Narsami kaffisuulluni oqaloqatigiinnissamut qaaqqusissut: Anna Wangenheim peqqinnissaqarfiup siunissaa pillugu innuttaasut isumaat tusarusuppai.

Peqqissutsimut inunnullu Innarluutilinnut Naalakkersuisoq, Anna Wangenheim, tallimanngornermi ulloq 29. aggusti nal. 16:30–18:00, Narsami innuttaasut illuanni ammasumik kaffisuulluni oqaloqatigiinnissamut qaaqqusivoq. Peqqinnissaqarfik pillugu oqaloqatigiinnissamut soqutiginnittunut tamanut ammavoq – kaffi, tii imerlu sassaalliutigineqassapput.

Naapinnerup siunertaa tassaavoq, innuttaasut peqqinnissaqarfik pillugu misilittakkatik isiginnittariaatsitik pillugit oqaluttuarnissaannik periarfissiineq. Isummersuutigineqartut politikkikkut suliaqarnerup ingerlariarnissaanut siammasinnerusumik suliareqqinnissaanut pingaaruteqarput, uani peqqinnissaq pillugu isumaqatigiissutissap.

Naapinneq oqaloqatigiinnertut ingerlanneqassaaq – periaaseq taanna Sisimiuni Nuummilu sunniuteqarluartoq takutippaa – takkuttut sammisani taaneqartuni eqqartuinissamut periarfissinneqassapput:

• Naalakkersuisumut aammalu peqqinnissaqarfimmi politikkikkut aqutsinermut suut naatsorsuutigineqarpat?
• Najukkami, Dronning Ingridip Napparsimmavissuani Rigshospitalimilu – peqqinnissakkut katsorsartinneq pillugu qanoq misigisaqartoqartarpa?
• Utoqqarnut aamma inunnut innarluutilinnut peqqinnissakkut neqeroorutit qanoq ingerlasarpat?

Anna Wangenheim oqarpoq: "Peqqinnissaqarfik ilusilersornissaanut inuiaqatigiinni pisariaqartinneqartut pillugit innuttaasut oqaasii pisariaqartippavut. Narsami innuttaasut isiginiagai peqqinnissakkullu neqeroorutit qanoq pitsaasumik ineriartortinneqarsinnaanersut pillugit isumai tusarnissaanut qilanaarpunga. Oqaloqatigiinneq inuit ataasiakkaanut sunniuteqarsinnaammat pingaaruteqarpoq aamma innuttaasunik peqataatitsinissaq. Taamaammat neriuutigaara amerlasuut takkutissasut."

Naapinneq kalaallisut danskisullu ingerlanneqarumaarpoq, soqutiginnittullu tamarmik Narsami innuttaasut illuannut, tallimanngornermi ulloq 29. aggusti nal. 16:30–18:00, tikilluaqqungaarpakka.

Paasisaqarnerorusukkuit; Naalakkersuisup allattaa Nivé Lynge Biilmann, emailimut: nilb@nanoq.gl imaluunniit oqarasuaammut +299 34 52 84 attavigisinnaavat.