Naalakkersuisup Bentiaraq Ottosenip Kalaallit Nunaata kujataani ulluinnarni inuuneq, innuttaasut oqaluttuaat aaqqiissutissatullu siunnersuutaat isumassarsiorfigai

Sapaatit akunneranni matumani Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen Kalaallit Nunaata kujataani sapaatit akunneranni ataatsimi angalareerluni Nuummut uterpoq. Angalanermi utoqqarnut politikki, sulisinnaasut, kommunalbestyrelsimi ilusiliinerit, utoqqalinersiaqarnermik aaqqissuusseqqinneq eqqagassalerinerlu eqqartorneqarput, kisiannili aamma inuusuttut, utoqqaat kommuninilu sulisut saarliusut amerlasuut qanilaartumik pissarsiaqarfiulluartumillu oqaloqatigineqarput. Kalaallit Nunaata kujataani angalanermi innuttaasut tusarnaarneqarnissaat, aammalu nipaasa Naalakkersuisut politikkiinik siunissamilu suliniutissanik ilusilersueqataatinneqarnissaat siunertarineqarpoq.

Ineriartortitsinermi pissusiviusut – innuttaasut najukkaminni atugaat – aallaavigineqassapput
Naalakkersuisoq Bentiaraq Ottosenip Kalaallit Nunaata kujataani Qaqortumi innuttaasut ataatsimiitinneqarnerinut ornigarneqarluartumut peqataareerluni, Narsami aamma Qaqortumi eqqaavissuarnik takuniaareerluni, borgmesteri Malene Vahl Rasmussen Kommune Kujallermilu kommunalbestyrelsi suliniuteqallaqqissoq ataatsimeeqatigereerlugit, aammalu Utoqqaat oqaaseqartartuat ataatsimeeqatigereerlugu angalanini naammasseqqammerpaa. Naalakkersuisoq Bentiaraq Ottosen Qaqortumi eqqaavissuarmiit qatserutaasivimmut – Majoramiit utoqqaat illuinut Luuvikasimmut aamma Qaqortumi Ajarsivasimmut takuniaanermini akisussaaffeqarfini pillugit innuttaasunit paasisimaarinnilluartunit naapinneqarpoq. Aamma siunissamut aaqqiissutissat ilusilerniarneqartillugit akisussaaffiillu kivinneqartussaatillugit innuttaasut nipaasa pingaaruteqarnerat uppernarsivaa. Akisussaaffeqarfinni kivitassani ataatsimut aallaaviusussaq tassaavoq akuutitsineq:

”Innuttaasut assigiinngitsunik ukiullit naapippakka – aamma inuusuttunit suliffissaaleqisuniit utoqqaallu sullinneqarneriniit kommunip ilusiligaaneranut oqallisigaagut. Qatserisartunik, inunnik sullissisunik eqqaavilerisunillu oqaloqateqarpunga: tassalu inuit, Kalaallit Nunaata kujataani avatangiisinik eqqiluitsitsiniarlutik, aammalu innuttaasunik toqqissisimatitsiniarlutik qanilaarlutillu sulisut tamaasa. Allatut oqaatigalugu Kalaallit Nunaanni ulluinnarni inuuneq inuuffigisaq takuara”, Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen oqarpoq nangillunilu:

”Nunatsinni innuttaasut tamarmik atugaasa piviusut politikkimi, akisussaaffeqarfinni suliarineqartumi ersinnissaat pingaartippara. Taamaattumillu aamma isumaqarluinnarpunga, innuttaasut tusarnaarluarneqartariaqartut. Innuttaasut akuutinneqarlutik misigissapput, aammalu unammillikkatik politikkikkut suliniutini pisariaqarluinnartuni aallaavigineqarnerat malugissavaat. Tamannarpiaq aamma peqqutigalugu Kalaallit Nunaata kujataanut angalanissara, tassanilu nipinik tusarnaarnissara uannut pingaaruteqarsimavoq. Aaqqiissutissanik pilersitsisoqarniartillugu innuttaasut qitiutittussaavagut.”

