Naalakkersuisoq Bentiaraq Ottosen Ilulissaniippoq, innuttaasut isumaannik qitiutitsinissamik suliaq nanginniarlugu

Assit: Aviaq Nielsen Qvist

Ippassaq – 17. juuni 2025-mi – Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen Ilulissiarluni aallarpoq. Ilulissaniinnermini ullormi siullermi ilaatigut Avannaata Kommuniani borgmesteri Lars Erik Gabrielsen pilersitsiviulluartussamik ataatsimeeqatigaa. Oqaloqatigiinnermi pissutsini atuuttuni unammilligassat eqqartorneqarput – kisiannili aamma isumaginninnermi, eqqagassalerinermi suliffeqarnermilu periarfissat eqqartorneqarlutik. Tassunga tunngatillugu Naalakkersuisut aamma Avannaata Kommuniata akornanni suleqatigiinnerup ataqatigiissaarinerullu akuusunit tamanit kissaatigineqartoq oqaatigineqarpoq. Naalakkersuisup Bentiaraq Ottosenip Ilulissanut tikeraarnera, Bentiaraq Ottosenip innuttaasut– tassalu politikkikkut aalajangiinerit aallaavigisaanni – isumaannik qitiutitsinissamik suliaqarneranut ilaavoq.

Ippassaq pilersitsiviulluartussamik ataatsimeeqatigiinneq Isumaginninnermut, Suliffeqarnermut, Nunamut Namminermut Avatangiisinullu Naalakkersuisup Bentiaraq Ottosenip aamma Avannaata Kommuniani borgmesterip Lars Erik Gabrielsenip akornanni ingerlanneqarpoq. Ataatsimiinnermi oqallisigineqartut ilaat Ilulissani nunaqarfiinilu eqqakkat amerliartornerinut tunngasuuvoq. Eqqagassalerineq ukiuni arlalinni ajornartorsiutaasimavoq, nuna tamakkerlugu taamatullu kommunit annertuunik aningaasaliiffigisariaqarsimasaat. Taamaattumillu oqaloqatigiinnermi aamma eqqagassat ajornartorsiutaanerisa kommunip aamma Naalakkersuisut akunnerminni suli qaninnerusumik suleqatigiinnerisigut periusissiornikkut qanoq ililluni iluarsineqarsinnaanersoq aallaavigineqarpoq.

”Kommunimi eqqagassalerinermik suliallit pissutsit naleqqutinngitsut atorlugit sulisariaqarnerannik oqaluttuunneqarnera uannut sunniuteqartorujussuuvoq. Sulisut eqqagassalerisut – innuttaasullu eqqagassarpassuit akornanni inuusut – attanneqarsinnaasunik tamanullu iluaqutaasunik aaqqiiffigisariaqarpagut. Eqqaariaatsinik, najukkani atorsinnaasunik, pingaarnerpaatulli aamma innuttaasut peqqissusaannut, pinngortitamut najukkatsinnut avatangiisitsinnullu illersuiffiusinnaasunik pilersitsisoqassaaq. Paasivara najugaqarfinnit ataasiakkaaniit eqqakkanik ikuallaavinnut nutaanut assartuussisarneq suli unammillerfiusoq, aamma maani Avannaata Kommuniani. Kisiannili isumaqarpunga, kommunit suleqatigalugit – aamma suliatsialaat ingerlanneqareersut aqqutigalugit – ilutsimik, ammaannartumik ikuallaasarnernik ulorianartorsiortitsisunik atorunnaarsitsiffiusussanik pilersitsisinnaalluta. Borgmester Lars Erik Gabrielsenip ataatsimeeqatiginerani paasivara, Avannaata Kommuniata eqqagassalerinermi akisussaaffitsik ilisimaarigaat – aammalu qanittumik suleqatigiinnitsigut eqqagassalerinermi aaqqiissutissanik piumasarineqartunik pisariaqartunillu pilersitsisinnaasugut. Naalakkersuisuniit kommuninut Avatangiisinut Aningaasaateqarfimmiit aningaasat atorlugit tapersersuinerput ingerlatiinnassavarput, nuna tamakkerlugu eqqagassalerinermik avatangiisinut peqqissutsimullu illersuiffiusinnaasumik pilersitsiniassagatta”, Isumaginninnermut, Suliffeqarnermut, Nunamut Namminermut Avatangiisinullu  Naalakkersuisoq Bentiaraq Ottosen oqarpoq. 

Suleriaatsit nutaat suliffeqarnermi periarfissanik nutaanik pilersitsiffiussapput
Aamma ullormi siullermi Naalakkersuisoq Bentiaraq Ottosen Majoriami siusinaarluni soraarnerussutisialinnik nalileeqqittarneq suliffissarsiornermilu pisartakkat pillugit inatsimmut nutaamut suliniutaasut pillugit saqqummiussiffigineqarpoq. Ilulissani nalilersueqqinnermi ilaatigut innuttaasut 52-it suliffeqarnermut akuuleqqinnissamut, taamaalillutillu inuiaqatigiinnut ikorfartueqataalernissamut periarfissinneqarsimapput. 

