnissamik ilaanissamillu pisinnaatitaaffiit pingaartikkivut takuneqarsinnaavoq, tassanilu ulluni kingullerni tusilartunut isumasioqatigiissitsineq assersuutigineqarsinnaavoq.
Nunarput inuiaqatigiinnut tamanut ammanerusumut, paasinnittaaseqarluartumut siammasissinnaasumullu ingerlavoq, oqaasiinnaanngitsukkut iliuutsikkulli” Peqqissutsimut inunnullu Innarluutilinnut Naalakkersuisoq, Anna Wangenheim oqarpoq.
Annertunerusumik paasisaqarnerorusukkuit naalakkersuisup allattaanut Nivé Lynge Biilmannimut, e-mail: nilb@nanoq.gl-mut imaluunnit Peqqissutsimut inunnullu Innarluutilinnut Naalakkersuisoqarfimmut, E-mail: pn@nanoq.gl, oqarasuaat +299 34 50 00 saaffiginnittoqarsinnaavoq.