Innuttaasut agguataarnerisa ineriartornerata kingunerisaanik unammilligassat naammassiniarlugit sulisussat nukittorsarnissaat pillugu annertusisamik suleqatigiinneq pingaaruteqarpoq

Qaninnerusumik suleqatigiinneq – naalakkersuisoqarfiit akimorlugit, Namminersorlutik Oqartussat kommunillu akornanni aamma pisortat inuussutissarsiornerullu akornanni – tassaasinnaavoq sulisussat nukittorsarnissaat pillugu pinngitsuugassaanngitsoq. Sulisussat amigaataalertussat amerliartorneri innuttaasullu agguataarneranni unammilligassat naammassiniarlugit immikkoortut akimorlugit anguniagaqarnerusumik itinerusumillu suleqatigiinnissaq atorfissaqartinneqarpoq.

Utoqqarnik paaqqutarinninnermi assaat amerlanerusut ersarissumik pisariaqartinneqarput, peqatigalugulu inuusuttut atuarnerup saniatigut piffissaq ilaannakortumik suliffissanut periarfissat pitsaanerusut atorfissaqartillugit.
Suliffeqarnermut attaveqarneq inuusuttut ingerlaqqittumik ilinniagaqarnerannut annertuumik pingaaruteqarpoq, aamma sulinermik ilinniarnermillu inuusuttut isiginninnerannut ajunngitsumik sunniutai minnerusutut takorloorneqassanngillat.

”Kinguaariit nikinnerat assigiinngisitaarnerlu kaaviiaartuarput inuusuttuuneq misilittagaqarnerluunniit apeqqutaatinnagit tamarmik suliffeqarnerannut kalluaasarlutik. Piffissaagallartillugu eqqarsarneq nukittuunngortitsivoq, suliffeqarnermi aalaakkaanermik qulakkeerinnittoq. Pingaartuuvoq inuiaqatigiit nukittorsarniarlugit suliassaq taanna ataatsimut kivinnissaa, taamaalilluni amerlanerusut sivisunerusumik suliffeqarnermiinnissaq toqqarsinnaaqqullugu, aamma suiaassutsip, immikkut inuiaassutsip, ukiut, naalakkersuinikkut isiginnittaaseq minnerunngitsumillu piginnaasatigut assigiinngissutsinik ataqqinninneq assigiinngisitaarnermi aallaavigineqarluni” Isumaginninnermut, Suliffeqarnermut Nunamullu Namminermut Naalakkersuisoq, Bentiaraq Ottosen, oqaaseqarpoq.

Kisitsisini ersarissumik takuneqarsinnaavoq sulisussat pillugu suleqatigiinnerup nukittorsarnissaa pisariaqartinneqartoq. Assigiinngisitaarneq, piginnaasat imaluunniit sulisussani inuit amerlassusaat pineqarnera apeqqutaatinnagu pitsaanerusumik kajumissaarinissaq pisariaqarpoq. Piginnaasat qaffasissusaannik kivitsinissamut sulisussallu amerlisinnissaannut ataatsimoortumik iliuuseqarnissamik piumasaqaateqarpoq – aamma illuatungeriinnut ataavartumik pingaarnersiuinissaq pisariaqarpoq inernerit inuiaqatigiinnut iluaqutaasussanik kissaateqartunut.

Naalakkersuisut Suliffeqarnermut Nalunaarusiaat 2024-mut tunngasoq uani aaneqarsinnaavoq

Annertunerusumik paasisaqarusunnermi naalakkersuisup allattaa Anders Samuelsen e-mail: ansa@nanoq.gl imaluuniit tlf. + 299 34 56 11 aqqutigalugu attaveqarfigineqassaaq