”Ataatsimiinnermi Avannaata Kommunianit oqaatigineqarpoq kommunimi sulisussaaleqisoqartoq – ilinniarsimasunik ilinniarsimanngitsunillu. Taamaattumik siusinaartumik soraarnerussutisialinnik nalilersueqqinnermi suliniutaat, taamatullu suliniuteqarnerup sunniutigisinnaasai: najukkami inuiaqatigiinnut aamma inuiaqatigiinnut tamatsinnut, taamatullu pingaaruteqartigisumik suliniutit inunnut, maanna suliffeqarnermi ataatsimoorfinnut, inunnut ataasiakkaanut isumaqartitsilersinnaasunut qilersorsimannginnermillu annerusumik pilersitsiffiusunut ilaalersimasunut sunniutaat tusarnaarlugit isumassarsiorfigilluarpakka. Suliniutini ersarissumik takutinneqarpoq, pissutsit allatut iliuuseqarfiginissaat, suleqatigiinnissaq innuttaasullu naligalugit naapinnissaat qunusuiffigigaanni iluaqutissarpassuit pissarsiarineqarsinnaasut. Ilulissani suliniuteqarluartut maligassiuisullu, pingaartumik inuusuttunut suliffeqanngitsunut isumassarsiuisinnaasut amerlapput”, Naalakkersuisoq Bentiaraq Ottosen oqarpoq. 

Aamma Ilulissani tikeraarsimanermi pisoq nalliuttorsiornartoq kusanartorlu orninneqarpoq. Tassalu Naalakkersuisoq Bentiaraq Ottosen ilinniartorpassuarnut, Perorsaanermik Ilinniarfimmi (SPS) ilinniakkaminnik naammassinnittunut oqalugiariartoqquneqarluni qaaqquneqarpoq. 

”Soraarummeertunit arlallit oqaatigaat, ilinniarnerminni piginnaaneqarfiit inerisakkatik ilinniakkatillu innuttaasunit amerlasuunit pisariaqartinneqartut. Soraarummeertut inunnik ajornartorsiortunik naleqartitsillutik aammalu inuunerminni killiffiinik ataqqinnillutik naapitsisartussaapput. Soraarummeertut suliassatik qanoq tunniusimaffigitigineraat malugalugu killitsinnartorujussuuvoq – aamma pisinnaasaminnik atuilernissaminnik, taamaalillutillu inunnut ikiuinnerminnik ingerlatitseqqissinnaanissaminnik kissaateqarnerat ersarissumik malugineqarsinnaavoq. Soraarummeertut tamatsinnut maligassiuisuupput, neriuppungalu piffissami sivisoorsuarmi ullumi malugisattut imminnut suliatillu tulluusimaarutigalugit suliinnarsinnaassasut”, Naalakkersuisoq Bentiaraq Ottosen oqarpoq. 

18. juunimi Kulturip Illorsuani Sermermiuni innuttaasut ataatsimeeqatiginerini innuttaasut qitiutinneqassapput
Naalakkersuisup Bentiaraq Ottosenip tikeraarsimanera ullumi 18. juunimi ingerlaqqissaaq, nal. 19:00-imiit 21:00-imut Kulturip Illorsuani Sermermiuni innutaasunik ataatsimiititsisoqassalluni. Bentiaraq Ottosen innuttaasunik ataatsimiititsinermi utoqqaat pillugu politikkissaq, inuunerinneq, sulisussanik tikisitsisarneq pillugu inatsimmi allannguutit, kommunit ilusiligaaneri, soraarnerussutisianik aaqqissuusseqqinneq naggataagullu eqqagassalerineq pillugit saqqummiussissaaq. Innuttaasulli ataatsimiinneranni pingaarnertut innuttaasut apeqquteqarnissamut, isummersuutiminik inissinnissaannut nipimillu tusaaneqarnissaannut periarfissaqassapput. 

”Neriuppunga innuttaasunit amerlasuut akisussaaffeqarfimma iluani suliassat, aammalu innuttaasut ulluinnarni pingaartitatik tamaasa pillugit oqaloqatiginiarlunga pingasunngornerup unnua atulaarusussagaat. Marlussoriarlunga oqaatigeriikkattut, innuttaasut uanga akisussaaffeqarfigisanni politikkimi suliarineqartumi imminnut takusinnaanissaat pingaartippara. Innuttaasut Naalakkersuisuni politikkimi ingerlanneqartumi imminnut takusinnaassappata, siullertut pingaarnertullu tusarnaartariaqarpagut. Innuttaasut akuutinneqarlutik misigissapput, aammalu ajornartorsiutit ulluinnarni naammattoortagaat ilungersuukkivut malugissavaat. Lars Erik Gabrielsenillu oqaloqatigiinnitsinni isumaqatigiissutigisatsitut, aaqqiissutissanik pilersitsiniarnermi innuttaasuik qitiutitsinissarput pingaarnerpaajuvoq”, Isumaginninnermut, Sulliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen naggasiivoq. 

Naalakkersuisoq Bentiaraq Ottosenip soraarummeertunut oqalugiaataa
Naalakkersuisup Bentiaraq Ottosenip Perorsaanermik Ilinniarfimmi (SPS) soraarummeertunut oqalugiaataa tamakkerlugu atuarneqarsinnaavoq, uani.

Attaveqarfissaq
Annertunerusumik paasisaqarusunnermi naalakkersuisup allattaa Anders Samuelsen tlf.: +299 27 02 36-mut imaluunniit e-mail: pan@nanoq.gl aqqutigalugu attaveqarfigineqassaaq