Nanoq – Ursus maritimus

Ulloq 27. februar nannunut ulloritinneqarpoq.

Figur 1: Nanoq. Assiliisoq: Kristin Laidre

Nanoq issittumi uumasuuvoq, nanoqatigiinni annersaalluni. Nanoq immap sikua neriniarfissatut angalaffigisarpaa.
Nanoq nunakkut aamma immakkut angalasuuvoq, kisimiillunilu uumasuulluni. Arnaviaq piaqqani ilagisarpai marlunnik ukioqalernissaata tungaanut. Nuliusinnaalertarpoq pingasunik – sisamanik ukioqaleraangami

Figure 2: Nanuaqqat arnami sinitsitaaneranni pitoqqasut. Assiliiisoq: Kristin Laidre.

Martsimiit maajimut nuliusarput, ukiut pingasukkaarlugit nuliusarlutik. Arnaviaq qaammatini 7-8 naartusarpoq, apissinilu piaqqisarluni. Nanoq piaqqigaangami ukiorsuaq apissiminiittarpoq. Piaqqat arnaminni ukioq ataaseq marluk miluttarput, marlunnik pingasunilluunniit ukioqaleraangamik namminiilersarlutik.

Nanoqarfiit:

Nunat nanoqarfiusut tassaapput: Kalaallit Nunaat, Nunavut/Canada, USA/Alaska, Norge/Svalbard aamma Rusland.

Kanep Imartorngani aamma Baffinip Ikerani nanoqatigiit Kalaallit Nunaata suleqatigai Nunavut, Canada.

Figure 3: Nittartagaq https://polarbearagreement.org/ tigusaq

Nunarsuarmi nanoqatigiit 20-put
Nunap assingani ilanngussami figur 3-mi takuneqarsinnaavoq nunarsuarmi issittup nanua nanoqatigiit immikkoortut 20-sut. Misissuinermilu paasineqarpoq issittup nanui 25.-26.000-itut amerlatigisut.
Tunumi nannunik 2015-2022 misissuisoqarpoq, nalunaarusiarlugu utaqqineqarluni.

Figure 4: Nunap assinga Pinngortitaleriffimmiit

Silaannaap kissakkiartornera
Nannut pillugit Pinngortitaleriffimmiit Nunavut/Canadarmiut, Norsket, USA-rmiunillu misissuisoqarnikuuvoq ukiuni 2011-2014, misissuinermi misissuiffigineqarsimapput nanoqarfiusut Baffinnip Ikera aamma Kane Imartorngani. Paasisat imaapput, BI-mi nannut silaannaap kissakkiartornerani sunnerneqarsimapput sikup aakkiartornera pissutaalluni, taamaammallu imaq sikuusartoq pingajoraarterummit minnerulersimalluni. Nannut nalunnerulersimapput allaat 100km tikillugu nalussinnaallutik. KI-milu silaannaap kissakkiartornerani nannununut iluaqutaasimavoq, tassani immap sikuusarnerata saalinera nannunut piniarfikkuminarnerulersimalluni.

Sukumiinerusumik paasisaqarusukkaanni Amalie Jessen Aalisarnermut Piniarnermullu Naalakkersuisoqarfimmi immikkoortortami pisortaq attavigineqarsinnaavoq, oqarasuaat 34 53 04, e-mail: amalie@nanoq.gl