Naalakkersuisoq Bentiaraq Ottosen kalaallit silap pissusianut piujuartitsinermullu taaguutaasa nutaat tamanut ammasumik saqqummiunneqarnissaannut qaaqqusivoq

Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen kalaallit silap pissusianut piujuartitsinermullu taaguutaasa nutaat tamanut ammasumik saqqummiunneqarnissaannut qaaqqusivoq. Aaqqissuussinermi, marlunngornermi 2. septembarimi nal. 15:00 – 16:00 Katuap Inersuaaraani ingerlanneqartussaq ukiuni arlalinni Pinngortitamut Avatangiisinullu Naalakkersuisoqarfiup, CSR Greenlandip, suliffeqarfiit aamma Oqaasileriffiup akornanni qanittumik suleqatigiinnerup, maanna silap pissusianut piujuartitsinermullu taaguutit 194-it nutaat akuerineqarnerinik inerneqartoq nalliuttorsiutigineqassaaq.

Silap pissusianut pujuartitsinermullu taaguutit nutaat akuutitsinermut nukittorsaataassapput peqataanissamullu assigiinnik periarfissiissallutik
Silap pissusiani allannguutit ulluinnarni inuunitsinnut, inuussutissarsiornitsinnut kulturitsinnullu sunniuteqarput. Piffissami allanngoriartornerit sukkatseruttorfianni oqaatsit ataatsimoorussat atorlugit silap pissusiata allannguutaasa kingunerisaannik paasinninnissarput, oqalliseqarnissarput aammalu unammilligassanut periarfissanullu iliuuseqarnissarput suli pingaaruteqaleriartuinnarpoq. Taamaattumik silap pissusianut pujuartitsinermullu taaguutit 194-it nutaat, Oqaasiliortunit kalaallisut nutserneqartut akuerineqartullu atorlugit oqaatsigut nukittortinneqarput. Taaguutit siunissami oqaatsitsinni atorneqassapput, taamaattumillu silap pissusia piujuartitsinerlu pillugit kalaallisut oqaloqatigiinnissamut periarfissanut nukittortitsisussaapput.

”Silap pissusiata allannguutai tamatsinnut sunniuteqarput. Aamma silap pissusiata allannguutaanut paasinneriaaserput oqaloqatigeeriaaserpullu qanoq iliorsinnaanitsinnut ilusiliisussaavoq. Kalaallisut oqaatsit, soorlu “CO2-mik aniatitsineq”, “nunarsuup kissakkiartornera” aamma “silap pissusianut sunniutit” nammineerluta oqaatsigut atorlugit aaqqiissutissanik eqqarsarsinnaanerput nukittortinneqassaaq. Tamatuma peqatigisaanik ilisimasassat, taamaalillunilu kikkut tamarmik oqaloqatigiinnermut naligiimmik akuutinneqarsinnaanerinut peqataatinneqarsinnaanerinullu iluaqutaasussat pissarsiariuminarnerulersinneqassapput tapertarineqassallutillu. Nammineq oqaatsigut atorlugit silap pissusia piujuartitsinerlu pillugit oqaloqatigiissinnaalerutta, aamma nukittunerulluta ataatsimut iliuuseqarsinnaalissaagut. Silap pissusianut piujuartitsinermullu taaguutit nutaat avataaniit oqaatsinik atuinnarata, kisiannili nammineerluta piumasaqaatigut malillugit ilusilersuilluta oqaloqatigiissinnaalernissarput inuiaqatigiit mingutsitsinnginnerusut piujuartitsinerusullu ilusilersornissaannut ilaapput”, Pinngortitamut Avatangiisinullu Naalakkersuisoq oqarpoq nangillunilu:

”Naalakkersuisut sinnerlugit suliffeqarfiit, aaqqissuussaanerit inuillu ataasiakkaat taaguutinik, silap pissusiata allannguutaanni unammilligassanut aqqutissarsiornissatsinnut ikiortigisinnaasatsinnik, kisiannili aamma periarfissanut pilersinneqartunut ineriartortitsinermi tapersiisimasut qutsavigerusuppakka. Silap pissusianut, piujuartitsinermut oqaatillu inuiaqatigiinni ineriartortitsinitsinnut pingaaruteqarnerannut soqutiginneqataasut tamaasa tikilluaqqusinnaagakkit nuannaarpunga. Taamaalilluta ataatsimoorluta kalaallit silap pissusianut piujuartitsinermullu taaguutit nutaat atorlugit alloriarfissanut tullernut piareerpugut”, Naalakkersuisoq Bentiaraq Ottosen naggasiivoq.

Sumi aamma qaqugu?
• Marlunngorneq 2. Septembari nal. 15:00 – 16:00.
• Katuap Inersuaaraa, Nuuk.
• Aaqqissuussineq Facebook-ikkut qupperneq ”Pinngortitap Paarsisui Naturens Superhelte” aqqutigalugu toqqaannartumik aallakaatinneqassaaq.

Annertunerusumik paasisaqarusunnermi Naalakkersuisup allattaa Anders Samuelsen tlf.: 34 56 11/27 02 36-mut imaluunniit e-mail: pan@nanoq.gl aqqutigalugu attaveqarfigineqarsinnaavoq.