Nunatsinni Persorsaasut Kattuffiat (NPK) aamma Namminersorlutik Oqartussat ukiuni tallimani atuuttussamik isumaqatigiissuteqarput

Nunatsinni Persorsaasut Kattuffiat (NPK) aamma Namminersorlutik Oqartussat ukiuni tallimani atuuttussamik isumaqatigiissuteqarput

Akissarsiat qaffanneqarnissaat soraarnerussutisiassallu annertunerulernissaat qitiutinneqarput
NPK susassaqartutullu illuatungiliuttut isumaqatigiissut nutarterlugu ukiuni tallimani atuuttussamik ulloq 16. januar 2025 isumaqatigiissuteqarput. Isumaqatiginninniarnerit eqqissisimasumik, akaareqatigiittumik tigussaasumillu ingerlanneqartut, allannguutit pingaarutillit arlallit pillugit isumaqatigiissuteqarnermik nassataqarput, tassa perorsaasut sulilu atualinngitsunik sullissisut allat akissarsiaasa qaffanneqarnissaat sulinerminilu atugarisaasa pitsaanerulernissaat qulakkeerneqarlutik.

Isumaqatigiissutip atuuffia aamma akissarsianut iluarsiissutit
Isumaqatigiissut nutaaq ulloq 1. april 2024 atuutsinneqalissaaq 31. marts 2029-llu tungaanut atuutissalluni. Aningaasarsiat qaffanneqarnissaasa qulakkeerneqarnissaa siunnerfigalugu sulisoqarsimavoq, pingaartumik perorsaasut suli atualinngitsut pillugit suliassaqarfimmi qitiusutut isigineqartut eqqarsaatigalugit.

Perorsaasumut aallaqqaammut akissarsiaritinneqartartut, tunngaviusumik akissarsiat tapillu aalajangersimasut ilanngullugit, ulloq 1.april 2024 aallarnerfigalugu 29.463,04 kr.-nut qaffanneqarput. Isumaqatigiissutip atuuffia naalerpat akissarsiat taakku 30.062,48 kr.-nut qaffanneqassapput. Atorfinnut allanut tunngatillugu akissarsiat inissititerneri aamma naleqqussarneqarsimapput, taamaalilluni akissarsiat aalajangersimasut ajornakusoortitsisinnaaneri ernumassutiginngikkaluarlugit atorfimmi siuariartornissamut kajumissuseqarnerulertoqassaaq.

Soraarnerussutisiassat ukkatarineqarnerusut
Isumaqatigiissummi allannguutit pingaaruteqarnerpaat ilagivaat, sulisitsisut soraarnerussutisianut akiliutigisartagaasa qaffanneqarnerat, akissarsiani soraarnerussutisiaqataalersussat 10,5%-imut qaffanneqarmata. Tamatuma saniatigut illuatungeriit isumaqatigiissutigaat, sulisup soraarnerussutisiassaminut nammineq akiliutigisartagaat isumaqatigiissummut piffissaliussap naanerani 2 %-imiit 5 %-imut qaffassasoq.

Tarnikkut napparsimasunik sullissinermi-tapit
Perosaasut tarnikkut napparsimasunik sullissisartut tapeqalersinneqarput.
Tarnikkut nappaatilinnik isumaginninneq kommunimi suliniutaavoq innuttaasup angerlarsimaffiani, najugaqatigiiffinni imaluunniit najugaqatigiiffinni illersugaasuni ingerlanneqarsinnaasoq, inuillu tarnikkut nappaatillit namminneerlutik isumalimmillu inuuneqalernissamut tapersersorneqarnissaannik siunertaqarluni.

Oqaasertaliussat paasiuminarnerusut suleqatigiinnerlu
Isumaqatigiissutip oqaasertaliorneqarnera pitsaanerulersinniarlugu aamma suliaqartoqarsimavoq, suliffinni ataasiakkaani sulisunut sullissisunullu paasiuminarnerulersillugu.
Aamma NPK-p, kommunit Namminersorlutillu Oqartussat suleqatigiinnerisa pitsaanerulersinneqarnissaa ukkatarineqarsimavoq. Tassunga atatillugu Kommuneqarfik Sermersooq aamma Meeqqanut Inuusuttunullu Naalakkersuisoqarfik NPK-mik peqateqarlutik qanimut suleqatigiittoqarnissaa pillugu oqaloqatigiissimapput, tamatuma saniatigut sulinermi atugassarititaasut pitsaanerulersinniarlugit aamma paasinnissinnaasoqarnerulersinniarlugu inatsisit ilitsersuutillu pillugit tusarniaasarnerit oqaloqatigiissutigineqarsimallutik.

Inaarutaasumik oqaaseqaa
Isumaqatigiissutitigut ersersinneqarpoq, sulisut sulinermi atugaatigut ineriartortitsinermi pingaarutilittut alloriartoqartoq, akissarsianullu aamma sulinermi atugassarititaasunut patajaattumik piffissamilu sivisuumi atugassaqartitsineq qulakkeerneqartoq. Illuatungeriit suleqatigiilluarnerminnik ukiuni aggersuni ingerlatsiinnarnissartik qilanaarivaat.

Paasissutissanik sukumiinerusunik piniaruit inussiarnersumik qinnuigissavatsigit ukununnga saaffiginneqqullutit:

Arnaq Brønlund
NPK-mi siulittaasoq
+299 321044 
arnaq@npk.gl

André Guttesen
Namminersorlutik Oqartussat
+299 346436
andg@nanoq.gl