AtuartigukNaalakkersuisup Anna Wangenheimip Ilisimatusarfimmit allagartartaartut nuannaarutigai
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Ullumi Ilisimatusarfimmi allagartartaartoqarnerani persiorsuarsiorluni nalliuttorsiortoqarpoq, tassani Peqqissutsimut inunnullu Innarluutilinnut Naalakkersuisoq Anna Wangenheim ilinniarnerminnik naammasserlaanut oqalugiarpoq.
– "Ullumikkut ulloq ilissi ulloraarsi. Sulerulussimanersi - unnuit sinilluarfiusimanngitsut, qularnerit ajugaanerillu - kinguneri maanna pingaarutilimmik misigiffigaarsi,” allagartartaartut piumassuseqarnerat, pinertusaarnerat sapiinnerallu erseqqissarlugit taama Nalaakkersuisoq oqarpoq
Anna Wangenheimip ilinniarnerup pingaaruteqassusia inuunermi angalanertut aamma inuit ataasiakkaat inuiaqatigiillu siunissaannut aningaasaliinertut oqalugiarnermini erseqqissarpaa. Ilinniartut iliuuseqarnerat nersualaarpaa taakkulu piginnaasaasa Kalaallit Nunaat tamakkerlugu pisariaqartinneqarnerat erseqqissarpaa – peqqissutsimut, ilinniartitsinermut, kulturimut suliassaqarfinnulluunniit allanut pingaarutilinnut isernersut apeqqutaatinnagu.
Amerlanerusut oqaatsitik namminneq atorlugit ilinniarsinnaanerisa kulturillu tungaatigut imminnut tarrarsorsinnaanerisa pingaaruteqassusiat Naalakkersuisup erseqqissarpaa. Eqaatsumik piviusumullu qanittumik aaqqiissuteqarnikkut Ilisimatusarfimmi peqqissaasut kandidatinngorniarlutik ilinniarsinnaanerisa ajornannginnerulersinnaanera assersuutitut tikkuarpaa.
– " Sulianut tunngasut taamaallaat nukittuffiginngilasi – aammali maligassiuivusi. Ilinniagartuut kalaallisut oqaasillit amerlanerusut inuiaqatigiit ineriartornerannut suli peqataasinnaanerunerannut aqqutissiuussivusi,” taama Anna Wangemheim oqarpoq.
Naggasiutigalugu allagartartaartut iliuuseqarnerannut qutsavigai aamma misilittakkaminnik atorluaanissaannut nunamullu tamarmut iluaqutaasumik nukittuffimminnik inuunerminni atorluaanissaannut kajumissaarpai.
– "Qujanaq aqqut taanna toqqarassiuk. Qujanaq aalajangiusimagassiuk. Qujanarlu sapiillusi, nukisi uummatisilu atorlugit Kalaallit Nunaata siunissaanut ilusilersueqataagassi.”
Paasisaqarnerorusukkussi immikkoortortaqarfimmi pisortaq Laila Skydsbjerg Skytte oqarasuaammut: +299 34 65 81 e-maiimulluunniitl: liss@nanoq.gl attavigisinnaavarsi.