AtuartigukNaalakkersuisoq NAKUUSA-mut: Tusarnaarpunga iliuuseqarlungalu
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Ataasinngornerup ualigaa Meeqqanut, Inuusuttunut Ilaqutariinnullu Naalakkersuisoq NAKUUSAp aalajangersagaliaanik tigusivoq, taakkunani ilaatigut imigassap toqqissisimatitsisannginneranik, ataatsimoorfinnillu pitsaasunik toqqissisimanartunillu, meeqqat tamarmik inissaqarfigisaannik, kissaateqarnermik oqaasinnguisoqarpoq.
Asasagut nunatsinni meeqqat tamassi
Ilissinnut suut pingaaruteqarnersut ersarilluinnarpoq, tassaappullu namminiussuseqarnissamik inissaqartitsisumik imigassartorfiunngitsunik avatangiisinik toqqissisimanartunik isumassuilluartunillu pilersitsinissaq, kikkullu tamarmik toqqissisimallutik tikilluaqqusaallutillu misigisimaffigisinnaasaminnik sunngiffimmi sammisassaqartitsiveqarnissamik periarfissaqassasoq.
Ilissinnut Naalakkersuisutut pingaarnerpaatut suliassaraara tusarnaarnissarsi, pimoorullusi tigunissarsi sumiiffissinnilu naapinnissarsi. Nunatsinni inersimasut tamarmik meeqqat nipaannik tusarnaartarnissaat pingaaruteqarlunilu pisariaqarpoq.
Aalajangersagaliassinni ersarissorujuuvoq: Avatangiisinik toqqissisimanartunik imigassartorfiunngitsunik kissaateqarpusi. Nipissi tusaatinnissaat pingaaruteqassasoq kissaatigaarsi, aamma meeraaneq peroriartornerlu peqqinnartoq, toqqissisimanartoq aalajaatsorlu kissaatigaarsi.
Aalajangersagaliassinni pissutsit taakkartukkassi ataatsimoortinnerisigut aaqqissuusaasumik pinaveersaartitsinertut ilusinippoq, tamannalu tunaartaralugu uanga Naalakkersuisutut sulissutigaara. Aaqqissuussaasumilli pinaveersaartitsineq kisimiillunga kivissinnaanngilara. Pisariaqarpoq aalajangiisartutut ataatsimuussalluta. Sapernata nutaamik eqqarsarsinnaassasugut, sapernata aalajangeruminaatsunik toqqaasinnaassasugut toqqakkatsinnillu piviusunngortitsissasugut.
Aalajangersagaliassinni uagutsinnut takutitsivusi iliuuserineqartussat suunersut nalunngereerisi. Ilissi maligassiuisoralusi matumuuna nunatsinni inersimasut tamarmik aalajangersagaliaq atuassagaat kaammattuutigerusuppara, taamaaliornikkut tamarmik immikkut oqaatsisi piviusunngortillugit nuna tamakkerlugu ulluinnarsiutaalernissaannut ikiuussinnaammata.
Oqaloreerpusi. Takuassi. Malugaassi. Tusaavassi.
Taamaattumik: Qujanaq oqaatsissinnut, eqqarsaatissinnut aamma qujanaq sapiissuseqarnissinnut.
Mads Pedersen
UNICEF-mut qujarujussuarpunga meeqqat attaveqatigiiffissaannik tunniussimmat, tassanilu aaliangiisartuniit tusaaneqartarmata.
Attavissaq Sukumiisumik paasisaqarusukkuit naalakkersuisup allattaa Eqaluk Høegh e-mailikkut eqho@nanoq.gl imaluunniit oqarasuaatikkut: +299 34 50 00 attavigiuk.