Innuttaasut nipaat siunnerfileeqataassapput – politikki malinnaassaaq
Naalakkersuisoq Bentiaraq Ottosen tikeraarsimanermini Qaqortumi innuttaasunik ataatsimiititsivoq, tassanilu utoqqarnut politikki, sulisussaaleqineq, soraarnerussutisianik aaqqissuusseqqinneq, eqqagassalerineq, aammalu akuutitsilernissamut politikkimik nutaamik pisariaqartitsineq oqallisigineqarput. Innuttaasunik ataatsimiititsinermut takkuttut amerlapput – aammalu tunniusimalluarneq suli annertuneruvoq. Aamma Naalakkersuisoq Bentiaraq Ottosen utoqqarnut inatsisissamut, sinaakkutissanik toqqissisimanarnerusunik – sulisunut aamma utoqqarnut, nunatsinni utoqqaat angerlarsimaffianniittunut – qulakkeeriffiusussamut pilersaarutiminik saqqummiussivoq. Aamma utoqqaat illuinut, Ajarsivasimmut aamma Luuvikasimmut pulaarnerit utoqqaat pillugit pingaarutilinnik paasisaqarfiupput, taamaalillunilu utoqqarnut inatsisissaq pillugit oqaloqatiginninnerit tigussaasumik inuppalaarnerusumillu ingerlanneqarput. Kiisalu Naalakkersuisup Bentiaraq Ottosenip Qaqortumi innuttaasunik ataatsimiititsinermi erngerluni aallartitassat pillugit eqqarsaatini, aammalu piujuartitsiffiusumik sulisussaqarneq pillugu kissaatini saqqummiuppai. Innuttaasut aaqqiissutissanut peqataanissamut piareersimasut ersarippoq:

”Siunissaq inuiaqatigiit agguagaanerisigut unammillerfiusoq, suliffissaqarnitsinnut utoqqarnillu isumassuinitsinnut isumaqartorujussuaq ornipparput. Utoqqaat asannittumik isumassorneqartariallit nalilimmillu utoqqalisussat amerlanerulertussaapput, tamatumalu peqatigisaanik ukiut eqqarsaatigalugit sulisinnaassusillit ikilisussaallutik. Nunatsinni sumiiffinni amerlasuuni sulisussanik ilinniarsimasunik ilinniarsimanngitsunillu amigaateqarpugut – aamma Kalaallit Nunaata kujataani – aammalu suliffissaaleqisut kisitsisinngorlugit aatsaat nunarput tamakkerlugu taama ikitsigipput. Naalakkersuisuni sulisinnaasut amerlisinniarlugit suliagut annertusitinniarpagut, ilaatigut sulinerup pilerinarnerulersinneratigut, aammalu suliinnartarnermut aaqqissuussineq nutarterniarparput. Inuusuttut suliffeqarnermillu soqutiginninnerat eqqarsaatigalugu maanna inissisimaffigisaanni annertunerusumik naapittariaqarivut isumaqarpunga. Taamaattumik aamma Narsami Majoriamut pulaarnera isumassarsiffigilluarpara, tassani ilinniartitseriaaseq, imminut pilersornermik, aalanermik pinngortitamillu akuutitsiviusoq pilersinneqarsimammat. Aamma inuit amerlanerusut sulilersinneqarnissaat inunnik ilivitsuusumik inuunilinnik pilersitsiviusussaavoq”, Naalakkersuisoq Bentiaraq Ottosen oqarpoq.

Qaqortoq Narsarlu eqqagassalerinerup allanngoriartorneranut aqqutissiuussipput
Maani nunatsinni eqqagassalerineq ukiuni arlalinni ajornartorsiutaasimavoq, nuna tamakkerlugu kommunikkaartumillu aningaasaliissutinik amerlasuunik pisariaqartitsiffiusoq. Tamatuma peqatigisaanik eqqagassalerineq suliaqarfiuvoq, kingunerisai innuttaasut ulluinnarni inuunerminni toqqaannartumik malugineqartartut, taamaattumillu aaqqiissutissanik eqqortunik, najukkani atuutsinneqalersinnaasunik aammalu nuna tamakkerlugu atorsinnaasunik ujartuiffigisaat. Naalakkersuisup Bentiaraq Ottosenip Qaqortumi tikeraarsimanermini eqqagassalerinerup tulleriiaartumik iluarsaanneqarnerata pissutsinik, nunatsinni sumiiffinni allani kissaatiginarsinnaasunik pilersitsiviusinnaanera ersarissumik paasivaa:

