Peqqinnissaqarfimmi ernisunik sullissinermi aaqqiissuteqarallarneq

Qeqqani Kujataanilu peqqinnissaqarfiup immikkoortortaqarfiani ernisunik sullissinermi Peqqissutsimut Naalakkersuisoqarfimmiit aaqqiissuteqarallartoqartariaqarsimavoq. Peqqinnissaqarfimmi sullissisinnaanissamut piukkunnaateqartunik sulisussaaleqisoqartarnera allannguisoqarneranut pissutaavoq, ilaatigut Qaqortumi Sisimiunilu napparsimmaveqarfinni ernisunut sullissisinnaasunik pilattaalluni nakorsaasinnaasut pisariaqartinneqartut eqqarsaatigalugit. Allannguutit 2025-mut atuupput.

Erninermi upalungaarsimasinnaasunik suliassaqarfimmi illersorneqarsinnaasumik immikkut ittumik ilisimasalinnik Qaqortumi Sisimiullu immikkoortortaqarfianni nakorsassaqannginnerata kingunerisaanik ernisarfeqassanngilaq. Qaqortup immikkoortortaqarfiani ernisarfeqarnera matugallarneqartoq Sisimiuni ulloq 22. april 2025 aallarnerfigalugu ernisarfeqarunnaassaaq.

Kujataani peqqinnissaqarfiup immikkoortortaqarfiani naartusut Nuummi Dronning Ingridip napparsimmavissuani erninissaminnut neqeroorfigineqartassapput. Qaqortup napparsimmaviani 2024-mi inunngortut 14-iupput. Sisimiuni nunaqarfinnilu naartusut Nuummi Dronning Ingridip napparsimmavissuani erniartornissaminnut neqeroorfigineqartassapput. Sisimiut napparsimmaviani 2024-mi inunngortut 39-iupput. Maniitsumi naartusut tamarmik peqqinnissaqarfinnilu marluusuni erninermi ajornartorsiutinngorsinnaasunik aarlerinaatillit Dronning Ingridip Napparsimmavissuani erniartornissaanut ullumikkumiit innersuunneqassapput.

Naartuneq erninerlu anaanaasumut qitornamullu ernumananngitsumik isumannaatsumillu toqqammaveqartillugit ingerlanneqassaaq. Tamanna erninermi ajornartorsiutinngorsinnaasunut peqqinnissaqarfimmi sulisut ilisimasassaanut misilittagaqarnissaanullu annertuumik piumasaqaateqarfiuvoq.

Peqqinnissaqarfik nuna tamakkerlugu erninermut atatillugu toqusartunut najoqqitassat 2002-mi atulersut malillugit suli sulivoq. Najoqqutassat naalungiarsuullutik toqusartut aamma arnat ernillutik toqusartut akornanni ajoqusernissamut aarlerinartut annikillisinniarlugit atuutsilerneqarsimavoq. Najoqqutassani peqqinnissaqarfiup immikkoortuani erninermut upalungaarsimasussanut minnerpaaffittut piumasaqaatit nassuiarneqarput. Erninermut upalungaarsimasut tassanngaannaq pisut, soorlu aanaarnerit, pilatsilluni erninerit aamma arnaasumi meeqqamiluunniit ajoqutinngortut, sulisunit piginnaasalinnit suliarineqartarnissaat qulakkeertassavaat.

Naartusunut ilaqutaasunullu allannguutinut akornutit ajoqutillu pillugit eqqasuuteqartoq peqqinnissaqarfimmi sulisunit maluginiarneqarpoq. Erninerit sumiiffimmi sulisunik piginnaasalinnik illersorneqarsinnaasumik ingerlasuuppata anaanaasup qitornallu isumannaatsuunissaanut aalajangiisuusinnaavoq. Massakkut piffissami Qaqortumi Sisimiunilu qitiusumik napparsimmaveqarfinni tamanna qularnaarneqarsinnaanngilaq.

Ernisussiortunik peqqissutsimullu tunngasumik naartusunut ilaqutaanullu misissuisussanik isumaginnittussanillu Peqqinnissaqarfik Kujataani Qeqqanilu sulisoqaannassaaq.

Ilaqutariit pineqartut tamarmik peqqinnissaqarfimmiit attavigineqassapput. Innuttaasut apeqqutissaqartut sumiiffimmi peqqinnissaqarfiup immikkoortortaqarfianut saaffiginnissinnaapput.

Paasisaqarusukkaanni naalakkersuisup allattaa Nivé Lynge Biilmann, attavigineqarsinnaavoq. +299 23 23 50 imaluunniit e-mail: Nilb@nanoq.gl