Pinerlunniaqatigiit Kalaallit Nunaannut iseriartornerat Naalakkersuisut annertuumik ilungersunartutut isigaat

Kalaallit Nunaanni ikiaroornartut akii, qallunaat pinerlunniaqatigiivisa nunatsinni niuerfissaminnik ujaasilernerannut pileritsatsitsisut pillugit, aviisimut ilanngutassiaq Kalaallit Nunaanni Politiinit oqaaseqaatinik imaqartoq, ullumikkut DR-ip saqqummiuppaa.

Tamanna Naalakkersuisut annertuumik ilungersunartutut eqqasuuteqarnartutullu  isigaat, aamma taanna tassaavoq sammisaq, qaammatini kingullerni ukkatarineqarsimasoq, tassanilu Kalaallit Nunaanni politiit aammalu oqartussaasut attuumassuteqartut ataatsimeeqatigineqartarsimapput.  Qallunaat inatsiseqarnermut ministeriat 2025-imi aggustimi Nuummut tikeraarmat, sammisaq aamma ullormut oqaluuserisassaniissimavoq.

Aggustimi nunatsinni borgmesterillu Qaqortumi ataatsimoorluni ataatsimiinnermi sammisaq sammisat ulloqartinneqarneranni aamma oqallisigineqarsimavoq.  Task-force (suleqatigiissitaq aalajangersimasumik suliaqartussaq), pinerlunniaqatigiit rockerit aamma pinerluttuliornerit ikiaroornartunut attuumassuteqartut pillugit paasissutissanik avitsisarnernik patajaallisaasussat pilersinneqassasut, soorlu aamma anngiortumik eqqussisarneq akiorniarlugu suliniutit annertusineqarnissaat, aalajangerneqarpoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq ima oqaaseqarpoq:
”Pinerluttuliortut pinerluttuliornermik ingerlatsinertik annertusiniarlugu nunatsinnik ukkatarinnilernerisa takussaaleraluttuinnarnera, annertuumik eqqasuutigalugu takuarput.  Kinaluunniit taamaaliorluni inatsisitsinnut pinerluttuliorluni iliuuseqartoq aamma eqeersimaartumik inuit ataatsimoorillu qajannarsisinneqarnerannut ilanngussisut akiorneqassapput.  Tamanna pinerluttuliortunut avataanersunut aamma inunnut taakkuninnga nunami maani suleqatiginnittunut atuuppoq.  Aaqqissuussaasumik pinerluttuliornernut qanorluunniit iluseqartunut Naalakkersuisut sakkortuumik sunniuteqarluartumillu pillaasarniarput.  Ikiaroornartut akii qaffasinnerugaluarput, kisianni anngiortumik eqqussinernut pillaatissiinerit taamatuttaaq Danmarkimut naleqqiullugit Kalaallit Nunaanni qaffasinnerupput.  Sapaatip akunneranilu uanerpiaq pinerluttulerinermi inatsimmi pineqaatissiisarnerup qaffanneqarnissaanut missingiut Inatsisartut akuersissutigaat, taassumalu pinerluttuliornernut ilungersunarnerpaanut sakkortuumik sunniuteqarluartumillu pillaasarneq periarfissaalersissavaa”.

Paasisaqarnerorusukkuit naalakkersuisup allattaa Jeanette L. Petersen, jalp@nanoq.gl-ikkut attavigiuk.