ETM-ip Naalakkersuisunut saassussinera isasoorpoq

Greenland Minerals A/S-ip Kalaallit Nunaanni nunap iluanut piiaanissamut akuersissummik piumasaqarluni suliakkiissuteqarneranut atatillugu Namminersorlutik Oqartussat Københavnip eqqartuussiviani eqqartuussivilersuunneqarsinnaanngitsut, Københavnimi Byret ataasinngornermi ulloq 10. november eqqartuussivimmi aalajangerpoq.

Isumaqatigiissitsiniarnermut eqqartuussiviup ulloq 28. oktober 2025 qulequtaq taanna pillugu Greenland Minerals-ip suliakkiissuteqarnerata suliarinissaanik itigartitsinerata kinguninngua Københavnimi Byret-imi aalajangiineq pivoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq:

” Greenland Minerals-ip piaanissamut akuersissummik piumasaqaataannik Naalakkersuisut itigartitsinerat pillugu suliassani Namminersorlutik Oqartussanut iluaqutaasumik aammaloortumik eqqartuussivimmi aalajangiisoqarpoq. Illuatungiusoq Naalakkersuisut isumaat malillugu amerlasuunik eqqarluni aamma Namminersorlutik Oqartussat suliakkiissuterpassuarnik suliakkiissutigalugit qunusiariniarsaralugit, paasiuminaatsunik inatsisitigut tunngavilersuilluni aammalu taarsiissutissat annertoorujussuarmik aningaasartalerlugit qunusaaraluni tunuliaqutaasumi tamanna pivoq. Tamanna suliassami ilungersunartumik tunngaviusussamilu pimoorussinani periusissatut isigaara. Taamaattumik aamma Københavnimi Byret-imi aalajangiineq naammagisimaartorujussuuara, tassani aalajangerneqarpoq Kalaallit Nunaanni pineqartunut suliassaq Københavnimi ingerlanneqarsinnaanngitsoq. Taamaaliornermi Isumaqatigiissitsiniarnermut eqqartuussivimmi aamma Københavnimi Byret-imi piumasarisagut uppernarsarneqarput. Suliassaq Kalaallit Nunaanni eqqartuussivimmi siulliulluni suliarinnittussami ingerlanneqartariaqaraluartoq, Naalakkersuisut suliap ingerlanera tamaat aalajangiusimavaat, taamaattumillu suliassap Nunatta Eqqartuussiviani ingerlaqqinnissaa qilanaaraarput”.

Energy Transition Minerals A/S-ip (ETM), Greenland Minerals-imik piginnittuusup, Byret-imi aalajangiinerup kingorna oqaaseqaatiminni eqqartuussivimmi aalajangiineq naammagisimaartorujussuullugu oqaatigigaa, Naalakkersuisut maluginiarpaat. ETM isumaqarpoq suliakkiissuterpassuit suliassaq sivitsorsarsimagaat aammalu illuatungeriinnut tamaginnut qaffasinnerusunik suliassamut aningaasartuuteqartitsinermik malitseqarsimallutik. Tassunga tunngatillugu Naalakkersuisut oqaatigiinnassavaat, suliassat pingasut ataatsikkut suliakkiissutigineqarnissaat Naalakkersuisut toqqarsimanngimmassuk. Suliap ingerlanerani saniatigut aqqutigineqartorpassuarnut akisussaaffik ETM-ip aamma Greenland Minerals A/S-ip kisimik akisussaaffigaat.

ETM-ip isumaqatigiissitsiniarnermut eqqartuussiviup aalajangiinera suliassaminni nukittorsaanertut oqaatigisimagaa, Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisup, Naaja H. Nathanielsenip maluginiarpaa:

”Ingerlatseqatigiiffiup immikkoortortamik suliassaa isumaqatigiissitsiniarnermut eqqartuussiviup aalajangiinerata kingorna nukittunerulersoq, Energy Transition Minerals A/S inerniliimmat, tupaallannartutut isigaara. Isumaqatigiissitsiniarnermi eqqartuussiviup aalajangiinera, piiaanissamut akuersissummik itigartitsineq isumaqatigiissitsiniarnermut eqqartuussivimmi suliarineqarsinnaanngitsoq, kisianni eqqartuussivinni suliarineqartussaasoq, Naalakkersuisut isumaqarnerannut, naapertuulluinnarpoq. Greenland Minerals eqqartuussivinni taperserneQASSAPPAT, taakkua tamatuma kingorna suliassami ilaasut ilai eqqartuussiviup aalajangiinerani isummerfigineqanngippata, taakkua nalilersoqqullugit isumaqatigiissitsiniarnermut eqqartuussivik qinnuigisinnaagaat, pillugu isumaqatigiissitsiniarnermut eqqartuussiviup nalunaaruteqarnera, ingerlatseqatigiiffiup annaffissatuaraa. Taamaalilluni tassani pisussatut ilimanarpallaanngitsoq pineqarpoq, isumaqatigiissitsiniarnermut eqqartuussiviup qulequttamik suliassaqarfimmi iluaniinngissinnaasumik suliarinnissinnaannginnissani sioqqutsisumi mattussinnaanngikkaa, taamaallaat pineqarluni. Taamaattumik isumaqatigiissitsiniarnermut eqqartuussivimmi aalajangiineq upernaaq Naalakkersuisunut siunnersuutiminnut naapertuuttutut qanoq ETM oqaatigisinnaaneraa, uannut takujuminaatsorujussuuvoq. ETM-ip taamanikkut siunnersuutigisaa tassaavoq, eqqartuussivinni aalajangiinissat utaqqineranni isumaqatigiissitsiniarnermut eqqartuussivik unitsikkallassagipput. Tamanna Naalakkersuisut akuerinngilaat, maannakkullu isumaqatigiissitsiniarnermut eqqartuussivimmi imaluunniit Københavnip eqqartuussiviani suliassami qitiusoq suliarineqarsinnaanngitsoq aalajangerneqarpoq. Naalakkersuisut eqqartuussiviit sulinerat ataqqivaat aammalu suliassap suliarinnittussami eqqortumi, aallaqqaammut Nunatta Eqqartuussiviani pisussami, ingerlaqqinnissaa qilanaaralugu”.

Paasissutissanik annertunerusunik piniarnermi attaveqarfigineqassaaq Naalakkersuisoqarfimmut pisortaaneq Jørgen Hammeken-Holm uani joeh@nanoq.gl imaluunniit oqarasuaammi 346846

Pissusiviusut:
Ullumi aalajangiinermi suliassami pineqartut tamarmik Københavnimi Byret-imi suliassamiigunnaarput. Suliaq ingerlaannaassaaq, tassani Silap pissusaanut, Nukissiuutinut Pilersuinermullu ministereqarfik kisimi eqqartuussivimmi suliassami pineqartunngussalluni. Suliassamut tunngaviusut Greenland Minerals A/S-ip suli ministereqarfimmut erseqqinnerusumik nassuiarsimanngilai. Silap pissusaanut, Nukissiuutinut Pilersuinermullu ministereqarfik aamma danskit naalagaaffiat Kalaallit Nunaanni piiaanissamut akuersissutinik tunniussinissamut piginnaatitaaffeqanngitsut.
Naalakkersuisut allallu suliakkiullugit eqqartuussivimmi suliassaq maannakkut taamaallaat Nunatta Eqqartuussiviani ingerlalissaaq. Eqqartuussivimmi ataatsimiinnissaq siulleq suli piffissalerneqanngilaq.