AtuartigukNaalakkersuinikkut Ataqatigiissaarisoqatigiinni Naalakkersuisunut ilaasortat tamarmik kiisalu borgmesterit ataatsimeeqatigiipput
Nassiussisuuvoq: Isumaginninnermut, Ilaqutariinnut, Suliffeqarnermut Nunamullu Namminermut NaalakkersuisoqarfikUlluni 29. aamma 30. januar 2025-mi Naalakkersuinikkut Ataqatigiissaarisoqatigiit, Naalakkersuisunut ilaasortanik tamanik nunamilu borgmesterinik inuttaqartut, Nuummi ataatsimiipput.
Ataatsimiinnermi naalakkersuinikkut apeqqutit qitiulluinnartut oqallisigineqarput, tassunga ilanngullugu kommunit aaqqissuussaanerat, Kalaallit Nunaata ineriartorneranut aamma kommunit akornanni aammali nuna tamakkerlugu oqartussat ilanngullugit suleqatigiinnermut isumaqartoq.
Siusinnerusukkut kommunit aaqqissuussaanerannut uteqqinnermi allaffissornikkut ingerlatsinermut aningaasartuutit pillugit nassuiaat pillugu BDO saqqummiivoq.
Nunamut Namminermut Immikkoortortaqarfik kommunit pillugit oqaluttuarisaanermi pisut pingaarutillit 1950-imiit maannakkumut pillugit saqqummiivoq.
Naalakkersuinikkut Ataqatigiissaarisoqatigiit aalajangerput, aaqqissuusseqqinnermut ataatsimiititaliamik pilersitsisoqassasoq, pisortat ingerlatsinerannik aaqqissuusseqqinnissaq pillugu inassuteqaatinik isumaliuutissiissusiortussaq.
Ataatsimiinnermut atatillugu Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane, oqaaseqarpoq:
”Nuannaarutigaara, aaqqissuusseqqinnermut ataatsimiititaliaq pilersinneqassammat, pisortat ingerlatsinerannik aaqqissuusseqqinnissaq pillugu inassuteqaatinik isumaliuutissiissutinik suliaqartussaq, Naalakkersuinikkut Ataqatigiissaarisoqatigiinnut Inatsisartunullu saqqummiunneqartussat.”
Borgmesterit oqaaseqarput, Naalakkersuinikkut Ataqatigiissaarisoqatigiinni ataatsimiinneq iluatsilluartoq, oqallinnissamut eqimattatullu immikkut sammisaqarnissamut inissaqartitsilluartoq.
Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisoq, Jess Svane, ilanngullugu oqaaseqarpoq:
”Nuannaarutigaara pisortat ingerlatsinerat pitsanngorsaaffiginiarlugu suliaqartoqarnera. Ataatsimiinnermi peqataasut tunniusimapput qiimallutillu. Anguniagaq tamanna angunissaanut Naalakkersuisut kommunillu akornanni suleqatigiinneq aalajangiisuulluinnarpoq.”
Naalakkersuinikkut Ataqatigiissaarisoqatigiit Naalakkersuisut kommunillu akornanni suleqatigiinneq nukittorsarniarlugu aamma ineriartornermut piujuartitsisumut ilanngutitsisumullu tigussaasumik alloriartoqarnissaa qulakkeerniarlugu sulinertik ingerlatiinnassavaat.