Nuummi utoqqaat ilinniartullu kunngiitsuuffiunissaq kissaatigaat

Nuummi utoqqalinersiallit aamma Ilisimatusarfimmi Niuernermik Ilinniarfimmilu ilinniartut akornanni isumasiuinerup ersersippaa, Kalaallit Nunaat kunngeqarfiunani kunngiitsuuffinngortariaqartoq, aamma Ilisimatusarfimmi ilinniartut Nuummi utoqqalinersialittuulli isumaqarput, Kalaallit Nunaat ukiut 10-30-t ingerlaneranni naalagaaffinngortariaqartoq.

Inatsit Tunngaviusussaq pillugu innuttaasunik ataatsimiisitsisarnerit nangillugit Niuernermik Ilinniarfimmi Ilisimatusarfimmilu ilinniartut 40-t missaanniittut aamma Nuummi utoqqalinersiallit 70-t missaanniittut Naalagaaffinngornissamut Nunanullu allanut Naalakkersuisumik Vivian Motzfeldtimik novembarip naalernerani ataatsimeeqateqarput.

Kunngeqarfeqarnermit kunngiitsuuffimmut

Utoqqalinersiallit akornanni isumasiuinermi immikkut tupaallaatigisassaavoq 50 %-it isumaqarmata, Kalallit Nunaat kunngeqarani kunngiitsuuffinngortariaqartoq, 33 %-it isumaqarput, Kalallit Nunaat kunngeqarfimmik allamik suleqateqarluni kunngeqartariaqartoq sinnerisalu 17 %-it suna akissutigissallugu naluaat.

Ilisimatusarfimmi ilinniartut arfineq-pingasut ilinniartitsisullu pingasut ataatsimiinnermi peqataasut 90 %-iisa kissaatigaat, Kalaallit Nunaat kunngiitsuuffinngussasoq, sinnerisalu 10 %-it suna akissutigissallugu naluaat.

Taamatuttaaq Nuummi Niuernermik Ilinniarfimmi ilinniartut kissaatigaat, Kalaallit Nunaat kunngeqarfimmut ilaanani kunngiitsuuffinngortariaqartoq. Niuernermik Ilinniarfimmi ataatsimiinnermi peqataasut 30-t missaanniittut akornanni 57 %-it kissaatigaat, Kalaallit Nunaat kunngiitsuuffinngortariaqartoq, 34 %-it qanoq akinissartik naluaat 7 %-illu kissaatigaat Kalaallit Nunaat kunngeqarfik alla suleqatigalugu kunngeqartariaqartoq.

• Ataatsimeeqataasut amerlanersaasa Kalaallit Nunaata kunngeqarfimmut ilaanani kunngiitsuuffiulernissaa kissaatigimmassuk tupaallannarpoq, pingaartumillu utoqqaat amerlanersaasa kunngeqarfiunissaminngarnit kunngiitsuuffiunissaq toqqarmassuk immikkut tupaallannarpoq. Kalaallimmi kunngikkormiunik nuannarinnittutut oqaatigineqartarput, nunalli sinnerani isumasiuinissap qanoq inerneqarumaarnissaa takulaarallartigu, Vivian Motzfeldt Naalagaaffinngornissamut Nunanullu allanut Naalakkersuisoq oqarpoq.

Namminiilivinnissaq ukiut 10-30-t iluanni

Ataatsimiisitsinerit ataasiakkaat Niunermik Ilinniarfimmi, Ilisimatusarfimmi aamma peqatigiiffiit ataatsimoortarfianni Pilutami pipput. Naalakkersuisup Vivian Motzfeldtip utoqqallinersiallit 70-it missaanniittut Pilutamut ataatsimiigiarrattut immikkut nuannaarutigai.

Ataatsimeeqataasut Inatsit Tunngaviusussaq pillugu saqqummiivigineqarput, Namminersorlutik Oqartussat suliassaqarfinnik Danmarkimeersunik akisussaaffeqalernissaat aamma naalagaaffinngornissaq pillugu paasissutissiivigineqarput. Ataatsimeeqataasut aamma Inatsit Tunngaviusussaq nunallu naalagaaffinngoratarsinnaanera pillugu isumasiuinikkut isummersortinneqarput.

Kalaallit Nunaata qaqugu namminerisamik naalagaaffinngornissaa pillugu apeqqummut Niuernermik Ilinniarfimmi ilinniartut 53 %-ii akipput, Kalaallit Nunaat ukiut qulit tulliuttut iluanni naalagaaffinngortariaqartoq, 34 %-it isumaqarput, ukiut 11-30-t iluanni naalagaaffinngortoqassasoq 11 %-illu isumaqarput, ukiut 30-t qaangiutereernerisigut naalagaaffinngortoqartariaqartoq.

Nuummi utoqqalinersiallit Pilutami ataatsimeeqataasut akornanni 46 %-it isumaqarput, Kalaallit Nunaat ukiut 10-30-t ingerlaneranni namminiilivittariaqartoq, 28 procentit isumaqarput, Kalaallit Nunaat ukiut qulit tulliuttut ingerlaneranni naalagaaffinngortariaqartoq, 14 %-it isumaqarput naalagaaffik Kalaallit Nunaat ukiut 30-t qaangiutereerneranni piviusunngortinneqartariaqartoq sinnerilu 10 %-it isumaqarput, Kalaallit Nunaat naalagaaffinngunngisaannassasoq. 

Ilisimatusarfimmi ataatsimeeqataasut 60 %-iisa kissaatigaat Kalaallit Nunaat ukiut 10-30-t ingerlaneranni namminiilivittariaqartoq, 30 %-it kissaatigaat, Kalaallit Nunaat ukiut qulit tulliuttut ingerlaneranni naalagaaffinngortariaqartoq, sinnerisalu 10 %-it kissaatigaat, Kalaallit Nunaata naalagaaffinngornissaa ukiut 30-t sinnerlugit qaangiutereerneranni piviusunngortinneqartariaqartoq.

Amerlanerit naalagaaffik kissaatigaat

Niuernermik Ilinniarfimmi ilinniartut 69 %-iisa kissaatigaat, Kalaallit Nunaat namminerisamik naalagaaffinngortariaqartoq, 31 %-it kissaatigaat, Kalaallit Nunaat Danmarkilu tamarmik immikkut naalagaaffittut namminersortutut kiffaanngissuseqarlutik suleqatigiittariaqartut.

Utoqqalinersiallit 54 %-iisa kissaatigaat, Kalaallit Nunaat namminerisamik naalagaaffinngortariaqartoq, 32 %-iisa kissaatigaat, Kalaallit Nunaat Danmarkilu immikkut naalagaaffittut namminersortutut kiffaanngissuseqarlutik suleqatigiittariaqartut, sinnerisalu 13 %-it kissaatigaat, Kalaallit Nunaat ullumikkutuulli naalagaaffimmut Danmarkimut ataannartariaqartoq.

Ilisimatusarfimmi ataatsimeeqataasut 80 %-iisa kissaatigaat, Kalaallit Nunaat Danmarkilu immikkut naalagaaffittut namminersortutut kiffaanngissuseqarlutik suleqatigiittariaqartut, 20 %-illu kissaatigaat, Kalaallit Nunaat namminersortutut naalagaaffinngortariaqartoq. 

Annertunerusumik paasisaqarusuttut naalakkersuisumut allatsimut Naasunnguaq Beck Kristensenimut oqarasuaammut angallattakkamut 533684-mut sianerlutik paasiniaasinnaapput.