Umiatsiaaqqamik aalisartut amerleriarput, aammalu arnat amerleriarlutik

Sinerissap qanittuani umiatsiaararsorluni aalisarneq piffissami 2016 – 2024-mi ineriartornera annertusimavoq. Umiatsiaararsorlutik aalisartut amerlassusiat 2016-imi 1.836-usimariarlutik 2024-mi 1.983-inut amerlisimapput. 2019-imi amerlanerpaagamik 2.047-t umiatsiaararsorlutik aalisartuupput. Taamaattoq aqutsiveqarfinni ataasiakkaani ineriartorneq assigiissimanngilaq, matumani piffissap ingerlanerani Qaanaami ikileriarnerpaasimallutik (-22), taamaannerani 2016 - 2024-mi umiatsiaararsorluni aalisartut amerlassusiat Nuummi amerleriarnerpaasillutik +54.

Taamatuttaaq piffissap 2016-2024-p ingerlanerani umiatsiaararsorluni aalisarnermi arnat amerlanerulersimapput, matumani umiatsiaararsorlutik aalisartunit arnat 0,3 %-imiit 1,3 %-imut amerleriarsimallutik. Arnat umiatsiaararsorlutik aalisartut amerlanerpaartaat Upernaviup eqqaaniipput, 2024-mi arnat umiatsiaararsorlutik aalisartut 12-iullutik, nunap immikkoortortaani umiatsiaararsorlutik aalisartut tamarmiusut 3 %-eralugit.

Piffissap ingerlanerani aamma aalisartut inuusunnerit ilanngunnikuupput. Aalisartut 40-t inorlugit ukiullit 2016-imi 37%-imiit 2024-mi 41%-mut amerleriarsimapput. Taassuma paarlattuanik aalisartut 40-t sinnerlugit amerlassusiat 63%-ioriarlutik 59%-inngorlutik ikileriarsimallutik.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik 2016-2024-mi sinerissap qanittuani umiatsiaararsorluni aalisarnerup ineriartornera pillugu nalunaarusiorsimavoq, tassani ilaatigut ukiut, suiaassuseq, pisat aamma ataatsimut nunallu immikkoortuinut agguataarlugit tunisat nalingi takutinneqarlutik.

Nalunaarusiami pineqarput umiatsiaaqqat (umiatsiaaqqat 6 meterit inorlugit takissusillit) ataatsimut isigalugit Kalaallit Nunaat tamakkerlugu, aammali sinerissap qanittuani qaleralinniarnermut aqutsiveqarfiit; Tunu, Kujataa, Nuuk, Sisimiut-Maniitsoq, Qeqertarsuup Tunua, Uummannaq, Upernavik aamma Qaanaaq tunngavigalugit nunap immikkoortuinut agguataarlugit ineriartorneri.

Nalunaarusiaq umiatsiaararsorluni aalisarnerup Kalaallit Nunaat tamakkerlugu nunallu immikkoortuinut agguataarlugu ineriartorneranik sukumiisumik takutitsivoq. Taamaalilluni sumiiffinni assigiinngitsuni sinerissap qanittuani aalisarnerup qanoq ineriartorsimaneranik, tassunga ilanngullugu aalisagaqatigiiaat sorliit sumiiffinnut pingaaruteqarnerpaanerannik, qaammatit sorliit aalisarfiunerpaasarnerannik, tunisat nalingisa ineriartornerannik taamaalillunilu aalisartumut ataatsimut isertitanik kiisalu ukiuisa agguataarsimanerisa aalisartullu amerlassusaasa ineriartornerannik erseqqissumik takutitsivoq.

Umiatsiaararsorluni aalisarnerup ineriartornera pissanganartoq pillugu uani annerusumik atuagaqarit: Saqqummersitat

Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, apn@nanoq.gl