Nunani Avannarlerni Aalisarnermut Tukertitsiveqarnermullu, Nunalernermut Inuussutissanut Oripassualerinermullu Ministerit Siunnersuisoqatigiivisa ataatsimiinnerat

Aalisarnermut, Piniarnermut, Nunalerinermut Imminullu Pilersornermut Naalakkersuisoq, Peter Borg, Nunani Avannarlerni Aalisarnermut, Nunalerinermut, Inuussutissanut Orpipassualerinermullu Ministerit (MR-FJLS) Kuopimi, Finlandimi juunip 12-ianni 2025-mi ataatsimeeqataavoq.

Finlandimi Nunalerinermut Orpippassualerinermullu Ministeri Sari Essayah Nunani Avannarlerni Ministerit Siunnersuisoqatigiivisa ataatsimiinnerannut qaaqqusisuuvoq.

Ministerit Siunnersuisoqatigiivisa ataatsimiinneranni sammisarpassuit oqaluuserineqarput, oqaluuserineqartut ilaat siorna oqaluuserineqartuullutik, tassaallutik inuussutissanik nukissiuutinillu pilersuinerup isumannaatsuunissaa, nunani avannarlerni uumassusilinnik ataavartumik atuitilluni, bioøkonomi, tamatumani ajornartorsiutinik nalaataqartilluni aniguiniarneq naleqqussarnerlu aamma sammisat allat nutaat sulianut attuumassuteqartut oqaluuserineqarput, soorlu aamma nungusaataanngitsumik nunalerineq aamma immap pisuussutaanik aningaasarsiorneq inuusuttullu inuussutissalerineri aamma oqaluuserineqarlutik.

Nunani Avannarlerni suleqatigiinneq aatsaat taama pingaaruteqartigaaq, suliniuterpassuillu nunat nunani avannarlerni suleqatigiinnermut 2025-mi 2030-mut pilersaarummi aallartinneqassapput.
Nunani qanigisatsinni eqqissiviilliortoqarlunilu sorsuttoqarpoq, aamma silap pissusiata allanngornerata sunniuteqaleraluttuinnarnera pissutaalluni pingaaruteqalerpoq upalungaarnerulernissamik pisariaqartitsisoqalernera. Aamma piujuaannartitsineq tunngavigalugu inuussutissalerinermi ajornartorsiutinik nalaataqartilluni akiuussinnaassusermik aamma allanut unammillersinnaassusermik pikkoriffeqartariaqarneq.

Taamaammat Nunani Avannarlerni ministerit ataatsimiinneranni Ministerit Siunnersuisoqatigiivisa 2024-mi ataatsimiinnerannit Karlstadimi nalunaarummik nangitseqqinnissaq sammineqarpoq, Nunat Avannarliit COP30-mut ataatsimut nalunaarutaat, inuusuttut inuussutissalerinermi inissisimanerat, inuussutissat immameersut, Nunani Avannarlerni neqinik tunisassiorneq, Nunani Avannarlerni Nerisassat Nutaat, Ny Nordisk Mad.

Pissutsit atuuttut
Nunani Avannarlerni Ministerit Siunnersuisoqatigiiffiat nunani avannarlerni Naa-lakkersuisut pisortatigoortumik suleqatigiiffigaat. Nunani Avannarlerni Ministerit Siunnersuisoqatigiiffianni suleqatigiinneq naalakkersuinikkut ingerlanneqarpoq, nunanilu avannarlerni naalakkersuinikkut ingerlataqartunut ingerlatsivinnullu tunngasuulluni.

Nunani Avannarlerni Ministerit Siunnersuisoqatigiiffianni suliaqarfinni qulini ministerit siunnersuisoqatigiiffeqarput.
Aalisarnermut, Piniarnermut, Nunalerinermut, Imminullu Pilersornermut Naalakkersuisoq ministerit siunnersuisoqatigiiffianni MR-FJLS-imi Kalaallit Nunaannit sinniisuuvoq.
MR-FJLS ministerit siunnersuisoqatigiiffigaat politikkikkut immikkoortunik sisa-manik sammisaqarfiusoq; Aalisarneq immamilu tukertitsiveqarneq, nunalerineq, inuussutissalerineq aamma orpippassualerineq. MR-FJLS Nunani Avannerli ministeriaqarfiit 20-t suleqatigiiffigaat.
MR:FJLS-ip suliassaa pingaarneq tassaavoq pinngortitami uumassuseqartullu sananeqaasiini pisuussutit inuit inuunerannut pisariaqartut piujuartitsilluni ator-neqarnerisa siuarsarnissaa. MR-FJLS-ip nerisassat pitsaasuunerannik tatiginnin-nissap pissarsiarineqarsinnaanerisalu qulakkeerneqarnissaa, nunani avannarlerni innuttaasut peqqinnerunissaannut tapersiisunik nerisaqartarnerup siuarsarnissaa aamma nunani avannarlerni nerisassiassani nerisaqartarnermilu periarfissat ineriartortinnissaat sulissutigai. Ministerit siunnersuisoqatigiiffianni sulinermi immikkoortoq pingaartoq tassaavoq ilisimatusarnerup ineriartortsinerullu suliamut attuumassuteqartut pitsanngornissat siuarsarnissaallu.

Aalisarnermik suliaqarnermi aalisarnerni pinngortitami ataqatigiinnerup mianerineqarnissaa pillugu tunngavik erseqqissarlugu, inuussutissarsiummi teknologimik ineriartortitsineq siuarsarlugu ilaatigut sammineqartarput aammalu aalisakkat immami avatangiisini peqqinnartumiittut nerisassaanissaat suliniutigalugu uumassusillit piuartinneqarnissaat sammineqartinneqalersarpoq. Avatangiisinik mianerinnilluni aningaasarsiornermi aamma imminut nappassinnaasumik aningaasaqarnermi ilaatigut sinaakkutaasumik atugassaritinneqartut aalisakkanik tunisassiasiorfiit naleqartitsilersarnerannik annertusisitsisinnaasut sammineqartinneqalersarput. Inuit atugaasa imminut nappassinnaanerannik suliaqarnermi sinaakkutaasumik atugassaritinneqartut atugarissaarnermik qulakkeerinnissutaasinnaasut ineriartortinneqarnerat aamma sinerissani innuttaasut siunissami periarfissaasa ineriartortinneqarnerat siuarsarneqassapput.


Sukumiinerusumik paasisaqarusukkaanni immikkoortortaqarfimmi pisortaq Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl