Pigisanik aalaakkaasunik pisinermut aamma nunaminertanik atuisinnaatitaanermut maleruagassat nutaat

Naalakkersuisut aamma Inatsisartut Aningaasaqarnermut Akileraartarnermullu Ataatsimiititaliaata inuit suliffeqarfiillu arlaasa pigisanik aalaakkaasunik pisisinnaaneri aammalu nunaminertanik atuisinnaaneri pillugit oqaasertaliussaq akuersissutigaat.

Naalakkersuisoq Hans Peter Poulsen oqarpoq: ”Nuummi Ilulissanilu nunani tamalaani mittarfiit ammarneqarneranni nunatta nunanit tamalaanit soqutigineqarnera annertusivoq. Nunami pissutsit atuuttut Kalaallit Nunaata soqutiginninneqarnernik eqqumaffigineqarneranillu sakkortusaataaginnarsimapput. Nunanit allanit nunatsinni pigisanik aalaakkaasunik pisinissamut soqutigineqartoq takutinneqartarpoq. Ilaatigut inissianik iluanaarniutissanik pisiortornissaq pinngitsoortinniarlugu inuit suliffeqarfiillu kikkut Kalaallit Nunaanni pigisanik aalaakkaasunik pisisinnaanersut, kiisalu nunaminertanik atuinissamut akuersissutinik pissarsisinnaanersut pillugu maleruagassanik arlalinnik aalajangersaasoqarnissaa Naalakkersuisunit kissaatigineqarpoq.”

Kalaallit pigisanik aalaakkaasunik, taakkununngalu pigisat aalaakkaasut najugaqarfittut atorneqartut ilanngullugit, niueruteqarneranni niuerfik aammalu aningaasalersuinermut periarfissat pioreersut, aningaasaqarnerup annertussusaa kiisalu aningaasarsiat qaffasissusaat tunngavigalugit akinik aalajangersaasarneq neqerooruteqartitsisarnerlu annikitsunnguupput.

Avataaniit pigisanik aalaakkaasunik, nalinginnaasumik Kalaallit Nunaanni aningaasalersuinermi atorneqartartut avaqqullugit pisisoqartalernissaa pigisanik aalaakkaasunik niueruteqarnermi oqimaaqatigiiffiusunik pioreersumik nikisitsinissamut annertuumik ulorianartorsiortitsisussaavoq, aammalu akit aalajangersarneqartarnerinik neqerooruteqartitsisarnermillu, innuttaasut pigisanik aalaakkaasunik pigisaqalernissamut attartornissamullu periarfissaannik ajorseriartitsisumik pilersitsiviusussaalluni.

Tamatuma saniatigut nunanut allanut politikkikkut eqqarsaatigisassat, aammalu Kalaallit Nunaata nunat akornanni innuttaasunik suleqatigiiffigisai tunngavigalugit pigisanik aalaakkaasunik nunanit allaneersut pisisinnaanissaat itigartinneqartariaqartassaaq.

Taamaattumik inuit suliffeqarfiillu kikkut pigisanik aalaakkaasunik pisisinnaanissaannut, aammalu nunaminertanik atugassinneqarsinnaanissaannut maleruagassanik tunngavissanillu arlalinnik aalajangersaasoqarnissaa Naalakkersuisut kissaateqarput.

Maanna nunami politikkikkut pissutsit eqqarsaatigalugit 2025-mut Aningaasanut Inatsimmut oqaasertaliussassatut siunnersuut suliarineqarpoq. Tamatuma kingorna Inatsisartut inatsisissaannut siunnersuut ukioq manna suliassanngorlugu suliarineqassaaq.

Oqaasertaliussaq malillugu inuit suliffeqarfiillu taamaallaat oqaasertaliussami tunngavissatut allattorneqartunik naammassinnissimagunik pigisanik aalaakkaasunik pisisinnaalissapput, imaluunniit nunaminertamik atugassinneqarsinnaalissallutik. Tunngaviusumik inuit danskisut innuttaassuseqartut, imaluunniit inuit ukiuni marlunni kingullerni Kalaallit Nunaanni aalajangersimasumik najugaqarsimasut, aammalu inuit allattorsimaffianni nalunaarsorsimasut kisimik Kalaallit Nunaanni pigisanik aalaakkaasunik pissarsisinnaalissapput. Tamatuma saniatigut pineqartup piffissami tassani oqaatigineqartumi Kalaallit Nunaannut tamakkiisumik akileraartussaatitaasimanissaa piumasarineqassaaq.

Ukiut marluk piumasaqaatigineqarnerat, Aatsitassanut ikummatissanullu inatsit isumassarsiorfigalugu ilusilersorneqarpoq, tassani allassimavoq inuit ukiuni 5-ini kingullerni inuit nalunaarsorsimaffiat malillugu najugaqarsimasut kiisalu Kalaallit Nunaanni tamakkiisumik akileraartussaatitaasimasut kisimik annikitsumik aatsitassarsiornissamut akuersissutinik tunineqarsinnaasut, maani najugaqartut sulisussat imminnut inissiamik pilersornissamut periarfissaqarnissaasa eqqarsaatiginissaanut ataqatigiissillugu.

Ingerlatseqatigiiffinnut aningaasaliisartunut tunngatillugu, ingerlatseqatigiiffiit aningaasaliisartut, inunnit, inunnut Kalaallit Nunaanni pigisanik aalaakkaasunik pisisinnaasunut piumasaqaatinik toqqaannartumik toqqaannanngitsumilluunniit naammassinnissimasunit pigineqartut taasisinnaaffigineqartunilluunniit kisimik Kalaallit Nunaanni pigisanik aalaakkaasunik pisisinnaassapput. Maleruagassat nutaat suliffeqarfinnut maaniittunut akornusiisussaanngillat, tassami siunnersuut taamaallaat oqaasertaliussap akuerineqarnerata kingorna pisinermut sunniuteqartussaammat kiisalu immikkut ittumik akuersissuteqarnissamut periarfissamik imaqarluni.

Inuit suliffeqarfiilluunniit tunngavissanik naammassinnissimanngitsut tamatuminnga saneqqutsinissamut Naalakkersuisunut qinnuteqarsinnaassapput. Immikkut ittumik akuersissuteqarnissamik qinnuteqaatsip Naalakkersuisunit suliarineqarnera, pisinissap Kalaallit Nunaanni najukkamilu pineqartumi akinik aalajangersaanermut neqerooruteqartitsinermullu qanoq sunniuteqarnissaanik tamakkiisumik naliliineq, kiisalu qinnuteqartumut taassumalu pisinermi siunnerfigisai tunngavigalugit pissaaq. Inuit suliffeqarfiilluunniit tunngavissanik naammassinnissimanngitsut tamatuminnga saneqqutsinissamut Naalakkersuisunut qinnuteqarsinnaassapput. Immikkut ittumik akuersissuteqarnissamik qinnuteqaatsip Naalakkersuisunit suliarineqarnera, pisinissap Kalaallit Nunaanni najukkamilu pineqartumi akinik aalajangersaanermut neqerooruteqartitsinermullu qanoq sunniuteqarnissaanik tamakkiisumik naliliineq, kiisalu qinnuteqartumut taassumalu pisinermi siunnerfigisai tunngavigalugit pissaaq.

Tamatumunnga qinnuteqaatit Ineqarnermut Attaveqaasersuutinullu Naalakkersuisoqarfimmut nassiunneqartassapput.

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl