Naalakkersuisut nunatsinni isorliunerusuni suliniutinik nukittorsaaniarlutik Naalakkersuisoqarfiit akimorlugit suliniuteqarnermi suleqatigiissitamik pilersitsipput

Naalakkersuisut Naalakkersuisoqarfiit akimorlugit suliniuteqarnermi suleqatigiissitamik, Nunatsinni isorliunerusunut iliuusissanut pilersaarutip nutaap suliarineqarnerani atuutsinneqalerneranilu siuttuusussanik pilersitsipput. Suliniuteqarnermi Naalakkersuisut nunatsinni isorliunerusuni ineriartortitsinermik inuunermilu atukkanik aallussinerminnik annertusititsiniarnerat malunnartinneqarpoq.

Naalakkersuisut iliuusissanut pilersaarut atorlugu innuttaasut ulluinnarni inuuneranni pitsannguutissanik aalajangersimasunik pilersitsinissaq kissaatigaat.

Iliuusissanut pilersaarummi anguniakkat tallimat uku aallaavigineqassapput:

• Najukkani ataatsimiititaliat innuttaasullu akuutinneqarnerinik sunniisinnaanerinillu annertusititsineq. Suliniutissani aallartinneqartuni najukkani pisariaqartitat tunngavigineqassapput, aammalu aalajangiisarnerit innuttaasunut qaninnerulluni pisassapput.
• Allaffissorneq oqinnerusoq killissallu ikinnerusut. Suliniutit aallartinneqartussat allaffissornermut piumasaqaatit amerlanerulernerinik kinguneqassanngillat, annertunerusumilli akimmiffissanik piiaaffiussapput.
• Inooqatigiinnermi ataatsimoorfinnut, inuiaqatigiinni akisussaaffinnut, nammineq kajumissutsimik sulinermut ataqatigiinnermullu tapersiinissaq. Inoqarfiit ingerlalluarnerusut amerlanertigut tassaasarput, sammisaqarfiit akimorlugit ataqatigiiffiusut, innuttaasut inoqarfimmi ineriartortitsinissamut ataatsimoorlutik akisussaaffinnik piginnittuunermillu tigusiffigisaat.
• Inuunermi avatangiisitigut atukkanik pitsannguineq aamma innuttaasut pisariaqartitaannik nalinginnaasunik naammassinninneq. Tamatumani pingaartumik ineqarnikkut pissutsit pineqarput.
• Ineriartortitsinissamut, inuussutissarsiornermut nutaaliornissamullu tunngavissanik pilersitsineq.

Ineqarnermut, Attaveqaasersuutinut Isorliunerusunullu Naalakkersuisoq Aqqaluaq B. Egede oqarpoq:
"Isorliunerusunut iliuusissanut pilersaarut atorlugu atugarissaarnermi aalajangersimasunik pitsannguinissaq kissaatigaarput – inissiat pitsaanerusut, ataatsimoorfiit nukittunerusut aamma ilinniarnissamut sulinissamullu periarfissat nutaat. Inoqarfinni minnerusuni innuttaasut ulluinnarni inuunerminni allannguisoqarneranik malugisaqarnissaat anguniagaraarput, taamaalilluta inuiaqatigiit oqimaaqatigiinnerusut – sumiluunniit najugaqaraluarunik – toqqissisimanissaat, ilorrisimaarnissaat siunissamullu upperinninnerat qulakkiissagatsigu."

Atugarissaarnermik pitsannguineq – anguniagaqarnermi qitiusoq
Suliniutini nutaani nunatsinni isorliunerusuni atugarissaarnerup qaffatsinneqarnissaa siunertaavoq pingaarneq. Taamaalilluni kiffartuussinerit nalinginnaasut angusinnaanissaat pitsaanerulissaaq, ineqarnermi atukkat toqqissisimanarnerulissapput, inooqatigiinnermi ataatsimoorfiit nukittunerulissapput, aammalu ilinniartitaanermi suliffeqarnermilu periarfissat nutaat pilersinneqassapput. Inoqarfinni minnerusuni innuttaasut inoqarfinni annerusuni innuttaasut toqqissisimanerisa inuunerisa pitsaassusiisa assinginik misigisaqarnissaat, aammalu suliniutit inuiaqatigiinni innuttaasut akimorlugit ataqatigiinnerulersitseqataanissaat Naalakkersuisunit kissaatigineqarpoq.

Nunatsinni isorliunerusuni pissutsit ullormiit ullormut pitsaanerulernavianngillat. Tamanna anguneqassappat suliat anguniagaqarfiussapput, tulleriiaarinerit ersarinnerussapput aammalu Naalakkersuisoqarfiit, kommunit najukkanilu inuiaqatigiit imminnut qanillutik suleqatigiissapput. Taamaattumik naalakkersuisoqarfiit akimorlugit suliniuteqarnermi suleqatigiissitamik pilersitsineq siunnerfimmi tassani alloriarnertut siullertut isigineqassaaq. Ineqarnermut, Attaveqaasersuutinut Isorliunerusunullu Naalakkersuisup suliaq qanillugu malinnaaffigissavaa.

Naalakkersuisoqarfiit akimorlugit suleqatigiinneq
Suliniutinut Ineqarnermut, Attaveqaasersuutinut Isorliunerusunullu Naalakkersuisoqarfik aallaavigineqassaaq, tassanilu qitiusumik allaffeqarfimmi suliassaqarfiit akimorlugit ataqatigiissitsinissaq suleqatigiinnissarlu qulakkeerneqassaaq. Suliassaqarfinnut Naalakkersuisoqarfiit ataasiakkaat suli suliniutinut ataasiakkaanut, namminneq oqartussaaffimmik ataaniittunut akisussaasuussapput. Kommunit, Inatsisartuni Partiit, najukkani inuiaqatigiit aamma ingerlatseqatigiiffiit Namminersorlutik Oqartussanit pigineqartut akuutinneqassapput, taamaalillunilu aaqqiissutissani najukkani pisariaqartitat aallaavigineqassapput, aammalu misilittakkat attuumassutillit tamarmik atorneqassapput.

Annertunerusumik paasisaqarusunnermi Ineqarnermut, Attaveqaasersuutinut Isorliunerusunullu Naalakkersuisoqarfik box909@nanoq.gl aqqutigalugu attaveqarfigineqassaaq.