Nuummi Blok 2-mi nutaaliorluni iluarsaassineq: Sanariaatsimi nutaami illup silami qalliutaannik iluarsaassineq pitsaanerulersinneqassaaq

Nuummi Blok 2 misileraanermi nutaami pissanganartumilu, Namminersorlutik Oqartussat inissiaataasa iluarsaanneqarnerini illut qalliutaannik iluarsaasseriaatsimik pitsannguisussami qitiussaaq. Pitsaasunik angusaqarnissaq, aammalu innuttaasut ulluinnarni inuunerannut annikinnerpaamik akornusersuinissaq immikkut siunnerfigineqarluni, suliassaq Namminersorlutik Oqartussat siunissami ungasissumi inissianik peqqinnarnerusunik nukissiutinillu atuinikinnerusunik pilersitsiniarnermi suliniut alloriarneruvoq pingaarutilik.

Illu aserfallassimasoq – aamma allannguinissamik pisariaqartitsiffiusoq
Blok 2 1968/69-mi sanaajusoq, aammalu ilaqutariinnit 44-nit angerlarsimaffiusoq qanganitserpoq. Qaliata, matuisa, igalaavisa taluisalu ussiinnerat peqqutaallutik illup silataata qalliutai annertuumik iluarsaanneqartariaqalersimapput.

Taamatut suliaqarnermi nalinginnaasumik najugaqartut tamarmik inissianit nuutsinneqartariaqartarnerat maannamut unammilligassat annersarisimavaat – tamatumalu naammassinissaa ajornakusoortarpoq, inissiat inoqanngitsut, inisseeqqinnermut atorneqarsinnaasut amerlassutsimikkut killeqarmata.

Taamatut ajornartorsiuteqarnermi Nuuk kisiartaanngilaq, nunali tamakkerlugu atuulluni.

Sanariaaseq nutaaq inisseeqqinnermik pisariaqartitsiffiunngitsoq
Taasinge Elementer A/S suleqatigalugu maanna sanariaaseq nutaaq misilerarneqassaaq, tassanilu illup silataata qalliutai tamarmik – talui, matui igalaavilu ilanngullugit – sanaartornermi atortunik piareeriikkanik toqqaannartumik taarsersorneqassapput.

Iluaqutissaq annertooq? Najugaqartut iluarsaassinermi inissiani najugaqaannarsinnaapput, aammalu iluarsaassinerpiaq nalinginnaasumik iluarsaassisarnernit sukkanerusumik ingerlanneqarsinnaavoq.

Illup qalliutai tulleriiaarlugit taarsersorneqassapput: Silami iigatoqqat peerneqartassapput, aammalu taluinut qalliutit nutaat tamakkiisumik ikkunneqartassapput. Taamaallaat inoqutigiit arfinillit allamut inissikkallarneqassapput, taakku isaariaat piffissami sivikitsumi sunnerneqartussaammata. Tamanna ileqquusunik aaqqiisarnermut, tassalu illuummi najugaqartut tamarmik amerlanertigut silami illup qalliutaata iluarsaanneqarnerani nuutinneqartariaqartarnerinut sanilliullugu annertuumik pitsannguutaasussaavoq.

Inuplan A/S suliassami ingeniøritut siunnersortigineqassaaq, kiisalu ILJ Entreprise sanaartugassanik isumaginnittuussaaq. INI A/S-ip attartortunut attaveqarneq isumagissavaa.

Nutaanik iikkersuinermit annertunerusoq – tamakkiisumik iluarsaassineq
Silami qalliutit nutaanngornissaasa saniatigut aamma suliassami suliarineqassapput:

• Qalianik iluarsaassineq
• Oqorsaaneq pitsaanerusoq
• Majuartarfeqarfinni qalipaaneq
• Tusass A/S suleqatigalugu internetimik atuisinnaanerup pitsanngorsarneqarnissaa, taamaalillunilu Blok 2-mi atuisut siunissami 5G-mik atuisinnaalernissaat.

Suliassaq najugaqartunut inissiat iluisa silaannarinnerulernerinnaannik inissiallu pitsaanerulernerinnaannik isumaqassanngilaq, aammali nukissiutinut sipaagaqarnissaq naatsorsuutigineqarpoq. Illup talui nutaat inissianik ussinnerulersitsissaq, taamaalillunilu kissaq aniasoq annertuallaarunnaassaaq, taamaattumillu kiassarnermik pisariaqartitsineq annikinnerulissalluni. Naalakkersuisoqarfiup suliassamik nalilersuineranut atatillugu sipaagassarpiaat annertussusii misissorneqassapput.

Siunissami iluarsaassisarnissamut alloriarneq pingaarutilik
Blok 2-mi misileraanerup siunissami nunatsinni iluarsaassisarnermi periusissiornerup ineriartornerani pingaarutilittut alloriarfiunissaa naatsorsuutigineqarpoq. Tassani misilittakkat nunatta sinnerani suliassat assingusut suliarineqartarnissaannut tikkuussisuussapput.

Najukkani nukiit salliussapput, immikkullu ittumik ilisimasallit tapertaassapput, aammalu Nuummi siunnerfiit qaffasipput – sulilu angusinnaasat annertunerupput.

Annertunerusumik paasisaqarusunnermi Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigineqassaaq, uunga box909@nanoq.gl