Præsidentinngortussap Donald Trumpip oqariartuutai kingulliit pillugit Naalakkersuisut tusagassiorfinnut nalunaarutaat

Kalaallit Nunaata namminiilivinnera 
Kalaallit Nunaat kalaallit pigaat – Kalaallillu Nunaata ineriartornera siunissaalu taamaallaat inuiannit kalaallinit aalajangerneqassaaq. Namminiilivinnissamik sorsuutiginninneq kalaallit oqartussaaffigaat. Siunissarput uagut nammineq aalajangigassaralugulu ilusilersugassaraarput. Inuiattut nammineertutut pisinnaatitaaffivut ilisimaaraagut.

Nunat tamat akornanni suleqatigiinneq 
Naalagaaffiit nunallu Kalaallit Nunaannik suleqatiginninnerunissamik soqutigisaqarnissamut tikilluaqqusaapput. Kalaallit Nunaata Namminiilivissup anguniarnerani nunanik sanilitsinnik qaninnermik annertusisamik siunnerfilimmillu suleqateqarnissamut ammavugut. Inuussutissarsiornermik suleqatigiinnermut, nunatsinni aatsitassarsiornerup iluani, nunattalu aatsitassaataanik pingaarutilinnik ineriartortitsinermut immikkoortunillu attuumassuteqartunik allanik periarfissat pillugit Kalaallit Nunaata USA-mik oqaloqatiginninnissani qilanaaraa. 

Trumpip naalakkersuisui 
Kalaallit Nunaata ippassaq, ullumi siunissamilu USA suleqatitut qaninnerit ilaattut suleqatigissavaa. Kalaallit Nunaat ukiut 80-it sinnerlugit illersornissamik USA-mik suleqateqarpoq, suleqatigiinnerlu nunat taakku nunallu killiit tamarmik iluaqutigaat. Præsidentinngortussamik Donald Trumpimik naalakkersuisuinillu attaveqarnermik pilersitsinissaq Naalakkersuisut qilanaaraat.  

Issittumi sillimaniarnermi politikikkut ineriartorneq 
Issittumi sillimaniarnermi politikikkut inissisimanerup allanngornera, Kalaallit Nunaata ilisimaaraa. Kalaallit Nunaata USA-p nunatut sillimaniarnikkut soqutigisaani aalajangiisuullunilu pingaaruteqartuunera paasillugulu akueraarput. Tamannalu Kalaallit Nunaata avannaani Amerikamiunut pingaarutilimik sakkutooqarfeqartitsineranut patsisaavoq. Kalaallit Nunaata Issittumi isumannaatsuuneq patajaatsumillu inissisimanerup qularnaarnissaa pillugu Amerikamiut naalakkersuisussaannik NATO-milu iligisanik suleqateqarnissaq qilanaaraa.

Nassiussisuuvoq: Naalagaaffinngornissamut Nunanullu allanut Naalakkersuisoq, Vivian Motzfeldt

Paasissutissat erseqqinnerusut Naalakkersuisoqarfimmi pisortamut Mininnguaq Kleist-imut mikl@nanoq.gl saaffiginninnikkut pissarsiarineqarsinnaapput.