Peqqissutsimut ministerip Sophie Løhde-p aamma Naalakkersuisup Naaja H. Nathanielsenip akornanni Naartunaveersaatinik atuisitsineq pillugu suliaq ilisimatitsiviusumik ataatsimeeqatigiinneq

Pingasunngornermi ulloq 7. maj Nunamut namminermut peqqissutsimullu ministeri, Sophie Løhde aamma Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen Københavnimi ataatsimeeqatigiipput.

Ataatsimiinnermi siunertaavoq Naartunaveersaatinik atuisitsisimaneq pillugu suliassaq pillugu ilisimatitseqatigiinnissaq aammalu killiffissiuinissaq. Ilanngullugu ilaatigut Kalaallit Nunaanni aammalu Danmarkimi efterskolini atuartunik kalaallinik ukiuni 1960-imiit 1991 tikillugu ilanngullugulu naartunaveersaatinik atuisitsinermut suleriaasiusimasup arlaannaannulluunniit attuumassuteqanngitsunit qulaajaavigineqarnissaa pillugu suleqatigiit marluk suleqatigiinnerisa, arnat kalaallit 143-t Danskit Naalagaaffiannut eqqartuussivilersuussineranni suliassaq kiisalu Naartunaveersaatinik atuisitsisimaneq pillugu suliassap inuit pisinnaatitaaffiinut tunngasortaannik immikkut ilisimasallit misissuinerisa Naalakkersuisut allartissimasaasa, killiffiat.

Suliap pisariussusaa inuttullu sunniutaasimasut atuuttut ataqqillugit, qanimut aaqqiissutissarsinissamullu sammisumik suleqatigiinnerup ingerlaannarnissaa pisariaqartoq, illuatungeriit isumaqatigiiffigalugu oqaatigaat. Ilanngullugu aaqqiissutissarsinissaq naammassinissaalu siunertaralugit, oqaloqatigiinnerit akuutitseqatigiinnerullu ingerlaannarnissaannut ataatsimoorluni politikkikkut akisussaaffeqarneq. Minnerunngitsumik arnanut kalluarneqartunut tamaginnut.

Naalakkersuisoq Naaja H. Nathanielsen oqarpoq,

”Suliassaq Naalakkersuisut ilungersunartorujussuartut isigaat. Tulleriissaartumik periaaseqarluni suleriaaseq niviarsiaqqanut arnanullu atorneqarsimasoq, inuiaqatigiinni ataasiakkaanut ataatsimoortunilu kingunerlutsitsisimavoq. Suliap ingerlasimanera tamarmi Kalaallit Nunaata aamma Danmarkip akornanni pissaanerup naligiinnginneranut assersuutissarpassuit ilagaat. Pisimasut suliarinissaannut suliassap paasinarsisinnissaa suullu tamaasa saqqummersinnissaat pisariaqarpoq. Taamaattumik Nunamut namminermut peqqissutsimullu ministeri, Sophie Løhde suliaq pillugu pilersitsiviulluartumik oqaloqatigigakku nuannaarutigaara aammalu suliap paasinarsisinnissaa aammalu arnat kalluarneqartorpassuit naapertuilluartumik pineqarnissaat siunertaralugit suleqatigiinnerup ingerlaannarsinnaanissaa qilanaaralugu.”

Nunamut Namminermut peqqissutsimullu ministeri Sophie Løhde oqarpoq:

”Naalakkersuisoq Naaja H. Nathanielsen, pitsaasumik pilersitsiviulluartumillu ataatsimeeqatigiinnermut qutsavigaara, tassani ilaatigut spiralilersuisimanermut suliassaq oqaluuseralutigu. arlaannaannulluunniit attuumassuteqanngitsumik oqaluttuarisaanermilu pisimasunik qulaajaanissaq ataatsimoorlutik Kalaallit danskillu oqartussaasuisa aallartippaat, taamaalilluta tassunga tunngasortai tamaasa qulaajassallutigu aammalu ataatsimoorluta oqaluttuarisaanitsinni kapitali nuanninngitsoq taanna naqqa tikillugu paasisaqarfigissallutigu. Aammalu suliassap alianartup taassuma paasinarsisinnissaa pillugu qanimut suleqatigiinnitta ingerlaannarnissaa qilanaaraara.”

Pissusiviusut:
• Naartunaveersaatinik atuisitsisimaneq pillugu suliassami ilaatinneqarpoq Kalaallit Nunaata 1992-imi peqqissutsimut suliassaqarfik akisussaaffigilerlugu tigunissaa sioqqullugu kingornatigullu naartunaveersaasersuilluni suliniuteqarsimanerit misissorneqarnissaat.
• Naalakkersuisut piffissamut 1960-1991, oqaluttuarisaanermi pisimasunik qulaajaanissaq pillugu danskit naalagaaffiat suleqatigaat
• Naartunaveersaatinik atuisitsisimaneq pillugu suliassap inuit pisinnaatitaaffiinut tunngasortaannik, allanillu 1960-imiit ullumimut naartunaveersaasersuinermi suleriaatsip immikkut ilisimasalinnit misissorneqarnissaat, Naalakkersuisut nammineerlutik aallartippaat.
• Misissuinerit 2025-mi septembarimi naammassissasut naatsorsuutigineqarpoq, tamatuma kingorna Kalaallit Nunaata aamma Danmarkip alloriarnissaq tulleq isummerfigissallugu.
• 2024-mi martsimi kalaallit arnat 143-t, 1960-ikkunni aamma 70-ikkunni nammineq piumassuserinngisaminnik spiralilersissimasut, danskit naalagaaffiat inuttut pisinnaatitaaffimminnik innarliisimasutut eqqartuussisulersuuppaat. Inuit Pisinnaatitaaffiinut Institut-ip eqqartuussivimmi suliassami arnanut tapersersuisunngornissaa, Østre Landsret-ip 2024-mi novembarimi akueraa.
• Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsenip Kalaallit Nunaanni suliassaq pillugu politikkikkut ataqatigiissaarineq isumagisaraa, taamaalillunilu Naartunaveersaatinik atuisitsisimaneq pillugu suliassami ataatsimut isigalugu Naalakkersuisut sinnerlugit oqaaseqarnissamut piginnaatitaalluni.


Naartunaveersaatinik atuisitsisimaneq pillugu suliassamut takussutissiaq nassaarineqarsinnaavoq uani www.naalakkersuisut.gl.

Paasissutissanik annertunerusunik piniarnermi attaveqarfigineqassaaq Naalakkersuisup allattaa Jeanette L. Petersen, jalp@nanoq.gl imaluunniit oqarasuaammut 265476.