Nunani allamiut akuunerulersitsinissamullu suliassaqarfiit pillugit Kalaallit Nunaat Danmarkilu suleqatigiinnerminnik nukittunerulersitsissapput

Naalakkersuisut Kalaallit Nunaanni nunani allamiunut akuunerulersitsinissamullu suliassaqarfiit pillugit Danmarkimi oqartussanik suleqateqarnerat piffissami kingullermi annertusineqarpoq taamaalillunilu pitsaanerulersinneqarluni. Suleqatigiinneq piffissami nunani allamiut amerlanerusut Kalaallit Nunaannut nunasinerata nalaanni annertusineqarpoq pitsaanerulersinneqarlunilu. Kalaallit Nunaata Danmarkillu akunnerminni qanimut suleqatigiinnerat nunami maani pingaarutilinnik allannguisoqarneranik kinguneqarpoq, inuussutissarsiortut sulisussanik piukkunnartunik sulisoqalernissaanut periarfissaannik nukittorsaasumik aamma peqqinnissaqarfimmi sulisussarsiorneq pinartoq naammassineqarsinnaalerluni.

Isumaginninnermut, Suliffeqarnermut, Nunamut Namminermut Avataangiisinullu Naalakkersuisoq, Bentiaraq Ottosen, ulluni 18. aamma 19. august 2025-mi Nunani Allamiunut Akuunerulersitsinissamullu Ministerimik, Kaare Dybvad Bekimik Nuummi tikeraarneqarpoq. Ataatsimiinnerni Bentiaraq Ottosenip aamma Kaare Dybvad Bekip nunani allamiut akuunerulersitsinissamullu suliassaqarfinni suliniutit assigiinngitsut eqqartorpaat. Ullumikkut 19. august 2025-mi tusagassiorfinnut katersortitsinermi saqqummiunneqartutut, najugaqarnissamut sulinissamullu akuersissutit sivisussusaat ukioq ataatsimiit ukiunut marluk angullugit allanngortinneqarnissaa pillugu Bentiaraq Ottosenip aamma Kaare Dybvad Bekip akornanni isumaqatigiissutaavoq. Suleriaatsimik allannguineruvoq, nunatsinni inuussutissarsiornermut nunani allamiunik sulisussarsiornermik annertusiartuinnartumik pisariaqartitsisumut annertuumik pingaaruteqartussaq.

”Nuannaarutigeqaara, najugaqarnissamut sulinissamullu akuersissutit sivisussusaat pillugu suleriaatsimik allanngortitsigatta. Suleriaatsimik allannguineq nunami maani suliffeqarfinnut, taamatut aalaakkaanermik ujartuisumut, aalaakkaanerusumik pilersitsissaaq, aamma nunani allamiunik kajungersitsinissaq pillugu pisariaqartitsisoq. Peqatigalugu inunnut nunatsinni nunasiniarlutik suliniarlutillu toqqaasunut allannguineq annertunerusumik isumannaassusermik pilersitsissaaq”, Isumaginninnermut, Suliffeqarnermut, Nunamut Namminermut Avataangiisinullu Naalakkersuisoq, Bentiaraq Ottosen, oqaaseqarpoq.

Peqatigalugu peqqinnissaqarfimmut suliassaqarfimmi periarfissanik nutaanik ammaasoqarpoq. Taamaatilluni nunani allamiut maani najugaqartut peqqinnissamut tunngasumik ilinniagaqartut suliaqarfitsik nikisissinnaanngorpaat, peqqinnissaqarfimmilu atorfinillutik, aalajangersimasumik najugaqarnissamut akuersissummik pissarsinissamut ukiut arfineq-marlunnik sivisussuseqartup naatsorsorneqarneranut atatillugu nunat allamiup aallaqqaataaneertariaqalersillugu taamaatinneqanngikkaluarlugu.

”Peqqinnissaqarfimmi sulisunik ilinniagalinnik amerlanerusunik maannakkorpiaq pisariaqartitsivugut. Taamatut allannguinikkut suliaqarfimmillu nikisitsinikkut nunami maani isumalluutit piginnaasallu pigeriikkagut atorluarnerusinnaalissavagut”, Peqqissutsimut inunnullu Innarluutilinnut Naalakkersuisoq, Anna Wangenheim, oqaaseqarpoq.

Naalakkersuisunut pingaaruteqarpoq, nunani allamiut pillugit suliassaqarfimmut sinaakkutit Kalaallit Nunaanni suliffeqarnermut eqaatsumut malinnaatinneqarnissaat. Peqatigalugu sammisaq pillugu nunat akornanni pingaartinneqarnissaanut Danmarkimik qanimut suleqateqarneq Naalakkersuisut salliutippaat. Kalaallit Nunaannut nunani allamiut pillugit inatsisip nutarsarneqarnissaa pillugu suliassaq, qanimut suleqatigiinnermik assersuutaavoq pitsaasoq:

”Uannut Nunani Allamiunut Akuunerulersitsinissamullu Ministeritut pingaaruteqarpoq, Danmarkimiit kalaallit kissaataat pillugit ikiuinissarput. Ulluni kingullerni suleqatikkalu kalaallit pitsaasumik ataatsimiippugut, kisianni oqallinnerit piffissami sivisunerusumi ingerlareerput aamma upernaap ingerlanerani Københavnimi ataatsimiippugut.
Soorunami kalaallit kissaataat tapersersorpakka aamma malittarisassat piffissamut malinnaanerulersinniarlugit nutarterneqarnissaat pillugit kissaateqarneq isumatusaarnertut isigalugu”, Nunani Allamiut Akuunerulersitsinissamullu Ministeri, Kaare Dybvad Bek, oqaaseqarpoq.

Annertunerusumik paasisaqarusunnermi naalakkersuisup allattaa Anders Samuelsen e-mail: ansa@nanoq.gl imaluunniit tlf.: +299 34 56 11 aqqutigalugu attaveqarfigineqassaaq