Naalagaaffeqatigiit ataatsimiinnissaat Attaveqartarnermullu Ataatsimiititaliap Savalimmiuni ataatsimiinnissaa

Naalakkersuisut Siulittaasuata Jens-Frederik Nielsenip Savalimmiut lagmand-iat Aksel V. Johannesen aamma Danmarkip ministeriunera Mette Frederiksen peqatigalugit ataasinngornermi ulloq 16. juni ukiumoortumik naalagaaffeqatigiit ataatsimeeqatigiinnissaat ingerlatissavaa. Ukiumoortumik naalagaaffeqatigiit ataatsimeeqatigiinnerminni politikikkut aningaasaqarnikkullu akunnerminni soqutigisatik eqqartussavaat.

- Politikikkut aningaasaqarnikkullu soqutigisatta pingaaruteqaqisut uani ataatsimoorussatsinni eqqartornissaat qilanaaraara. Ilutigisaanillu nunatta soqutigisai aallaavigalugit sulissaanga, Jens-Frederik Nielsen oqarpoq.

Marlunngornermi ulloq 17. juni Nunanut Allanut, Sillimaniarnermut Illersornissamullu Politikikkut Attaveqarnermut Ataatsimiititaliaq ataatsimiissaaq. Tassani ilaatigut Aningaasaqarnermut Akileraartarnermullu Naalakkersuisoq Múte B. Egede aamma Nunanut Allanut Ilisimatusarnermullu Naalakkersuisoq, Vivian Motzfeldt peqataassapput aammalu danskit savalimmiormiullu aqutsisui ministerillu aalajangersimasut.

Nunanut Allanut, Sillimaniarnermut Illersornissamullu politikikkut Attaveqaatitut Ataatsimiititaliaq 2021-mi inissitsiterluni ataatsimiissimavoq kingusinnerusukkullu naalagaaffeqatigiit ataatsimiinnerannut atatillugu ukiumoortumik ataatsimiinnerit immaqaluunniit pisariaqarfiini ingerlassimallugit. Naapittarnermi siunertaavoq ilisimatitseqatigiinneq, akisussaaffiit Savalimmiuniit, Danskiniit Kalaalliniillu immikkut soqutigisaqarfigineqartut ataqatigiissarlugillu eqqartussallugit.

-Attaveqaatitut Ataatsimiititaliaq taamani oqalliffittut pilersinneqarsimavoq, tassani Kunngeqarfik Danmarkip ataani nunat assigiinngitsut pingasut soqutigisai oqallisigissallugit. Ukiut kingulliit ingerlanerini Kalaallit Nunaat oqalliffimmi tassani annertuumik angusaqarluarsimavoq sulilu arlalinnik eqqartugassaqarluta, Naalakkersuisut Siulittaasuat oqarpoq.

Nunanut Allanut, Sillimaniarnermut Illersornissamullu politikikkut Attaveqaatitut Ataatsimiititaliamut atatillugu tusagassiortunik katersortitsinissaq marlunngornermi ulloq 17. juni Lagmandip Allaffiata (Stokkastovan, Tinganesimi) tusagassiortunik katersortitsisarfianni ingerlanneqassasoq pilersaarutaavoq.

Peqataanissaq uunga nalunaarutigineqassaaq tusagassiuutinut siunnersorti Bjarni Arge, bjarnia@tinganes.fo, kingusinnerpaamik nalunaarfissaq juunip qulingat nal. 07:00

Annerunerusumik paasisaqarusukkuit uku attavigikkit: Naalakkersuisut Siulittaasuata Allattaa Andreas Poulsen, Andp@nanoq.gl +299 34 52 80