Lars Løkke Rasmussen kaffisoqatigalugu: Københavnimi tallimanngornermi ataatsimiinnerit eqqarsaatersuutillu

Nunanut Allanut Ilisimatusarnermullu Naalakkersusioq Vivian Motzfeldt Nunanut Allanut ministerilu Lars Løkke Rasmussen tallimanngornermi nunanut allanut ministereqarfiup allaffeqarfiani, Det Asiatiske Pladsimi, Københavnimi kaffisoqatigiipput.

Pisortatigoortuunngitsumik ataatsimiinnermi suliat ingerlasut pillugit ilisimatitseqatigiittoqarpoq, tassanilu Naalakkersuisup Vivian Motzfeldtip Issittumi Siunnersuisooqatigiinni siulittaasuutitaqarnissaq, maj-ip 12-ni 2025 aallartittussaq taavaa. 

Nunap inooqqaavi inuillu Issittumi najugaqartut siulittaasuutitaqarnissami immikkut inissisimaffeqarnissaat, Nunanut allanut Ilisimatusarnermullu Naalakkersuisumit erseqqissarneqarpoq.   

Naalagaaffeqatigiinnermut iligiinnullu tunngatillugu ataqqeqatigiittumik tatigeqatigiittumillu attaveqarnissaq pingaaruteqartoq Naalakkersuisoq isumaqarpoq. Tassunga atatillugu Naalakkersuisup Wall Street Journalimi Amerikamiut kilitsissiaqarnikkut sunniiniarnikkullu Kalaallit Nunatsinni ingerlatsinerannik paasissutissat maluginiarpai, isumannartillugillu. Vivian Motzfeldt ima oqarpoq: ”Ikinngutigiit iligiillu akornanni ataqqeqatigiinnissaq tatigeqatigiinnissarlu pisariaqarput, kilitsisiaqarnikkullu ingerlatsineq, taamaattoqarsimappat,  tatiginninnermik ataqqeqatigiinnermillu takutitsisuunngilaq”

Tassungalu atatillugu Kalaallit Nunaata nammineerluni nunanut allanut politikimik ingerlatsisinnaaneranut periarfissanik pilersitsinissap pingaaruteqarnera Naalakkersuisup oqaatigaa, taamaaliornermi naalagaaffeqatigiinni tatigeqatigiinneq ataqqeqatigiinnerlu tunngavigalugit. Tassunga tunngatillugu Vivian Motzfeldt ima oqarpoq: ”Tatigeqatigiinnerput ataqqeqatigiinnerpullu ineriartortinneqassappat, naalagaaffeqatigiinnermi sinaakkutit nutarterneqartariaqarput, aamma tamanna pisariaqartumik tunngaviusumik inatsimmik allannguinissamik pisariaqartitsinermik kinguneqaraluarpalluunniit.”   

Paasissutissat erseqqinnerusut pillugit attavigiuk: naalakkersuisup allattaa Rosa Thorsen, rsth@nanoq.gl +299553303