EU-p 2024-mi aalisariutinut sineriassortunut 19-iusunut immikkoortunut tapiissutai

EU-mik aalisarneq pillugu isumaqatigiissummut tapiliussamit Kalaallit Nunaanni immikkoortunut tapiissuteqartoqartarpoq. Taammasilluni ESU-p sinerissap qanittuani aalisariutinut 6 meterit qaangerlugit inorlugillu angissusilinnut tapiissuteqartarnerinut EU tapeqqataasarpoq. 

Isumaqatigiissummut tapiliussamut piffissami 2021-2024 aalisarnermut atatillugu EU Kalaallit Nunaannut ukiumut 22 mio. kr.-init missaannik immikkortunut tapiissutisisisarpoq. Aningaasat Kalaallit Nunaanni Aalisarnermut Piniarnermullu Nakkutilliisoqarfimmit, Pinngortitaleriffimmut aammalu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit atugassanngortinneqartarput. 

Aningaasat Naalakkersuisoqarfimmut tunniunneqartut sinerissap qanittuani aalisariutinut 6 meterinit anginerusunut tapiissuteqartanermut atugassanngorlugit Aalisarnermut aningaasaliissutinut immikkoortitanut aammalu Inuussutissarsiutinik siuarsaanissamut atatillugu umiatsiaaqqanut tapiissuteqartarnernut atugassanngorlugit ingerlateqqinneqartarput. Angallatinut 6 meterinit anginerusunut nutaanut sisamanut, motooritaartunut marlunnut angallatigisallu nutaanik atortulersornissaanut kiisalu nutaanik umiatsiaarartaartunut atortui ilanngullugit 12-inut 2024-mi tapiissuteqartoqarpoq.

Aalisarnermut aningaasaliissutinut immikkoortitanut tapiissutit siuliani taaneqartut saniatigut aqutsinissanut pilersaarutinik suliaqartarnernut, angallatinik nakkutilliisarnernut, ERS-imik atuutsilersitsinermut qarasaasiat atorlugit nalunaarsuisalernernut misissuinernullu Pinngortitaleriffimmilu ilisimatusarluni sulianut atorneqartarput. 

2024-mut tunngatillugu nalunaarusiaq Komitép Ataatsimoorfiusup Nuummi ulluni 19-20. maj 2025 ataatsimiinnerani akuerineqarpoq. Tamatuma kingorna EU-p tapiissutissani aningaasaliissutigissavai.

EU-p tapiissutitut aningaasaliissutigisartagai pingasoqiusanngorlugit immikkoortinneqarput: 1) Kalaallit Nunaata imartaani aalisarsinnaanissamut ukiumoortumik akiliutaasartut, 2) pisassanut ataasiakkaanut akiliutaasartut, aammalu 3) aalisarnermut aningaasaliissutinut immikkoortitanut tapiissutit.

Annertunerusumik paasissutissanik pissarserusukkaanni Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfik.

Sukumiinerusumik paasisaqarusukkaanni immikkoortortaqarfimmi pisortaq Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl