AtuartigukSullissivikkut tuttunniarnissamut akuersissummik qinnuteqartoqarsinnaaliissaaq pisallu nalunaarutigalugit
Nassiussisuuvoq: Aalisarnermut, Piniarnermut, Nunalerinermut Imminut Pilersornermullu Naalakkersuisoqarfik
Tuttunut umimmannullu akuersissutinik www.sullivik.gl-ikkut qinnuteqarsinnaalernissamut qarasaasiakkut nammineerluni kiffartuunnissamut aaqqiissutip nutaap www.sullissivik.gl -imiittup atulernissaanut atatillugu, 2025-milu tuttunniarnissamut umimmanniarnissamullu pisassat piffissaliussallu pillugit tusarniaaneq aamma aalajangiineq pillugu sukumiinerusumik paasissutissiisoqarnissaa pisariaqalersimavoq, soorluttaaq www.sullissivik-gl-imi periarfissat nutaat pillugit aamma paasissutissiisoqartariaqarluni.
2025-mi tuttunniarnissamut umimmanniarnissamullu pisassiissutit piffissaliussallu inatsisit malillugit Aalisarnermut, Piniarnermut, Nunalerinermut Imminullu Pilersornermut Naalakkersuisumit maajimi tusarniaareernerup kingorna aalajangerneqartarput. Taassuma kingorna 2025-mut pisassiissutit piffissaliussallu Naalakkersuisumit aalajangerneqartut kommuninut, susassaqartunut aamma tamanut nalunaarutigineqarumaarput, taakku pillugit aalajangiisoqareerpat.
Aalajangiisoqareerpat qarasaasiakkut nammineerluni kiffartuunnissamut aaqqiissutissaq nutaaq iluaqutigalugu www.sullissivik.gl -kkut toqqaannartumik akuersissutinik qinnuteqartoqarsinnaalissaaq pisanillu nalunaaruteqartoqarsinnaalissalluni. Aaqqiissut nutaaq aqqutigalugu qinnuteqartut piumasaqaatinik naammassinnittut akuersissutinik erngerlutik pissarsisinnaalissapput, piniarfimmi pineqartumi killeqanngitsumik pisassiisoqarsimatillugu.
Malugeqquneqarpoq killeqanngitsumik pisassiisoqarsimatillugu pineqarmat.
Taamaattorli sumiiffimmi kommunip allaffianut nammineq ornigulluni suli saaffiginnittoqarsinnaassaaq pisarnertullu tuttunniarnissamut umimmanniarnissamullu akuersissutinik qinnuteqartoqarsinnaassalluni.
Tamanna nalunaarutigineqareersutuut juuni-mi pisinnaassaaq, pisassiissutit aamma piffissaliussat pillugit Naalakkersuisoq aalajangeereerpat, tamannalu kommuninut, susassaqartunut aamma tamanut nalunaarutigineqareerpat.
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi immikkoortortaqarfimmi pisortaq Amalie A. Jessen attavigiuk, oqarasuaat.: 34 53 04, e-mail: amalie@nanoq.gl