”Qaqortumi eqqaavissuaq takullugu qiimmaallannartorujussuuvoq, tassanimi eqqakkat ESANI A/S-imit qanittukkut eqqakkanik nuna tamakkerlugu eqqakkanik ikuallaavimmut assartuussiniarluni tikinnissaata tungaanut immikkoortiterneqarsimapput poortorneqarsimallutillu. Taamatut oqareerlunga oqassaanga, eqqakkatsinnik amerliartuinnartunik isumaginneriaaserput, nuna tamakkerlugu innuttaasut akornanni annilaangatitsiartuinnartoq paasilluarsinnaagakku. Naalakkersuisuniit eqqakkanut nalunaarummut allannguutissatut siunnersuut nassiuteqqammerparput. Oqartariaqarpugut najugaqarfinnit ataasiakkaaniit eqqakkanik ikuallaavinnut nutaanut eqqakkanik assartuussinermi suli unammilligassaqaratta. Kisiannili isumaqarpunga, ilusiliinikkut, piumassuseqarnikkut paasinninnikkullu eqqagassalerinermik, ammaannartumik ikuallaasarnermik unitsitsinermik, eqqakkanik ikuallaavinnut nutaanut assartuussinermik, taamaalillutalu nuna tamakkerlugu eqqagassalerinermik naapertuuttumik ingerlasumik kinguneqartumik pilersitsisinnaasugut Qaqortumi eqqaavissuup ersarissumik takutikkaa”, Naalakkersuisoq Bentiaraq Ottosen oqarpoq.

Siunissami politikki ataatsimoornermik pilersitsissaaq
Naalakkersuisup Bentiaraq Ottosenip Kalaallit Nunaata kujataanut tikeraarnermi naammassinera ersarissumik paasivaa, siunissami akisussaaffeqarfimmini politikkikkut aalajangiisarnerit suliassaqarfimmi kingunerisanik atuisuusut suleqatigalugit pisariaqartut:

”Naalakkersuisuni paasivarput inuttaasut pilersortumik piffissaagallartillugulu iliuuseqartoqarnissaanik – pissusissamisoortumik – taamaalillutalu inuiaqatigiinni najukkatsinni ineriartornermik allannguinernillu kissaatigineqartunik pilersitsinissatsinnik piumasaqartut. Naalakkersuisutut suliat inernerinik sukkasuumik pilersitsisussaavunga, kisiannili aamma aalajangiinerit, qaammatini ukiunilu tulliuttuni pisartussat siunissamut ungasissumut kingunerisassaasa eqqarsaatigineqarnissaat pingaaruteqarput. Qaqortumi innuttaasunik ataatsimiititsinermi aammalu sulisunik salliusunik ataatsimiinninni ersarissivoq, Kalaallit Nunaata kujataani najukkani inuiaqatigiit tunniusimalluartuusut, ajornartorsiutitsinnut aaqqiissutissanik ujartuinissamut soqutiginnilluartuullutik. Tassanilu aamma uppernarsivara, aalajangiinerit pitsaanerpaat inuit pineqartut oqaloqatigalugit pisartussaasut. Piffissami tulliuttumi nunatsinni angalanerma ingerlateqqinnissaanut, taamaalillunilu aamma nunatta sinnerani innuttaasut tusarnaarnissaannut, akisussaaffeqarninnilu sulianut akuutinneqarnissaannut qulakkeerinninnissannut qilanaarpunga. Innuttaasunik ataatsimiititsineq tulleq sapaatit akunnerisa tulianni Avannaata Kommuniani ingerlanneqassaaq.”, Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen oqarpoq.

Annertunerusumik paasisaqarusunnermi naalakkersuisup allattaa Anders Samuelsen tlf.: +299 27 02 36-mut imaluunniit e-mail: pan@nanoq.gl aqqutigalugu attaveqarfigineqassaaq