Nuummi tarnikkut peqqissaavissap sananeqarnissaanut siullermeerluni nivariarnissamut qaaqqusissut

Asasakka suleqatit,

Matumuuna Nuummi tarnikkut peqqissaavissap sananeqarnissaanut siullermeerluni nivariarnissamut qaaqquatsigit. Suliassamut aamma ambulancinut oqquisitsiviup portøreqarfiullu sananeqarnissaat ilaasussaapput.

Aaqqissuussineq arfininngornermi 1. februaari nal. 11 Dronning Ingridip Napparsimmaviata napparsimasunut inissiisarfiup eqqaani ingerlanneqassaaq.

Peqqissutsimut Naalakkersuisoq Agathe Fontain, Ineqarnermut Attaveqaasersuutinullu Naalakkersuisoq Hans Peter Poulsen aamma Permagreen Grønland A/S-ip pisortaanera Jeppe Steffensen siullermeerlutik nivariartuussaapput.

Nivariarnerup siulliup pinnginnerani suliamik aqutsisussat sivikitsumik tikilluaqqusissapput. Aaqqissuussineq naggaserlugu sivikitsumik ilassinnittoqassaaq, tassani imeruersaatinik mamartunillu allanik sassaallertoqassalluni.

Malugineqassaaq, aaqqissuussineq silami ingerlanneqartussaammat.

Soqutiginnittut tamarmik tikilluaqqusaapput.

Aaqqissuussinermi nuannersumi inuulluataarnartumilu takunissassinnut qilanaarpugut.

Inussiarnersumik inuulluaqqusilluta,
’Nuummi tarnikkut katsorsaavik nutaaq’ pillugu suliami suleqatigiissitaq

Pisussat:
Nal. 11 – Sanaartorfimmut apuunneq
Nal. 11.10 – Suliami suleqatigiissitap tikilluaqqusinera
Nal. 11.20 – Peqqissutsimut Naalakkersuisup Agathe Fontainip, Ineqarnermut Attaveqaasersuutinullu Naalakkersuisup Hans Peter Poulsenip aamma Permagreen Grønland A/S-ip PISORTAANERATA Jeppe Steffensenip siullermeerlutik nivariarnerat.
Nal. 11.35 – Ilassinninneq