Innuttaasut sanngiitsunik tarnikkut nappaatilinnik sullissinermi ataatsimoorluni politikkikkut akisussaaffeqarnissaq pillugu iliuuseqartoqartariaqarpoq

Peqqissutsimut Inunnullu Innarluutilinnut Naalakkersuisoq Anna Wagenheim, ulloq tallimanngorneq 4. juuli, Nuummi tarnikkut nappaatilinnik sullissisarfik pulaarpaa.
Tassani sulisut sullarissut tunniusimasut, ulluinnarni innuttaasut sanngiitsunut, amerlanertigut ilungersunartumik atugassaqartinneqartut pillugit qasujaallutik katsorsaalluarlutik, ikiuulluarput.

Ullumikkut tarnikkut nappaatilinnik sullissineq pillugu atugassarititat naammanngillat, tarnillu nappaataanut nakorsanik immikkullu ilisimasalinnik amigaateqartoqarpoq, minnerinngitsumillu ADHD-imut atatillugu misissortikkusuttut amerlisimallutik. Ukiuni kingullerni misissortikkusuttut amerliartorput, ullumikkullu inersimasut 400 sinnerlugit misissortikkusullutik utaqqisuniipput, taassumallu saniatigut inuit 250 tikillugit massakkut sullinneqarput. Taamatut ineriartortoqarnera ernumanarpoq, tassanilu paasiniartariaqarparput tarnikkut nappaatit pillugit eqqarsartariaaseq qanoq inuiaqatigiinni inissisimanersoq. Suliassat amerliartortillugit sulisut angummassinnaajunnaarput, taamatulli ingerlaannartoqarsinnaanngilaq. Tamanna ulluinnarni ingerlatsinermi tamaviarsortitsisarpoq, suliffimmilu avatangiisinut katsorsaanermilu pitsaassusermut unammillertitseqataasarlutik.

“Tarnikkut nappaatilinnik sullissisunut ataqqinningaarlunga qujaffigerusuppakka, taakkuuppummi atugassarititani ilungersunartumi qaffasissumik pitsaasumik sullissisut. Pingaaruteqarpoq suliniutit ilungersunartut nipaatsumik suliarineqartut inuiaqatigiittut takutillugillu qujaffigissagivut, taakkuuppummi innuttaasunut sanngiitsunut isumaqangaartut” Peqqissutsimut Inunnullu Innarluutilinnut
Naalakkersuisoq Anna Wagenheim oqarpoq.

Tarnimikkut napparsimasunut inissiaq ukiut marluk qaangiuppata naammassineqassasoq ilimagineqarpoq, tassanilu inissat 12-lunniit 22-nut amerlineqassapput. Periarfissanut nutaanut apeqqutinillu ammaasseqataapput. Suli nutaanik allanilluunniit katsorsaariaatsinik apeqqutilliisoqartillugu qanoq ililluta sulisunik naammattumik piginnaasalinnik sulinermi pissutsinik pitsaasunik sulisoqarnissaq qulakkeersinnaavarput? Taannaavorlu apeqqut ataatsimoorluta aaqqiissummik ujarlerfigisassarput.

Innuttaasut pisariaqartitaat aamma tarnikkut nappaatilinnik sullissinerup ineriartorneranut peqqinnissaqarfiup kisimiilluni aaqqiivigisinnaanngikkai erseqqippoq. Nunami kommunit taakku pinaveersaartitsinermi malitseqartitsinermilu qitiusumik inissisimasunit nukittorsaaqataanissaq aammalu aaqqissuussamik suleqatiginissai pisariaqarpoq. Tarnimikkut nappaatilinnut immikkoortortaq, najugaqarnissamut neqeroorut aamma tapersersuisoqarnissaanut iliuusissat, taakkuupput tarnimikkut nappaateqarnertik pillugu sullinneqarluartussat, uanilu kommunit suleqatiginissai pinngitsoorneqarsinnaanngillat.

Naalakkersuisoq Anna Wagenheim oqarneratuut, pingaarutilimmik suliassaqarpoq, taakkuuppulli politikkikkut qaqinneqarnissaanut pingaarutillit. Qinigaasut allat qanimut oqaloqatiginissai pisariaqarpoq, taamaalilluni ataatsimoorluta isumaginninnermi angusaqarluartumik atasinnaasumillu ineriartortitsinermut tunngavissanik pilersitsisoqarsinnaassaaq. Suliassat ataatsimoortumik aaqqissuussamik, nunap inissisimaffianik, inuiaqatigiilerinermik aammalu atorfinitsitsinermi ajornartorsiutinik aaqqiiffigisaqartariaqartunik ataatsimut unammilligassaraavut.

Naalakkersuisoqatigiit ersarissumik anguniagaqarput: Tarnikkut nappaatinik sullissisunut piumasaqaatit sinaakkutinik pitsaasunik atungassarititanillu pilersitsisariaqarpugut aamma ilutigisaanik innuttaasut tarnimikkut nappaatilinnut aamma innarluutilinnut toqqissisimaneq isumannaallisaanissamut nukittorsaanissamillu pilersitsisoqassaaq; kiisalu ilaqutaasunut paasissutissanik tamanut pissarsiarineqarsinnaasunik pitsaasunik ujartuisoqassalluni. Tarnikkut nappaat inuiaqatigiinni toqqortorneqassanngilaq. Malugineqarneq ajortut ersersinniarpagut, inuit tarnimikkut nappaatillit inuiaqatigiinni pingaaruteqartuupput tunniussassaqarsinnaallutillu. 

Taamaammat nuna tamakkerlugu tarnikkut pinasuartumik nakorsiartarfittut aaqqissussamik pilersitsinissaq anguniagaraarput. Qanoq iliortoqassanersoq, suullu atorneqassanersut kikkullu akisussaaffigissaneraat oqallisigineqassapput. Siunissami tarnip pissusaatigut sullissineq pitsanngorsassagutsigu nuna tamakkerlugu oqaloqateqarnissaq pisariaqarpoq.

Qinikkatut sulisut innuttaasullu sullinnissai akisussaaffigivagut, taama Anna Wagenheim naggasiivoq. 

Sukumiinerusumik paasisaqarusukkuit Naalakkersuisup allattaa, Nivè Lynge Biilmann attavigiuk, uunga email: nilb@nanoq.gl imaluunniit oqarasuaat +299 23 23 50