Kunngeqarfiup Danmarkip - Kalaallit Nunaat, Savalimmiut Danmarkillu Issittumi Siunnersuisooqatigiinnermut siulittaasoqarfik Norgemit Tromsømi ulloq 12.maj tiguaa

Nunanut Allanut Ilisimatusarnermullu Naalakkersuisoq, Vivian Motzfeldt pisortatigoortumik Norgemiut nunanut allanut ministerianit Epen Barth Eidemit siulittaasoqarfik tigujartorlugu Tromsømut aallarpoq. Tamanna tusagassiortunik katersortitsinikkut malunnartinneqarpoq, tassani tusagassiorfiit nunanit tamalaaneersut najuupput. Tassani Vivian Motzfeldtip kaataq tunniuppa, takutinniarlugu Kunngeqarfiup Danmarkip maanna Issittumi Siunnersuisooqatigiit siulittaasoqarfia tigugaa malunnartinniarlugu.

Issittumi Siunnersuisooqatigiinnermi suli politikkikkut nunanullu allanut attaveqaatitigut naapissinnaaneri suli periarfissaanngillat, taamaammat Issittumi Siunnersuisooqatigiinni sinniisuinit (Senior Arctic Officials) kiisalu Issittumi Siunnersuisooqatigiinnermi Nunat Inoqqaavisa kattuffiineersuniit aallartitat pisortaanik peqataasoqarluni tunniussinissaq pillugu ataatsimiinneq qarasaasiakkut pivoq.

Tunniussinissaq pillugu ataatsimiinnermi allagaatit sulinissamut piffissami siulittaasuuffissami tullermi atugassatut tunngaviliisut akuerineqarput, matumani Romsa/Tromsø nalunaarut (imaluunniit oqaaseqaat), Issittumi Siunnersuisooqatigiinni sinniisut ministerinut nalunaarusiaat kiisalu siunnersuisooqatigiit suleqatigiissitaanut arfiniliusut sulinissaasa pilersaarutai missingersuutaallu.

Vivian Motzfeldtip Kunngeqarfiup siulittaasuuneranut pisussatut pilersaarut Nuummi 11. april ukioq manna saqqummiuppaa. Tassani Kunngeqarfiup Issittumi Siunnersuisooqatigiinni pingaartikkusutai marluk saqqummiunneqarput, Nunat Inoqqaavi aamma Issittumi inuiaqatigiit, aningaasaqarnikkut ineriartorneq piujuartoq aamma nukissiuutinik atuinerup allanngortinneqarnera, Imaq, Issittumi Silaannaap allanngoriartornera Uumassusillillu assigiinngisitaarneri. Pingaarnersiukkat tamarmik nunat inoqqaavinik, nunat inoqqaavisa ilisimasaannik kiisalu inuusuttunik peqataatitsinermik suliaqarfinni assigiinngitsuni sammineqarumaarput. Taakkununnga atatillugu eqqarsartaatsikkut peqqissuseq imminullu toqunnissamut pinaveersaartitsinerit immikkut samminnittoqarumaarpoq.

Oqaatsit issuaqqissaakkat:

Nunanut Allanut Ilisimatusarnermullu Naalakkersuisoq, Vivian Motzfeldt: "Kunngeqarfik sinnerlugu Issittuni Siunnersuisooqatigiinnut siulittaasoqarfiuneq tigusinnaagakku assut tulluusimaarutigaara. Sulinerup aallartinnissaa qilanaarutigaarput, tassani Issittuni Siunnersuisooqatigiinni sulineq issittuni innuttaasunut, avatangiisinut silaannarmullu iluaqutaanissaa qulakkiissavarput. Nunani tamalaani piffissamiippugut artornartumi, kinguneqarluartumillu suleqatigiinneq salliutissavarput. Savalimmiunut Danmarkimullu suleqatigiilluarsimanitsinnut qujavunga, ukiunilu marlunni tulliuttuni Danmarkip nunanut allanut ministeriata Savalimmiunilu Nunanut Allanut Naalakkersuisup suleqatigeqqinnissaanut qilanaarlunga.

Annerunerusumik paasisaqarusukkuit uku attavigikkit:

Nunanut Allanut Ilisimatusarnermullu Naalakkersuisoqarfik ugguuna rsth@nanoq.gl imaluunniit +299 553303